Sūktam 15 — upasadyāya (15 mantras) — Śākala Saṃhitā (Ṛgveda)

Study

u̱pa̱sadyā̍ya mī̱l̤huṣa̍ ā̱sye̍ juhutā ha̱viḥ | yo no̱ nedi̍ṣṭha̱māpya̍m

||1||

उ॒प॒सद्या॑य मी॒ळ्हुष॑ आ॒स्ये॑ जुहुता ह॒विः । यो नो॒ नेदि॑ष्ठ॒माप्य॑म्

yaḥ pañca̍ carṣa̱ṇīra̱bhi ni̍ṣa̱sāda̱ dame̍dame | ka̱virgṛ̱hapa̍ti̱ryuvā̍

||2||

यः पञ्च॑ चर्ष॒णीर॒भि नि॑ष॒साद॒ दमे॑दमे । क॒विर्गृ॒हप॑ति॒र्युवा॑

sa no̱ vedo̍ a̱mātya̍ma̱gnī ra̍kṣatu vi̱śvata̍: | u̱tāsmānpā̱tvaṃha̍saḥ

||3||

स नो॒ वेदो॑ अ॒मात्य॑म॒ग्नी र॑क्षतु वि॒श्वत॑: । उ॒तास्मान्पा॒त्वंह॑सः

nava̱ṃ nu stoma̍ma̱gnaye̍ di̱vaḥ śye̱nāya̍ jījanam | vasva̍: ku̱vidva̱nāti̍ naḥ

||4||

नवं॒ नु स्तोम॑म॒ग्नये॑ दि॒वः श्ये॒नाय॑ जीजनम् । वस्व॑: कु॒विद्व॒नाति॑ नः

spā̱rhā yasya̱ śriyo̍ dṛ̱śe ra̱yirvī̱rava̍to yathā | agre̍ ya̱jñasya̱ śoca̍taḥ

||5||

स्पा॒र्हा यस्य॒ श्रियो॑ दृ॒शे र॒यिर्वी॒रव॑तो यथा । अग्रे॑ य॒ज्ञस्य॒ शोच॑तः

semāṃ ve̍tu̱ vaṣa̍ṭkṛtima̱gnirju̍ṣata no̱ gira̍: | yaji̍ṣṭho havya̱vāha̍naḥ

||6||

सेमां वे॑तु॒ वष॑ट्कृतिम॒ग्निर्जु॑षत नो॒ गिर॑: । यजि॑ष्ठो हव्य॒वाह॑नः

ni tvā̍ nakṣya viśpate dyu̱manta̍ṃ deva dhīmahi | su̱vīra̍magna āhuta

||7||

नि त्वा॑ नक्ष्य विश्पते द्यु॒मन्तं॑ देव धीमहि । सु॒वीर॑मग्न आहुत

kṣapa̍ u̱sraśca̍ dīdihi sva̱gnaya̱stvayā̍ va̱yam | su̱vīra̱stvama̍sma̱yuḥ

||8||

क्षप॑ उ॒स्रश्च॑ दीदिहि स्व॒ग्नय॒स्त्वया॑ व॒यम् । सु॒वीर॒स्त्वम॑स्म॒युः

upa̍ tvā sā̱taye̱ naro̱ viprā̍so yanti dhī̱tibhi̍: | upākṣa̍rā saha̱sriṇī̍

||9||

उप॑ त्वा सा॒तये॒ नरो॒ विप्रा॑सो यन्ति धी॒तिभि॑: । उपाक्ष॑रा सह॒स्रिणी॑

a̱gnī rakṣā̍ṃsi sedhati śu̱kraśo̍ci̱rama̍rtyaḥ | śuci̍: pāva̱ka īḍya̍:

||10||

अ॒ग्नी रक्षां॑सि सेधति शु॒क्रशो॑चि॒रम॑र्त्यः । शुचि॑: पाव॒क ईड्य॑:

sa no̱ rādhā̱ṃsyā bha̱reśā̍naḥ sahaso yaho | bhaga̍śca dātu̱ vārya̍m

||11||

स नो॒ राधां॒स्या भ॒रेशा॑नः सहसो यहो । भग॑श्च दातु॒ वार्य॑म्

tvama̍gne vī̱rava̱dyaśo̍ de̱vaśca̍ savi̱tā bhaga̍: | diti̍śca dāti̱ vārya̍m

||12||

त्वम॑ग्ने वी॒रव॒द्यशो॑ दे॒वश्च॑ सवि॒ता भग॑: । दिति॑श्च दाति॒ वार्य॑म्

agne̱ rakṣā̍ ṇo̱ aṃha̍sa̱: prati̍ ṣma deva̱ rīṣa̍taḥ | tapi̍ṣṭhaira̱jaro̍ daha

||13||

अग्ने॒ रक्षा॑ णो॒ अंह॑स॒: प्रति॑ ष्म देव॒ रीष॑तः । तपि॑ष्ठैर॒जरो॑ दह

adhā̍ ma̱hī na̱ āya̱syanā̍dhṛṣṭo̱ nṛpī̍taye | pūrbha̍vā śa̱tabhu̍jiḥ

||14||

अधा॑ म॒ही न॒ आय॒स्यना॑धृष्टो॒ नृपी॑तये । पूर्भ॑वा श॒तभु॑जिः

tvaṃ na̍: pā̱hyaṃha̍so̱ doṣā̍vastaraghāya̱taḥ | divā̱ nakta̍madābhya

||15||

त्वं न॑: पा॒ह्यंह॑सो॒ दोषा॑वस्तरघाय॒तः । दिवा॒ नक्त॑मदाभ्य