Study
- Anukramaṇī
- Source
5 naro bhāradvāja:| indra: | triṣṭup |
ka̱dā bhu̍va̱nratha̍kṣayāṇi̱ brahma̍ ka̱dā sto̱tre sa̍hasrapo̱ṣya̍ṃ dāḥ |
ka̱dā stoma̍ṃ vāsayo'sya rā̱yā ka̱dā dhiya̍: karasi̱ vāja̍ratnāḥ
||1||क॒दा भु॑व॒न्रथ॑क्षयाणि॒ ब्रह्म॑ क॒दा स्तो॒त्रे स॑हस्रपो॒ष्यं॑ दाः ।
क॒दा स्तोमं॑ वासयोऽस्य रा॒या क॒दा धिय॑: करसि॒ वाज॑रत्नाः
karhi̍ svi̱ttadi̍ndra̱ yannṛbhi̱rnṝnvī̱rairvī̱rānnī̱l̤ayā̍se̱ jayā̱jīn |
tri̱dhātu̱ gā adhi̍ jayāsi̱ goṣvindra̍ dyu̱mnaṃ sva̍rvaddhehya̱sme
||2||कर्हि॑ स्वि॒त्तदि॑न्द्र॒ यन्नृभि॒र्नॄन्वी॒रैर्वी॒रान्नी॒ळया॑से॒ जया॒जीन् ।
त्रि॒धातु॒ गा अधि॑ जयासि॒ गोष्विन्द्र॑ द्यु॒म्नं स्व॑र्वद्धेह्य॒स्मे
karhi̍ svi̱ttadi̍ndra̱ yajja̍ri̱tre vi̱śvapsu̱ brahma̍ kṛ̱ṇava̍: śaviṣṭha |
ka̱dā dhiyo̱ na ni̱yuto̍ yuvāse ka̱dā goma̍ghā̱ hava̍nāni gacchāḥ
||3||कर्हि॑ स्वि॒त्तदि॑न्द्र॒ यज्ज॑रि॒त्रे वि॒श्वप्सु॒ ब्रह्म॑ कृ॒णव॑: शविष्ठ ।
क॒दा धियो॒ न नि॒युतो॑ युवासे क॒दा गोम॑घा॒ हव॑नानि गच्छाः
sa goma̍ghā jari̱tre aśva̍ścandrā̱ vāja̍śravaso̱ adhi̍ dhehi̱ pṛkṣa̍: |
pī̱pi̱hīṣa̍: su̱dughā̍mindra dhe̱nuṃ bha̱radvā̍jeṣu su̱ruco̍ rurucyāḥ
||4||स गोम॑घा जरि॒त्रे अश्व॑श्चन्द्रा॒ वाज॑श्रवसो॒ अधि॑ धेहि॒ पृक्ष॑: ।
पी॒पि॒हीष॑: सु॒दुघा॑मिन्द्र धे॒नुं भ॒रद्वा॑जेषु सु॒रुचो॑ रुरुच्याः
tamā nū̱naṃ vṛ̱jana̍ma̱nyathā̍ ci̱cchūro̱ yaccha̍kra̱ vi duro̍ gṛṇī̱ṣe |
mā nira̍raṃ śukra̱dugha̍sya dhe̱norā̍ṅgira̱sānbrahma̍ṇā vipra jinva
||5||तमा नू॒नं वृ॒जन॑म॒न्यथा॑ चि॒च्छूरो॒ यच्छ॑क्र॒ वि दुरो॑ गृणी॒षे ।
मा निर॑रं शुक्र॒दुघ॑स्य धे॒नोरा॑ङ्गिर॒सान्ब्रह्म॑णा विप्र जिन्व