Study
- Anukramaṇī
- Source
5 maitrāvaruṇirvasiṣṭha:| mitrāvaruṇau | triṣṭup |
prati̍ vā̱ṃ sūra̱ udi̍te sū̱ktairmi̱traṃ hu̍ve̱ varu̍ṇaṃ pū̱tada̍kṣam |
yayo̍rasu̱rya1makṣi̍ta̱ṃ jyeṣṭha̱ṃ viśva̍sya̱ yāma̍nnā̱citā̍ jiga̱tnu
||1||प्रति॑ वां॒ सूर॒ उदि॑ते सू॒क्तैर्मि॒त्रं हु॑वे॒ वरु॑णं पू॒तद॑क्षम् ।
ययो॑रसु॒र्य१मक्षि॑तं॒ ज्येष्ठं॒ विश्व॑स्य॒ याम॑न्ना॒चिता॑ जिग॒त्नु
tā hi de̱vānā̱masu̍rā̱ tāva̱ryā tā na̍: kṣi̱tīḥ ka̍ratamū̱rjaya̍ntīḥ |
a̱śyāma̍ mitrāvaruṇā va̱yaṃ vā̱ṃ dyāvā̍ ca̱ yatra̍ pī̱paya̱nnahā̍ ca
||2||ता हि दे॒वाना॒मसु॑रा॒ ताव॒र्या ता न॑: क्षि॒तीः क॑रतमू॒र्जय॑न्तीः ।
अ॒श्याम॑ मित्रावरुणा व॒यं वां॒ द्यावा॑ च॒ यत्र॑ पी॒पय॒न्नहा॑ च
tā bhūri̍pāśā̱vanṛ̍tasya̱ setū̍ dura̱tyetū̍ ri̱pave̱ martyā̍ya |
ṛ̱tasya̍ mitrāvaruṇā pa̱thā vā̍ma̱po na nā̱vā du̍ri̱tā ta̍rema
||3||ता भूरि॑पाशा॒वनृ॑तस्य॒ सेतू॑ दुर॒त्येतू॑ रि॒पवे॒ मर्त्या॑य ।
ऋ॒तस्य॑ मित्रावरुणा प॒था वा॑म॒पो न ना॒वा दु॑रि॒ता त॑रेम
ā no̍ mitrāvaruṇā ha̱vyaju̍ṣṭiṃ ghṛ̱tairgavyū̍timukṣata̱mil̤ā̍bhiḥ |
prati̍ vā̱matra̱ vara̱mā janā̍ya pṛṇī̱tamu̱dno di̱vyasya̱ cāro̍:
||4||आ नो॑ मित्रावरुणा ह॒व्यजु॑ष्टिं घृ॒तैर्गव्यू॑तिमुक्षत॒मिळा॑भिः ।
प्रति॑ वा॒मत्र॒ वर॒मा जना॑य पृणी॒तमु॒द्नो दि॒व्यस्य॒ चारो॑:
e̱ṣa stomo̍ varuṇa mitra̱ tubhya̱ṃ soma̍: śu̱kro na vā̱yave̍'yāmi |
a̱vi̱ṣṭaṃ dhiyo̍ jigṛ̱taṃ pura̍ṃdhīryū̱yaṃ pā̍ta sva̱stibhi̱: sadā̍ naḥ
||5||ए॒ष स्तोमो॑ वरुण मित्र॒ तुभ्यं॒ सोम॑: शु॒क्रो न वा॒यवे॑ऽयामि ।
अ॒वि॒ष्टं धियो॑ जिगृ॒तं पुरं॑धीर्यू॒यं पा॑त स्व॒स्तिभि॒: सदा॑ नः