Study
- Anukramaṇī
- Source
6 maitrāvaruṇirvasiṣṭha:| 1-3 sūrya:, 4-6 mitrāvaruṇau | triṣṭup |
utsūryo̍ bṛ̱hada̱rcīṃṣya̍śretpu̱ru viśvā̱ jani̍ma̱ mānu̍ṣāṇām |
sa̱mo di̱vā da̍dṛśe̱ roca̍māna̱: kratvā̍ kṛ̱taḥ sukṛ̍taḥ ka̱rtṛbhi̍rbhūt
||1||उत्सूर्यो॑ बृ॒हद॒र्चींष्य॑श्रेत्पु॒रु विश्वा॒ जनि॑म॒ मानु॑षाणाम् ।
स॒मो दि॒वा द॑दृशे॒ रोच॑मान॒: क्रत्वा॑ कृ॒तः सुकृ॑तः क॒र्तृभि॑र्भूत्
sa sū̍rya̱ prati̍ pu̱ro na̱ udgā̍ e̱bhiḥ stome̍bhireta̱śebhi̱revai̍: |
pra no̍ mi̱trāya̱ varu̍ṇāya vo̱co'nā̍gaso arya̱mṇe a̱gnaye̍ ca
||2||स सू॑र्य॒ प्रति॑ पु॒रो न॒ उद्गा॑ ए॒भिः स्तोमे॑भिरेत॒शेभि॒रेवै॑: ।
प्र नो॑ मि॒त्राय॒ वरु॑णाय वो॒चोऽना॑गसो अर्य॒म्णे अ॒ग्नये॑ च
vi na̍: sa̱hasra̍ṃ śu̱rudho̍ radantvṛ̱tāvā̍no̱ varu̍ṇo mi̱tro a̱gniḥ |
yaccha̍ntu ca̱ndrā u̍pa̱maṃ no̍ a̱rkamā na̱: kāma̍ṃ pūpurantu̱ stavā̍nāḥ
||3||वि न॑: स॒हस्रं॑ शु॒रुधो॑ रदन्त्वृ॒तावा॑नो॒ वरु॑णो मि॒त्रो अ॒ग्निः ।
यच्छ॑न्तु च॒न्द्रा उ॑प॒मं नो॑ अ॒र्कमा न॒: कामं॑ पूपुरन्तु॒ स्तवा॑नाः
dyāvā̍bhūmī adite̱ trāsī̍thāṃ no̱ ye vā̍ṃ ja̱jñuḥ su̱jani̍māna ṛṣve |
mā hel̤e̍ bhūma̱ varu̍ṇasya vā̱yormā mi̱trasya̍ pri̱yata̍masya nṛ̱ṇām
||4||द्यावा॑भूमी अदिते॒ त्रासी॑थां नो॒ ये वां॑ ज॒ज्ञुः सु॒जनि॑मान ऋष्वे ।
मा हेळे॑ भूम॒ वरु॑णस्य वा॒योर्मा मि॒त्रस्य॑ प्रि॒यत॑मस्य नृ॒णाम्
pra bā̱havā̍ sisṛtaṃ jī̱vase̍ na̱ ā no̱ gavyū̍timukṣataṃ ghṛ̱tena̍ |
ā no̱ jane̍ śravayataṃ yuvānā śru̱taṃ me̍ mitrāvaruṇā̱ have̱mā
||5||प्र बा॒हवा॑ सिसृतं जी॒वसे॑ न॒ आ नो॒ गव्यू॑तिमुक्षतं घृ॒तेन॑ ।
आ नो॒ जने॑ श्रवयतं युवाना श्रु॒तं मे॑ मित्रावरुणा॒ हवे॒मा
nū mi̱tro varu̍ṇo arya̱mā na̱stmane̍ to̱kāya̱ vari̍vo dadhantu |
su̱gā no̱ viśvā̍ su̱pathā̍ni santu yū̱yaṃ pā̍ta sva̱stibhi̱: sadā̍ naḥ
||6||नू मि॒त्रो वरु॑णो अर्य॒मा न॒स्त्मने॑ तो॒काय॒ वरि॑वो दधन्तु ।
सु॒गा नो॒ विश्वा॑ सु॒पथा॑नि सन्तु यू॒यं पा॑त स्व॒स्तिभि॒: सदा॑ नः