Study
- Anukramaṇī
- Source
7 maitrāvaruṇirvasiṣṭha:| 1,3 vāyu: , 2, 4-7 indravāyū | triṣṭup |
ku̱vida̱ṅga nama̍sā̱ ye vṛ̱dhāsa̍: pu̱rā de̱vā a̍nava̱dyāsa̱ āsa̍n |
te vā̱yave̱ mana̍ve bādhi̱tāyā'vā̍sayannu̱ṣasa̱ṃ sūrye̍ṇa
||1||कु॒विद॒ङ्ग नम॑सा॒ ये वृ॒धास॑: पु॒रा दे॒वा अ॑नव॒द्यास॒ आस॑न् ।
ते वा॒यवे॒ मन॑वे बाधि॒तायाऽवा॑सयन्नु॒षसं॒ सूर्ये॑ण
u̱śantā̍ dū̱tā na dabhā̍ya go̱pā mā̱saśca̍ pā̱thaḥ śa̱rada̍śca pū̱rvīḥ |
indra̍vāyū suṣṭu̱tirvā̍miyā̱nā mā̍rḍī̱kamī̍ṭṭe suvi̱taṃ ca̱ navya̍m
||2||उ॒शन्ता॑ दू॒ता न दभा॑य गो॒पा मा॒सश्च॑ पा॒थः श॒रद॑श्च पू॒र्वीः ।
इन्द्र॑वायू सुष्टु॒तिर्वा॑मिया॒ना मा॑र्डी॒कमी॑ट्टे सुवि॒तं च॒ नव्य॑म्
pīvo̍annām̐ rayi̱vṛdha̍: sume̱dhāḥ śve̱taḥ si̍ṣakti ni̱yutā̍mabhi̱śrīḥ |
te vā̱yave̱ sama̍naso̱ vi ta̍sthu̱rviśvennara̍: svapa̱tyāni̍ cakruḥ
||3||पीवो॑अन्नाँ रयि॒वृध॑: सुमे॒धाः श्वे॒तः सि॑षक्ति नि॒युता॑मभि॒श्रीः ।
ते वा॒यवे॒ सम॑नसो॒ वि त॑स्थु॒र्विश्वेन्नर॑: स्वप॒त्यानि॑ चक्रुः
yāva̱ttara̍sta̱nvo̱3 yāva̱dojo̱ yāva̱nnara̱ścakṣa̍sā̱ dīdhyā̍nāḥ |
śuci̱ṃ soma̍ṃ śucipā pātama̱sme indra̍vāyū̱ sada̍taṃ ba̱rhiredam
||4||याव॒त्तर॑स्त॒न्वो॒३ याव॒दोजो॒ याव॒न्नर॒श्चक्ष॑सा॒ दीध्या॑नाः ।
शुचिं॒ सोमं॑ शुचिपा पातम॒स्मे इन्द्र॑वायू॒ सद॑तं ब॒र्हिरेदम्
ni̱yu̱vā̱nā ni̱yuta̍: spā̱rhavī̍rā̱ indra̍vāyū sa̱ratha̍ṃ yātama̱rvāk |
i̱daṃ hi vā̱ṃ prabhṛ̍ta̱ṃ madhvo̱ agra̱madha̍ prīṇā̱nā vi mu̍muktama̱sme
||5||नि॒यु॒वा॒ना नि॒युत॑: स्पा॒र्हवी॑रा॒ इन्द्र॑वायू स॒रथं॑ यातम॒र्वाक् ।
इ॒दं हि वां॒ प्रभृ॑तं॒ मध्वो॒ अग्र॒मध॑ प्रीणा॒ना वि मु॑मुक्तम॒स्मे
yā vā̍ṃ śa̱taṃ ni̱yuto̱ yāḥ sa̱hasra̱mindra̍vāyū vi̱śvavā̍rā̱: saca̍nte |
ābhi̍ryātaṃ suvi̱datrā̍bhira̱rvākpā̱taṃ na̍rā̱ prati̍bhṛtasya̱ madhva̍:
||6||या वां॑ श॒तं नि॒युतो॒ याः स॒हस्र॒मिन्द्र॑वायू वि॒श्ववा॑रा॒: सच॑न्ते ।
आभि॑र्यातं सुवि॒दत्रा॑भिर॒र्वाक्पा॒तं न॑रा॒ प्रति॑भृतस्य॒ मध्व॑:
arva̍nto̱ na śrava̍so̱ bhikṣa̍māṇā indravā̱yū su̍ṣṭu̱tibhi̱rvasi̍ṣṭhāḥ |
vā̱ja̱yanta̱: svava̍se huvema yū̱yaṃ pā̍ta sva̱stibhi̱: sadā̍ naḥ
||7||अर्व॑न्तो॒ न श्रव॑सो॒ भिक्ष॑माणा इन्द्रवा॒यू सु॑ष्टु॒तिभि॒र्वसि॑ष्ठाः ।
वा॒ज॒यन्त॒: स्वव॑से हुवेम यू॒यं पा॑त स्व॒स्तिभि॒: सदा॑ नः