Study
- Anukramaṇī
- Source
4 maitrāvaruṇirvasiṣṭha:| savitā | triṣṭup |
ā de̱vo yā̍tu savi̱tā su̱ratno̍'ntarikṣa̱prā vaha̍māno̱ aśvai̍: |
haste̱ dadhā̍no̱ naryā̍ pu̱rūṇi̍ nive̱śaya̍ñca prasu̱vañca̱ bhūma̍
||1||आ दे॒वो या॑तु सवि॒ता सु॒रत्नो॑ऽन्तरिक्ष॒प्रा वह॑मानो॒ अश्वै॑: ।
हस्ते॒ दधा॑नो॒ नर्या॑ पु॒रूणि॑ निवे॒शय॑ञ्च प्रसु॒वञ्च॒ भूम॑
uda̍sya bā̱hū śi̍thi̱rā bṛ̱hantā̍ hira̱ṇyayā̍ di̱vo antā̍m̐ anaṣṭām |
nū̱naṃ so a̍sya mahi̱mā pa̍niṣṭa̱ sūra̍ścidasmā̱ anu̍ dādapa̱syām
||2||उद॑स्य बा॒हू शि॑थि॒रा बृ॒हन्ता॑ हिर॒ण्यया॑ दि॒वो अन्ताँ॑ अनष्टाम् ।
नू॒नं सो अ॑स्य महि॒मा प॑निष्ट॒ सूर॑श्चिदस्मा॒ अनु॑ दादप॒स्याम्
sa ghā̍ no de̱vaḥ sa̍vi̱tā sa̱hāvā ''sā̍viṣa̱dvasu̍pati̱rvasū̍ni |
vi̱śraya̍māṇo a̱mati̍murū̱cīṃ ma̍rta̱bhoja̍na̱madha̍ rāsate naḥ
||3||स घा॑ नो दे॒वः स॑वि॒ता स॒हावा ऽऽसा॑विष॒द्वसु॑पति॒र्वसू॑नि ।
वि॒श्रय॑माणो अ॒मति॑मुरू॒चीं म॑र्त॒भोज॑न॒मध॑ रासते नः
i̱mā gira̍: savi̱tāra̍ṃ suji̱hvaṃ pū̱rṇaga̍bhastimīl̤ate supā̱ṇim |
ci̱traṃ vayo̍ bṛ̱hada̱sme da̍dhātu yū̱yaṃ pā̍ta sva̱stibhi̱: sadā̍ naḥ
||4||इ॒मा गिर॑: सवि॒तारं॑ सुजि॒ह्वं पू॒र्णग॑भस्तिमीळते सुपा॒णिम् ।
चि॒त्रं वयो॑ बृ॒हद॒स्मे द॑धातु यू॒यं पा॑त स्व॒स्तिभि॒: सदा॑ नः