Study
- Anukramaṇī
- Source
5 maitrāvaruṇirvasiṣṭha:| indra: | triṣṭup |
na soma̱ indra̱masu̍to mamāda̱ nābra̍hmāṇo ma̱ghavā̍naṃ su̱tāsa̍: |
tasmā̍ u̱kthaṃ ja̍naye̱ yajjujo̍ṣannṛ̱vannavī̍yaḥ śṛ̱ṇava̱dyathā̍ naḥ
||1||न सोम॒ इन्द्र॒मसु॑तो ममाद॒ नाब्र॑ह्माणो म॒घवा॑नं सु॒तास॑: ।
तस्मा॑ उ॒क्थं ज॑नये॒ यज्जुजो॑षन्नृ॒वन्नवी॑यः शृ॒णव॒द्यथा॑ नः
u̱kthau̍kthe̱ soma̱ indra̍ṃ mamāda nī̱thenī̍the ma̱ghavā̍naṃ su̱tāsa̍: |
yadī̍ṃ sa̱bādha̍: pi̱tara̱ṃ na pu̱trāḥ sa̍mā̱nada̍kṣā̱ ava̍se̱ hava̍nte
||2||उ॒क्थौ॑क्थे॒ सोम॒ इन्द्रं॑ ममाद नी॒थेनी॑थे म॒घवा॑नं सु॒तास॑: ।
यदीं॑ स॒बाध॑: पि॒तरं॒ न पु॒त्राः स॑मा॒नद॑क्षा॒ अव॑से॒ हव॑न्ते
ca̱kāra̱ tā kṛ̱ṇava̍nnū̱nama̱nyā yāni̍ bru̱vanti̍ ve̱dhasa̍: su̱teṣu̍ |
janī̍riva̱ pati̱reka̍: samā̱no ni mā̍mṛje̱ pura̱ indra̱: su sarvā̍:
||3||च॒कार॒ ता कृ॒णव॑न्नू॒नम॒न्या यानि॑ ब्रु॒वन्ति॑ वे॒धस॑: सु॒तेषु॑ ।
जनी॑रिव॒ पति॒रेक॑: समा॒नो नि मा॑मृजे॒ पुर॒ इन्द्र॒: सु सर्वा॑:
e̱vā tamā̍huru̱ta śṛ̍ṇva̱ indra̱ eko̍ vibha̱ktā ta̱raṇi̍rma̱ghānā̍m |
mi̱tha̱stura̍ ū̱tayo̱ yasya̍ pū̱rvīra̱sme bha̱drāṇi̍ saścata pri̱yāṇi̍
||4||ए॒वा तमा॑हुरु॒त शृ॑ण्व॒ इन्द्र॒ एको॑ विभ॒क्ता त॒रणि॑र्म॒घाना॑म् ।
मि॒थ॒स्तुर॑ ऊ॒तयो॒ यस्य॑ पू॒र्वीर॒स्मे भ॒द्राणि॑ सश्चत प्रि॒याणि॑
e̱vā vasi̍ṣṭha̱ indra̍mū̱taye̱ nṝnkṛ̍ṣṭī̱nāṃ vṛ̍ṣa̱bhaṃ su̱te gṛ̍ṇāti |
sa̱ha̱sriṇa̱ upa̍ no māhi̱ vājā̍nyū̱yaṃ pā̍ta sva̱stibhi̱: sadā̍ naḥ
||5||ए॒वा वसि॑ष्ठ॒ इन्द्र॑मू॒तये॒ नॄन्कृ॑ष्टी॒नां वृ॑ष॒भं सु॒ते गृ॑णाति ।
स॒ह॒स्रिण॒ उप॑ नो माहि॒ वाजा॑न्यू॒यं पा॑त स्व॒स्तिभि॒: सदा॑ नः