Study
- Anukramaṇī
- Source
8 maitrāvaruṇirvasiṣṭha:| vāstoṣpati:, 2- 8 indra:( 2-8 prasvāpinī upaniṣad ) |1 gāyatrī, 2-4 upariṣṭādbṛhatī, 5-8 anuṣṭup |
a̱mī̱va̱hā vā̍stoṣpate̱ viśvā̍ rū̱pāṇyā̍vi̱śan | sakhā̍ su̱śeva̍ edhi naḥ
||1||अ॒मी॒व॒हा वा॑स्तोष्पते॒ विश्वा॑ रू॒पाण्या॑वि॒शन् । सखा॑ सु॒शेव॑ एधि नः
yada̍rjuna sārameya da̱taḥ pi̍śaṅga̱ yaccha̍se | vī̍va bhrājanta ṛ̱ṣṭaya̱ upa̱ srakve̍ṣu̱ bapsa̍to̱ ni ṣu sva̍pa
||2||यद॑र्जुन सारमेय द॒तः पि॑शङ्ग॒ यच्छ॑से । वी॑व भ्राजन्त ऋ॒ष्टय॒ उप॒ स्रक्वे॑षु॒ बप्स॑तो॒ नि षु स्व॑प
ste̱naṃ rā̍ya sārameya̱ taska̍raṃ vā punaḥsara | sto̱tṝnindra̍sya rāyasi̱ kima̱smāndu̍cchunāyase̱ ni ṣu sva̍pa
||3||स्ते॒नं रा॑य सारमेय॒ तस्क॑रं वा पुनःसर । स्तो॒तॄनिन्द्र॑स्य रायसि॒ किम॒स्मान्दु॑च्छुनायसे॒ नि षु स्व॑प
tvaṃ sū̍ka̱rasya̍ dardṛhi̱ tava̍ dardartu sūka̱raḥ | sto̱tṝnindra̍sya rāyasi̱ kima̱smāndu̍cchunāyase̱ ni ṣu sva̍pa
||4||त्वं सू॑क॒रस्य॑ दर्दृहि॒ तव॑ दर्दर्तु सूक॒रः । स्तो॒तॄनिन्द्र॑स्य रायसि॒ किम॒स्मान्दु॑च्छुनायसे॒ नि षु स्व॑प
sastu̍ mā̱tā sastu̍ pi̱tā sastu̱ śvā sastu̍ vi̱śpati̍: | sa̱santu̱ sarve̍ jñā̱taya̱: sastva̱yama̱bhito̱ jana̍:
||5||सस्तु॑ मा॒ता सस्तु॑ पि॒ता सस्तु॒ श्वा सस्तु॑ वि॒श्पति॑: । स॒सन्तु॒ सर्वे॑ ज्ञा॒तय॒: सस्त्व॒यम॒भितो॒ जन॑:
ya āste̱ yaśca̱ cara̍ti̱ yaśca̱ paśya̍ti no̱ jana̍: | teṣā̱ṃ saṃ ha̍nmo a̱kṣāṇi̱ yathe̱daṃ ha̱rmyaṃ tathā̍
||6||य आस्ते॒ यश्च॒ चर॑ति॒ यश्च॒ पश्य॑ति नो॒ जन॑: । तेषां॒ सं ह॑न्मो अ॒क्षाणि॒ यथे॒दं ह॒र्म्यं तथा॑
sa̱hasra̍śṛṅgo vṛṣa̱bho yaḥ sa̍mu̱drādu̱dāca̍rat | tenā̍ saha̱sye̍nā va̱yaṃ ni janā̍ntsvāpayāmasi
||7||स॒हस्र॑शृङ्गो वृष॒भो यः स॑मु॒द्रादु॒दाच॑रत् । तेना॑ सह॒स्ये॑ना व॒यं नि जना॑न्त्स्वापयामसि
pro̱ṣṭhe̱śa̱yā va̍hyeśa̱yā nārī̱ryāsta̍lpa̱śīva̍rīḥ | striyo̱ yāḥ puṇya̍gandhā̱stāḥ sarvā̍: svāpayāmasi
||8||प्रो॒ष्ठे॒श॒या व॑ह्येश॒या नारी॒र्यास्त॑ल्प॒शीव॑रीः । स्त्रियो॒ याः पुण्य॑गन्धा॒स्ताः सर्वा॑: स्वापयामसि