Study
- Anukramaṇī
- Source
15 bārhaspatyo bharadvāja: | indra: |triṣṭup |
tamu̍ ṣṭuhi̱ yo a̱bhibhū̍tyojā va̱nvannavā̍taḥ puruhū̱ta indra̍: |
aṣā̍l̤hamu̱graṃ saha̍mānamā̱bhirgī̱rbhirva̍rdha vṛṣa̱bhaṃ ca̍rṣaṇī̱nām
||1||तमु॑ ष्टुहि॒ यो अ॒भिभू॑त्योजा व॒न्वन्नवा॑तः पुरुहू॒त इन्द्र॑: ।
अषा॑ळ्हमु॒ग्रं सह॑मानमा॒भिर्गी॒र्भिर्व॑र्ध वृष॒भं च॑र्षणी॒नाम्
sa yu̱dhmaḥ satvā̍ khaja̱kṛt sa̱madvā̍ tuvimra̱kṣo na̍danu̱mām̐ ṛ̍jī̱ṣī |
bṛ̱hadre̍ṇu̱ścyava̍no̱ mānu̍ṣīṇā̱meka̍: kṛṣṭī̱nāma̍bhavat sa̱hāvā̍
||2||स यु॒ध्मः सत्वा॑ खज॒कृत् स॒मद्वा॑ तुविम्र॒क्षो न॑दनु॒माँ ऋ॑जी॒षी ।
बृ॒हद्रे॑णु॒श्च्यव॑नो॒ मानु॑षीणा॒मेक॑: कृष्टी॒नाम॑भवत् स॒हावा॑
tvaṃ ha̱ nu tyada̍damāyo̱ dasyū̱m̐reka̍: kṛ̱ṣṭīra̍vano̱rāryā̍ya |
asti̍ svi̱nnu vī̱ryaṃ1 tat ta̍ indra̱ na svi̍dasti̱ tadṛ̍tu̱thā vi vo̍caḥ
||3||त्वं ह॒ नु त्यद॑दमायो॒ दस्यूँ॒रेक॑: कृ॒ष्टीर॑वनो॒रार्या॑य ।
अस्ति॑ स्वि॒न्नु वी॒र्यं१ तत् त॑ इन्द्र॒ न स्वि॑दस्ति॒ तदृ॑तु॒था वि वो॑चः
sadiddhi te̍ tuvijā̱tasya̱ manye̱ saha̍: sahiṣṭha tura̱tastu̱rasya̍ |
u̱gramu̱grasya̍ ta̱vasa̱stavī̱yo 'ra̍dhrasya radhra̱turo̍ babhūva
||4||सदिद्धि ते॑ तुविजा॒तस्य॒ मन्ये॒ सह॑: सहिष्ठ तुर॒तस्तु॒रस्य॑ ।
उ॒ग्रमु॒ग्रस्य॑ त॒वस॒स्तवी॒यो ऽर॑ध्रस्य रध्र॒तुरो॑ बभूव
tanna̍: pra̱tnaṃ sa̱khyama̍stu yu̱ṣme i̱tthā vada̍dbhirva̱lamaṅgi̍robhiḥ |
hanna̍cyutacyud dasme̱ṣaya̍ntamṛ̱ṇoḥ puro̱ vi duro̍ asya̱ viśvā̍:
||5||तन्न॑: प्र॒त्नं स॒ख्यम॑स्तु यु॒ष्मे इ॒त्था वद॑द्भिर्व॒लमङ्गि॑रोभिः ।
हन्न॑च्युतच्युद् दस्मे॒षय॑न्तमृ॒णोः पुरो॒ वि दुरो॑ अस्य॒ विश्वा॑:
sa hi dhī̱bhirhavyo̱ astyu̱gra ī̍śāna̱kṛnma̍ha̱ti vṛ̍tra̱tūrye̍ |
sa to̱kasā̍tā̱ tana̍ye̱ sa va̱jrī vi̍tanta̱sāyyo̍ abhavat sa̱matsu̍
||6||स हि धी॒भिर्हव्यो॒ अस्त्यु॒ग्र ई॑शान॒कृन्म॑ह॒ति वृ॑त्र॒तूर्ये॑ ।
स तो॒कसा॑ता॒ तन॑ये॒ स व॒ज्री वि॑तन्त॒साय्यो॑ अभवत् स॒मत्सु॑
sa ma̱jmanā̱ jani̍ma̱ mānu̍ṣāṇā̱mama̍rtyena̱ nāmnāti̱ pra sa̍rsre |
sa dyu̱mnena̱ sa śava̍so̱ta rā̱yā sa vī̱rye̍ṇa̱ nṛta̍ma̱: samo̍kāḥ
||7||स म॒ज्मना॒ जनि॑म॒ मानु॑षाणा॒मम॑र्त्येन॒ नाम्नाति॒ प्र स॑र्स्रे ।
स द्यु॒म्नेन॒ स शव॑सो॒त रा॒या स वी॒र्ये॑ण॒ नृत॑म॒: समो॑काः
sa yo na mu̱he na mithū̱ jano̱ bhūt sumantu̍nāmā̱ cumu̍ri̱ṃ dhuni̍ṃ ca |
vṛ̱ṇak pipru̱ṃ śamba̍ra̱ṃ śuṣṇa̱mindra̍: pu̱rāṃ cyau̱tnāya̍ śa̱yathā̍ya̱ nū ci̍t
||8||स यो न मु॒हे न मिथू॒ जनो॒ भूत् सुमन्तु॑नामा॒ चुमु॑रिं॒ धुनिं॑ च ।
वृ॒णक् पिप्रुं॒ शम्ब॑रं॒ शुष्ण॒मिन्द्र॑: पु॒रां च्यौ॒त्नाय॑ श॒यथा॑य॒ नू चि॑त्
u̱dāva̍tā̱ tvakṣa̍sā̱ panya̍sā ca vṛtra̱hatyā̍ya̱ ratha̍mindra tiṣṭha |
dhi̱ṣva vajra̱ṃ hasta̱ ā da̍kṣiṇa̱trā 'bhi pra ma̍nda purudatra mā̱yāḥ
||9||उ॒दाव॑ता॒ त्वक्ष॑सा॒ पन्य॑सा च वृत्र॒हत्या॑य॒ रथ॑मिन्द्र तिष्ठ ।
धि॒ष्व वज्रं॒ हस्त॒ आ द॑क्षिण॒त्रा ऽभि प्र म॑न्द पुरुदत्र मा॒याः
a̱gnirna śuṣka̱ṃ vana̍mindra he̱tī rakṣo̱ ni dha̍kṣya̱śani̱rna bhī̱mā |
ga̱mbhī̱raya̍ ṛ̱ṣvayā̱ yo ru̱rojādhvā̍nayad duri̱tā da̱mbhaya̍cca
||10||अ॒ग्निर्न शुष्कं॒ वन॑मिन्द्र हे॒ती रक्षो॒ नि ध॑क्ष्य॒शनि॒र्न भी॒मा ।
ग॒म्भी॒रय॑ ऋ॒ष्वया॒ यो रु॒रोजाध्वा॑नयद् दुरि॒ता द॒म्भय॑च्च
ā sa̱hasra̍ṃ pa̱thibhi̍rindra rā̱yā tuvi̍dyumna tuvi̱vāje̍bhira̱rvāk |
yā̱hi sū̍no sahaso̱ yasya̱ nū ci̱dade̍va̱ īśe̍ puruhūta̱ yoto̍:
||11||आ स॒हस्रं॑ प॒थिभि॑रिन्द्र रा॒या तुवि॑द्युम्न तुवि॒वाजे॑भिर॒र्वाक् ।
या॒हि सू॑नो सहसो॒ यस्य॒ नू चि॒ददे॑व॒ ईशे॑ पुरुहूत॒ योतो॑:
pra tu̍vidyu̱mnasya̱ sthavi̍rasya̱ ghṛṣve̍rdi̱vo ra̍rapśe mahi̱mā pṛ̍thi̱vyāḥ |
nāsya̱ śatru̱rna pra̍ti̱māna̍masti̱ na pra̍ti̱ṣṭhiḥ pu̍rumā̱yasya̱ sahyo̍:
||12||प्र तु॑विद्यु॒म्नस्य॒ स्थवि॑रस्य॒ घृष्वे॑र्दि॒वो र॑रप्शे महि॒मा पृ॑थि॒व्याः ।
नास्य॒ शत्रु॒र्न प्र॑ति॒मान॑मस्ति॒ न प्र॑ति॒ष्ठिः पु॑रुमा॒यस्य॒ सह्यो॑:
pra tat te a̱dyā kara̍ṇaṃ kṛ̱taṃ bhū̱t kutsa̱ṃ yadā̱yuma̍tithi̱gvama̍smai |
pu̱rū sa̱hasrā̱ ni śi̍śā a̱bhi kṣāmut tūrva̍yāṇaṃ dhṛṣa̱tā ni̍netha
||13||प्र तत् ते अ॒द्या कर॑णं कृ॒तं भू॒त् कुत्सं॒ यदा॒युम॑तिथि॒ग्वम॑स्मै ।
पु॒रू स॒हस्रा॒ नि शि॑शा अ॒भि क्षामुत् तूर्व॑याणं धृष॒ता नि॑नेथ
anu̱ tvāhi̍ghne̱ adha̍ deva de̱vā mada̱n viśve̍ ka̱vita̍maṃ kavī̱nām |
karo̱ yatra̱ vari̍vo bādhi̱tāya̍ di̱ve janā̍ya ta̱nve̍ gṛṇā̱naḥ
||14||अनु॒ त्वाहि॑घ्ने॒ अध॑ देव दे॒वा मद॒न् विश्वे॑ क॒वित॑मं कवी॒नाम् ।
करो॒ यत्र॒ वरि॑वो बाधि॒ताय॑ दि॒वे जना॑य त॒न्वे॑ गृणा॒नः
anu̱ dyāvā̍pṛthi̱vī tat ta̱ ojo 'ma̍rtyā jihata indra de̱vāḥ |
kṛ̱ṣvā kṛ̍tno̱ akṛ̍ta̱ṃ yat te̱ astyu̱kthaṃ navī̍yo janayasva ya̱jñaiḥ
||15||अनु॒ द्यावा॑पृथि॒वी तत् त॒ ओजो ऽम॑र्त्या जिहत इन्द्र दे॒वाः ।
कृ॒ष्वा कृ॑त्नो॒ अकृ॑तं॒ यत् ते॒ अस्त्यु॒क्थं नवी॑यो जनयस्व य॒ज्ञैः