Study
- Anukramaṇī
- Source
5 maitrāvaruṇirvasiṣṭha:| agni: | triṣṭup |
ma̱hām̐ a̍syadhva̱rasya̍ prake̱to na ṛ̱te tvada̱mṛtā̍ mādayante |
ā viśve̍bhiḥ sa̱ratha̍ṃ yāhi de̱vairnya̍gne̱ hotā̍ pratha̱maḥ sa̍de̱ha
||1||म॒हाँ अ॑स्यध्व॒रस्य॑ प्रके॒तो न ऋ॒ते त्वद॒मृता॑ मादयन्ते ।
आ विश्वे॑भिः स॒रथं॑ याहि दे॒वैर्न्य॑ग्ने॒ होता॑ प्रथ॒मः स॑दे॒ह
tvāmī̍l̤ate aji̱raṃ dū̱tyā̍ya ha̱viṣma̍nta̱: sada̱minmānu̍ṣāsaḥ |
yasya̍ de̱vairāsa̍do ba̱rhira̱gne'hā̍nyasmai su̱dinā̍ bhavanti
||2||त्वामी॑ळते अजि॒रं दू॒त्या॑य ह॒विष्म॑न्त॒: सद॒मिन्मानु॑षासः ।
यस्य॑ दे॒वैरास॑दो ब॒र्हिर॒ग्नेऽहा॑न्यस्मै सु॒दिना॑ भवन्ति
triści̍da̱ktoḥ pra ci̍kitu̱rvasū̍ni̱ tve a̱ntardā̱śuṣe̱ martyā̍ya |
ma̱nu̱ṣvada̍gna i̱ha ya̍kṣi de̱vānbhavā̍ no dū̱to a̍bhiśasti̱pāvā̍
||3||त्रिश्चि॑द॒क्तोः प्र चि॑कितु॒र्वसू॑नि॒ त्वे अ॒न्तर्दा॒शुषे॒ मर्त्या॑य ।
म॒नु॒ष्वद॑ग्न इ॒ह य॑क्षि दे॒वान्भवा॑ नो दू॒तो अ॑भिशस्ति॒पावा॑
a̱gnirī̍śe bṛha̱to a̍dhva̱rasyā̱'gnirviśva̍sya ha̱viṣa̍: kṛ̱tasya̍ |
kratu̱ṃ hya̍sya̱ vasa̍vo ju̱ṣantā'thā̍ de̱vā da̍dhire havya̱vāha̍m
||4||अ॒ग्निरी॑शे बृह॒तो अ॑ध्व॒रस्या॒ऽग्निर्विश्व॑स्य ह॒विष॑: कृ॒तस्य॑ ।
क्रतुं॒ ह्य॑स्य॒ वस॑वो जु॒षन्ताऽथा॑ दे॒वा द॑धिरे हव्य॒वाह॑म्
āgne̍ vaha havi̱radyā̍ya de̱vānindra̍jyeṣṭhāsa i̱ha mā̍dayantām |
i̱maṃ ya̱jñaṃ di̱vi de̱veṣu̍ dhehi yū̱yaṃ pā̍ta sva̱stibhi̱: sadā̍ naḥ
||5||आग्ने॑ वह हवि॒रद्या॑य दे॒वानिन्द्र॑ज्येष्ठास इ॒ह मा॑दयन्ताम् ।
इ॒मं य॒ज्ञं दि॒वि दे॒वेषु॑ धेहि यू॒यं पा॑त स्व॒स्तिभि॒: सदा॑ नः