Study
- Anukramaṇī
- Source
6 maitrāvaruṇirvasiṣṭha:| sarasvatī, 4-6 sarasvān | 1-2= pragātha: (1 bṛhatī, 2 satobṛhatī ), 3 prastārapaṃkti:, 4-6 gāyatrī|
bṛ̱hadu̍ gāyiṣe̱ vaco̍'su̱ryā̍ na̱dīnā̍m |
sara̍svatī̱minma̍hayā suvṛ̱ktibhi̱: stomai̍rvasiṣṭha̱ roda̍sī
||1||बृ॒हदु॑ गायिषे॒ वचो॑ऽसु॒र्या॑ न॒दीना॑म् ।
सर॑स्वती॒मिन्म॑हया सुवृ॒क्तिभि॒: स्तोमै॑र्वसिष्ठ॒ रोद॑सी
u̱bhe yatte̍ mahi̱nā śu̍bhre̱ andha̍sī adhikṣi̱yanti̍ pū̱rava̍: |
sā no̍ bodhyavi̱trī ma̱rutsa̍khā̱ coda̱ rādho̍ ma̱ghonā̍m
||2||उ॒भे यत्ते॑ महि॒ना शु॑भ्रे॒ अन्ध॑सी अधिक्षि॒यन्ति॑ पू॒रव॑: ।
सा नो॑ बोध्यवि॒त्री म॒रुत्स॑खा॒ चोद॒ राधो॑ म॒घोना॑म्
bha̱dramidbha̱drā kṛ̍ṇava̱tsara̍sva̱tyaka̍vārī cetati vā̱jinī̍vatī |
gṛ̱ṇā̱nā ja̍madagni̱vatstu̍vā̱nā ca̍ vasiṣṭha̱vat
||3||भ॒द्रमिद्भ॒द्रा कृ॑णव॒त्सर॑स्व॒त्यक॑वारी चेतति वा॒जिनी॑वती ।
गृ॒णा॒ना ज॑मदग्नि॒वत्स्तु॑वा॒ना च॑ वसिष्ठ॒वत्
ja̱nī̱yanto̱ nvagra̍vaḥ putrī̱yanta̍: su̱dāna̍vaḥ | sara̍svantaṃ havāmahe
||4||ज॒नी॒यन्तो॒ न्वग्र॑वः पुत्री॒यन्त॑: सु॒दान॑वः । सर॑स्वन्तं हवामहे
ye te̍ sarasva ū̱rmayo̱ madhu̍manto ghṛta̱ścuta̍: | tebhi̍rno'vi̱tā bha̍va
||5||ये ते॑ सरस्व ऊ॒र्मयो॒ मधु॑मन्तो घृत॒श्चुत॑: । तेभि॑र्नोऽवि॒ता भ॑व
pī̱pi̱vāṃsa̱ṃ sara̍svata̱: stana̱ṃ yo vi̱śvada̍rśataḥ | bha̱kṣī̱mahi̍ pra̱jāmiṣa̍m
||6||पी॒पि॒वांसं॒ सर॑स्वत॒: स्तनं॒ यो वि॒श्वद॑र्शतः । भ॒क्षी॒महि॑ प्र॒जामिष॑म्