Study
- Anukramaṇī
- Source
7 bārhaspatyo bharadvāja: | agni : | triṣṭup ; 7 dvipadā virāṭ |
pu̱ro vo̍ ma̱ndraṃ di̱vyaṃ su̍vṛ̱ktiṃ pra̍ya̱ti ya̱jñe a̱gnima̍dhva̱re da̍dhidhvam |
pu̱ra u̱kthebhi̱: sa hi no̍ vi̱bhāvā̍ svadhva̱rā ka̍rati jā̱tave̍dāḥ
||1||पु॒रो वो॑ म॒न्द्रं दि॒व्यं सु॑वृ॒क्तिं प्र॑य॒ति य॒ज्ञे अ॒ग्निम॑ध्व॒रे द॑धिध्वम् ।
पु॒र उ॒क्थेभि॒: स हि नो॑ वि॒भावा॑ स्वध्व॒रा क॑रति जा॒तवे॑दाः
tamu̍ dyumaḥ purvaṇīka hota̱ragne̍ a̱gnibhi̱rmanu̍ṣa idhā̱naḥ |
stoma̱ṃ yama̍smai ma̱mate̍va śū̱ṣaṃ ghṛ̱taṃ na śuci̍ ma̱taya̍: pavante
||2||तमु॑ द्युमः पुर्वणीक होत॒रग्ने॑ अ॒ग्निभि॒र्मनु॑ष इधा॒नः ।
स्तोमं॒ यम॑स्मै म॒मते॑व शू॒षं घृ॒तं न शुचि॑ म॒तय॑: पवन्ते
pī̱pāya̱ sa śrava̍sā̱ martye̍ṣu̱ yo a̱gnaye̍ da̱dāśa̱ vipra̍ u̱kthaiḥ |
ci̱trābhi̱stamū̱tibhi̍ści̱traśo̍cirvra̱jasya̍ sā̱tā goma̍to dadhāti
||3||पी॒पाय॒ स श्रव॑सा॒ मर्त्ये॑षु॒ यो अ॒ग्नये॑ द॒दाश॒ विप्र॑ उ॒क्थैः ।
चि॒त्राभि॒स्तमू॒तिभि॑श्चि॒त्रशो॑चिर्व्र॒जस्य॑ सा॒ता गोम॑तो दधाति
ā yaḥ pa̱prau jāya̍māna u̱rvī dū̍re̱dṛśā̍ bhā̱sā kṛ̱ṣṇādhvā̍ |
adha̍ ba̱hu ci̱t tama̱ ūrmyā̍yāsti̱raḥ śo̱ciṣā̍ dadṛśe pāva̱kaḥ
||4||आ यः प॒प्रौ जाय॑मान उ॒र्वी दू॑रे॒दृशा॑ भा॒सा कृ॒ष्णाध्वा॑ ।
अध॑ ब॒हु चि॒त् तम॒ ऊर्म्या॑यास्ति॒रः शो॒चिषा॑ ददृशे पाव॒कः
nū na̍ści̱traṃ pu̍ru̱vājā̍bhirū̱tī agne̍ ra̱yiṃ ma̱ghava̍dbhyaśca dhehi |
ye rādha̍sā̱ śrava̍sā̱ cātya̱nyān tsu̱vīrye̍bhiścā̱bhi santi̱ janā̍n
||5||नू न॑श्चि॒त्रं पु॑रु॒वाजा॑भिरू॒ती अग्ने॑ र॒यिं म॒घव॑द्भ्यश्च धेहि ।
ये राध॑सा॒ श्रव॑सा॒ चात्य॒न्यान् त्सु॒वीर्ये॑भिश्चा॒भि सन्ति॒ जना॑न्
i̱maṃ ya̱jñaṃ cano̍ dhā agna u̱śan yaṃ ta̍ āsā̱no ju̍hu̱te ha̱viṣmā̍n |
bha̱radvā̍jeṣu dadhiṣe suvṛ̱ktimavī̱rvāja̍sya̱ gadhya̍sya sā̱tau
||6||इ॒मं य॒ज्ञं चनो॑ धा अग्न उ॒शन् यं त॑ आसा॒नो जु॑हु॒ते ह॒विष्मा॑न् ।
भ॒रद्वा॑जेषु दधिषे सुवृ॒क्तिमवी॒र्वाज॑स्य॒ गध्य॑स्य सा॒तौ
vi dveṣā̍ṃsīnu̱hi va̱rdhayel̤ā̱ṃ made̍ma śa̱tahi̍māḥ su̱vīrā̍:
||7||वि द्वेषां॑सीनु॒हि व॒र्धयेळां॒ मदे॑म श॒तहि॑माः सु॒वीरा॑: