Study
- Anukramaṇī
- Source
5 suhotro bhāradvāja: | indra: | triṣṭup |
apū̍rvyā puru̱tamā̍nyasmai ma̱he vī̱rāya̍ ta̱vase̍ tu̱rāya̍ |
vi̱ra̱pśine̍ va̱jriṇe̱ śaṃta̍māni̱ vacā̍ṃsyā̱sā sthavi̍rāya takṣam
||1||अपू॑र्व्या पुरु॒तमा॑न्यस्मै म॒हे वी॒राय॑ त॒वसे॑ तु॒राय॑ ।
वि॒र॒प्शिने॑ व॒ज्रिणे॒ शंत॑मानि॒ वचां॑स्या॒सा स्थवि॑राय तक्षम्
sa mā̱tarā̱ sūrye̍ṇā kavī̱nāmavā̍sayadru̱jadadri̍ṃ gṛṇā̱naḥ |
svā̱dhībhi̱ṝkva̍bhirvāvaśā̱na udu̱sriyā̍ṇāmasṛjanni̱dāna̍m
||2||स मा॒तरा॒ सूर्ये॑णा कवी॒नामवा॑सयद्रु॒जदद्रिं॑ गृणा॒नः ।
स्वा॒धीभि॒ॠक्व॑भिर्वावशा॒न उदु॒स्रिया॑णामसृजन्नि॒दान॑म्
sa vahni̍bhi̱ṝkva̍bhi̱rgoṣu̱ śaśva̍nmi̱tajñu̍bhiḥ puru̱kṛtvā̍ jigāya |
pura̍: puro̱hā sakhi̍bhiḥ sakhī̱yandṛ̱l̤hā ru̍roja ka̱vibhi̍: ka̱viḥ san
||3||स वह्नि॑भि॒ॠक्व॑भि॒र्गोषु॒ शश्व॑न्मि॒तज्ञु॑भिः पुरु॒कृत्वा॑ जिगाय ।
पुर॑: पुरो॒हा सखि॑भिः सखी॒यन्दृ॒ळ्हा रु॑रोज क॒विभि॑: क॒विः सन्
sa nī̱vyā̍bhirjari̱tāra̱macchā̍ ma̱ho vāje̍bhirma̱hadbhi̍śca̱ śuṣmai̍: |
pu̱ru̱vīrā̍bhirvṛṣabha kṣitī̱nāmā gi̍rvaṇaḥ suvi̱tāya̱ pra yā̍hi
||4||स नी॒व्या॑भिर्जरि॒तार॒मच्छा॑ म॒हो वाजे॑भिर्म॒हद्भि॑श्च॒ शुष्मै॑: ।
पु॒रु॒वीरा॑भिर्वृषभ क्षिती॒नामा गि॑र्वणः सुवि॒ताय॒ प्र या॑हि
sa sarge̍ṇa̱ śava̍sā ta̱kto atyai̍ra̱pa indro̍ dakṣiṇa̱tastu̍rā̱ṣāṭ |
i̱tthā sṛ̍jā̱nā ana̍pāvṛ̱dartha̍ṃ di̱vedi̍ve viviṣurapramṛ̱ṣyam
||5||स सर्गे॑ण॒ शव॑सा त॒क्तो अत्यै॑र॒प इन्द्रो॑ दक्षिण॒तस्तु॑रा॒षाट् ।
इ॒त्था सृ॑जा॒ना अन॑पावृ॒दर्थं॑ दि॒वेदि॑वे विविषुरप्रमृ॒ष्यम्