Study
- Anukramaṇī
- Source
9 maitrāvaruṇirvasiṣṭha:| indra: | virāṭ, 9 triṣṭup |
pibā̱ soma̍mindra̱ manda̍tu tvā̱ yaṃ te̍ su̱ṣāva̍ harya̱śvādri̍: | so̱turbā̱hubhyā̱ṃ suya̍to̱ nārvā̍
||1||पिबा॒ सोम॑मिन्द्र॒ मन्द॑तु त्वा॒ यं ते॑ सु॒षाव॑ हर्य॒श्वाद्रि॑: । सो॒तुर्बा॒हुभ्यां॒ सुय॑तो॒ नार्वा॑
yaste̱ mado̱ yujya̱ścāru̱rasti̱ yena̍ vṛ̱trāṇi̍ haryaśva̱ haṃsi̍ | sa tvāmi̍ndra prabhūvaso mamattu
||2||यस्ते॒ मदो॒ युज्य॒श्चारु॒रस्ति॒ येन॑ वृ॒त्राणि॑ हर्यश्व॒ हंसि॑ । स त्वामि॑न्द्र प्रभूवसो ममत्तु
bodhā̱ su me̍ maghava̱nvāca̱memāṃ yāṃ te̱ vasi̍ṣṭho̱ arca̍ti̱ praśa̍stim | i̱mā brahma̍ sadha̱māde̍ juṣasva
||3||बोधा॒ सु मे॑ मघव॒न्वाच॒मेमां यां ते॒ वसि॑ष्ठो॒ अर्च॑ति॒ प्रश॑स्तिम् । इ॒मा ब्रह्म॑ सध॒मादे॑ जुषस्व
śru̱dhī hava̍ṃ vipipā̱nasyādre̱rbodhā̱ vipra̱syārca̍to manī̱ṣām | kṛ̱ṣvā duvā̱ṃsyanta̍mā̱ sace̱mā
||4||श्रु॒धी हवं॑ विपिपा॒नस्याद्रे॒र्बोधा॒ विप्र॒स्यार्च॑तो मनी॒षाम् । कृ॒ष्वा दुवां॒स्यन्त॑मा॒ सचे॒मा
na te̱ giro̱ api̍ mṛṣye tu̱rasya̱ na su̍ṣṭu̱tima̍su̱rya̍sya vi̱dvān | sadā̍ te̱ nāma̍ svayaśo vivakmi
||5||न ते॒ गिरो॒ अपि॑ मृष्ये तु॒रस्य॒ न सु॑ष्टु॒तिम॑सु॒र्य॑स्य वि॒द्वान् । सदा॑ ते॒ नाम॑ स्वयशो विवक्मि
bhūri̱ hi te̱ sava̍nā̱ mānu̍ṣeṣu̱ bhūri̍ manī̱ṣī ha̍vate̱ tvāmit | māre a̱smanma̍ghava̱ñjyokka̍:
||6||भूरि॒ हि ते॒ सव॑ना॒ मानु॑षेषु॒ भूरि॑ मनी॒षी ह॑वते॒ त्वामित् । मारे अ॒स्मन्म॑घव॒ञ्ज्योक्क॑:
tubhyedi̱mā sava̍nā śūra̱ viśvā̱ tubhya̱ṃ brahmā̍ṇi̱ vardha̍nā kṛṇomi | tvaṃ nṛbhi̱rhavyo̍ vi̱śvadhā̍si
||7||तुभ्येदि॒मा सव॑ना शूर॒ विश्वा॒ तुभ्यं॒ ब्रह्मा॑णि॒ वर्ध॑ना कृणोमि । त्वं नृभि॒र्हव्यो॑ वि॒श्वधा॑सि
nū ci̱nnu te̱ manya̍mānasya da̱smoda̍śnuvanti mahi̱māna̍mugra | na vī̱rya̍mindra te̱ na rādha̍:
||8||नू चि॒न्नु ते॒ मन्य॑मानस्य द॒स्मोद॑श्नुवन्ति महि॒मान॑मुग्र । न वी॒र्य॑मिन्द्र ते॒ न राध॑:
ye ca̱ pūrva̱ ṛṣa̍yo̱ ye ca̱ nūtnā̱ indra̱ brahmā̍ṇi ja̱naya̍nta̱ viprā̍: |
a̱sme te̍ santu sa̱khyā śi̱vāni̍ yū̱yaṃ pā̍ta sva̱stibhi̱: sadā̍ naḥ
||9||ये च॒ पूर्व॒ ऋष॑यो॒ ये च॒ नूत्ना॒ इन्द्र॒ ब्रह्मा॑णि ज॒नय॑न्त॒ विप्रा॑: ।
अ॒स्मे ते॑ सन्तु स॒ख्या शि॒वानि॑ यू॒यं पा॑त स्व॒स्तिभि॒: सदा॑ नः