Study
- Anukramaṇī
- Source
7 bārhaspatyo bharadvāja: | vaiśvānarosgni : | jagatī, 7 triṣṭup |
pṛ̱kṣasya̱ vṛṣṇo̍ aru̱ṣasya̱ nū saha̱: pra nu vo̍caṃ vi̱dathā̍ jā̱tave̍dasaḥ |
vai̱śvā̱na̱rāya̍ ma̱tirnavya̍sī̱ śuci̱: soma̍ iva pavate̱ cāru̍ra̱gnaye̍
||1||पृ॒क्षस्य॒ वृष्णो॑ अरु॒षस्य॒ नू सह॒: प्र नु वो॑चं वि॒दथा॑ जा॒तवे॑दसः ।
वै॒श्वा॒न॒राय॑ म॒तिर्नव्य॑सी॒ शुचि॒: सोम॑ इव पवते॒ चारु॑र॒ग्नये॑
sa jāya̍mānaḥ para̱me vyo̍mani vra̱tānya̱gnirvra̍ta̱pā a̍rakṣata |
vya1ntari̍kṣamamimīta su̱kratu̍rvaiśvāna̱ro ma̍hi̱nā nāka̍maspṛśat
||2||स जाय॑मानः पर॒मे व्यो॑मनि व्र॒तान्य॒ग्निर्व्र॑त॒पा अ॑रक्षत ।
व्य१न्तरि॑क्षममिमीत सु॒क्रतु॑र्वैश्वान॒रो म॑हि॒ना नाक॑मस्पृशत्
vya̍stabhnā̱d roda̍sī mi̱tro adbhu̍to 'nta̱rvāva̍dakṛṇo̱jjyoti̍ṣā̱ tama̍: |
vi carma̍ṇīva dhi̱ṣaṇe̍ avartayad vaiśvāna̱ro viśva̍madhatta̱ vṛṣṇya̍m
||3||व्य॑स्तभ्ना॒द् रोद॑सी मि॒त्रो अद्भु॑तो ऽन्त॒र्वाव॑दकृणो॒ज्ज्योति॑षा॒ तम॑: ।
वि चर्म॑णीव धि॒षणे॑ अवर्तयद् वैश्वान॒रो विश्व॑मधत्त॒ वृष्ण्य॑म्
a̱pāmu̱pasthe̍ mahi̱ṣā a̍gṛbhṇata̱ viśo̱ rājā̍na̱mupa̍ tasthuṝ̱gmiya̍m |
ā dū̱to a̱gnima̍bharad vi̱vasva̍to vaiśvāna̱raṃ mā̍ta̱riśvā̍ parā̱vata̍:
||4||अ॒पामु॒पस्थे॑ महि॒षा अ॑गृभ्णत॒ विशो॒ राजा॑न॒मुप॑ तस्थुॠ॒ग्मिय॑म् ।
आ दू॒तो अ॒ग्निम॑भरद् वि॒वस्व॑तो वैश्वान॒रं मा॑त॒रिश्वा॑ परा॒वत॑:
yu̱geyu̍ge vida̱thya̍ṃ gṛ̱ṇadbhyo 'gne̍ ra̱yiṃ ya̱śasa̍ṃ dhehi̱ navya̍sīm |
pa̱vyeva̍ rājanna̱ghaśa̍ṃsamajara nī̱cā ni vṛ̍śca va̱nina̱ṃ na teja̍sā
||5||यु॒गेयु॑गे विद॒थ्यं॑ गृ॒णद्भ्यो ऽग्ने॑ र॒यिं य॒शसं॑ धेहि॒ नव्य॑सीम् ।
प॒व्येव॑ राजन्न॒घशं॑समजर नी॒चा नि वृ॑श्च व॒निनं॒ न तेज॑सा
a̱smāka̍magne ma̱ghava̍tsu dhāra̱yā'nā̍mi kṣa̱trama̱jara̍ṃ su̱vīrya̍m |
va̱yaṃ ja̍yema śa̱tina̍ṃ saha̱sriṇa̱ṃ vaiśvā̍nara̱ vāja̍magne̱ tavo̱tibhi̍:
||6||अ॒स्माक॑मग्ने म॒घव॑त्सु धार॒याऽना॑मि क्ष॒त्रम॒जरं॑ सु॒वीर्य॑म् ।
व॒यं ज॑येम श॒तिनं॑ सह॒स्रिणं॒ वैश्वा॑नर॒ वाज॑मग्ने॒ तवो॒तिभि॑:
ada̍bdhebhi̱stava̍ go̱pābhi̍riṣṭe̱ 'smāka̍ṃ pāhi triṣadhastha sū̱rīn |
rakṣā̍ ca no da̱duṣā̱ṃ śardho̍ agne̱ vaiśvā̍nara̱ pra ca̍ tārī̱: stavā̍naḥ
||7||अद॑ब्धेभि॒स्तव॑ गो॒पाभि॑रिष्टे॒ ऽस्माकं॑ पाहि त्रिषधस्थ सू॒रीन् ।
रक्षा॑ च नो द॒दुषां॒ शर्धो॑ अग्ने॒ वैश्वा॑नर॒ प्र च॑ तारी॒: स्तवा॑नः