Study
- Anukramaṇī
- Source
5 śunahotro bhāradvāja: | indra: | triṣṭup |
ya oji̍ṣṭha indra̱ taṃ su no̍ dā̱ mado̍ vṛṣantsvabhi̱ṣṭirdāsvā̍n |
sauva̍śvya̱ṃ yo va̱nava̱tsvaśvo̍ vṛ̱trā sa̱matsu̍ sā̱saha̍da̱mitrā̍n
||1||य ओजि॑ष्ठ इन्द्र॒ तं सु नो॑ दा॒ मदो॑ वृषन्त्स्वभि॒ष्टिर्दास्वा॑न् ।
सौव॑श्व्यं॒ यो व॒नव॒त्स्वश्वो॑ वृ॒त्रा स॒मत्सु॑ सा॒सह॑द॒मित्रा॑न्
tvāṃ hī̱3ndrāva̍se̱ vivā̍co̱ hava̍nte carṣa̱ṇaya̱: śūra̍sātau |
tvaṃ vipre̍bhi̱rvi pa̱ṇīm̐ra̍śāya̱stvota̱ itsani̍tā̱ vāja̱marvā̍
||2||त्वां ही॒३न्द्राव॑से॒ विवा॑चो॒ हव॑न्ते चर्ष॒णय॒: शूर॑सातौ ।
त्वं विप्रे॑भि॒र्वि प॒णीँर॑शाय॒स्त्वोत॒ इत्सनि॑ता॒ वाज॒मर्वा॑
tvaṃ tām̐ i̍ndro̱bhayā̍m̐ a̱mitrā̱ndāsā̍ vṛ̱trāṇyāryā̍ ca śūra |
vadhī̱rvane̍va̱ sudhi̍tebhi̱ratkai̱rā pṛ̱tsu da̍rṣi nṛ̱ṇāṃ nṛ̍tama
||3||त्वं ताँ इ॑न्द्रो॒भयाँ॑ अ॒मित्रा॒न्दासा॑ वृ॒त्राण्यार्या॑ च शूर ।
वधी॒र्वने॑व॒ सुधि॑तेभि॒रत्कै॒रा पृ॒त्सु द॑र्षि नृ॒णां नृ॑तम
sa tvaṃ na̍ i̱ndrāka̍vābhirū̱tī sakhā̍ vi̱śvāyu̍ravi̱tā vṛ̱dhe bhū̍: |
sva̍rṣātā̱ yaddhvayā̍masi tvā̱ yudhya̍nto ne̱madhi̍tā pṛ̱tsu śū̍ra
||4||स त्वं न॑ इ॒न्द्राक॑वाभिरू॒ती सखा॑ वि॒श्वायु॑रवि॒ता वृ॒धे भू॑: ।
स्व॑र्षाता॒ यद्ध्वया॑मसि त्वा॒ युध्य॑न्तो ने॒मधि॑ता पृ॒त्सु शू॑र
nū̱naṃ na̍ indrāpa̱rāya̍ ca syā̱ bhavā̍ mṛl̤ī̱ka u̱ta no̍ a̱bhiṣṭau̍ |
i̱tthā gṛ̱ṇanto̍ ma̱hina̍sya̱ śarma̍ndi̱vi ṣyā̍ma̱ pārye̍ go̱ṣata̍māḥ
||5||नू॒नं न॑ इन्द्राप॒राय॑ च स्या॒ भवा॑ मृळी॒क उ॒त नो॑ अ॒भिष्टौ॑ ।
इ॒त्था गृ॒णन्तो॑ म॒हिन॑स्य॒ शर्म॑न्दि॒वि ष्या॑म॒ पार्ये॑ गो॒षत॑माः