Study
- Anukramaṇī
- Source
24 śaṃyurbārhaspatya:| indra: | triṣṭup ,1- 6 anuṣṭup , 7- 9 [ 8 vā ] virāṭ |
yo ra̍yivo ra̱yiṃta̍mo̱ yo dyu̱mnairdyu̱mnava̍ttamaḥ | soma̍: su̱taḥ sa i̍ndra̱ te'sti̍ svadhāpate̱ mada̍:
||1||यो र॑यिवो र॒यिंत॑मो॒ यो द्यु॒म्नैर्द्यु॒म्नव॑त्तमः । सोम॑: सु॒तः स इ॑न्द्र॒ तेऽस्ति॑ स्वधापते॒ मद॑:
yaḥ śa̱gmastu̍viśagma te rā̱yo dā̱mā ma̍tī̱nām | soma̍: su̱taḥ sa i̍ndra̱ te'sti̍ svadhāpate̱ mada̍:
||2||यः श॒ग्मस्तु॑विशग्म ते रा॒यो दा॒मा म॑ती॒नाम् । सोम॑: सु॒तः स इ॑न्द्र॒ तेऽस्ति॑ स्वधापते॒ मद॑:
yena̍ vṛ̱ddho na śava̍sā tu̱ro na svābhi̍rū̱tibhi̍: | soma̍: su̱taḥ sa i̍ndra̱ te'sti̍ svadhāpate̱ mada̍:
||3||येन॑ वृ॒द्धो न शव॑सा तु॒रो न स्वाभि॑रू॒तिभि॑: । सोम॑: सु॒तः स इ॑न्द्र॒ तेऽस्ति॑ स्वधापते॒ मद॑:
tyamu̍ vo̱ apra̍haṇaṃ gṛṇī̱ṣe śava̍sa̱spati̍m | indra̍ṃ viśvā̱sāha̱ṃ nara̱ṃ maṃhi̍ṣṭhaṃ vi̱śvaca̍rṣaṇim
||4||त्यमु॑ वो॒ अप्र॑हणं गृणी॒षे शव॑स॒स्पति॑म् । इन्द्रं॑ विश्वा॒साहं॒ नरं॒ मंहि॑ष्ठं वि॒श्वच॑र्षणिम्
yaṃ va̱rdhaya̱ntīdgira̱: pati̍ṃ tu̱rasya̱ rādha̍saḥ | taminnva̍sya̱ roda̍sī de̱vī śuṣma̍ṃ saparyataḥ
||5||यं व॒र्धय॒न्तीद्गिर॒: पतिं॑ तु॒रस्य॒ राध॑सः । तमिन्न्व॑स्य॒ रोद॑सी दे॒वी शुष्मं॑ सपर्यतः
tadva̍ u̱kthasya̍ ba̱rhaṇendrā̍yopastṛṇī̱ṣaṇi̍ | vipo̱ na yasyo̱tayo̱ vi yadroha̍nti sa̱kṣita̍:
||6||तद्व॑ उ॒क्थस्य॑ ब॒र्हणेन्द्रा॑योपस्तृणी॒षणि॑ । विपो॒ न यस्यो॒तयो॒ वि यद्रोह॑न्ति स॒क्षित॑:
avi̍da̱ddakṣa̍ṃ mi̱tro navī̍yānpapā̱no de̱vebhyo̱ vasyo̍ acait |
sa̱sa̱vāntstau̱lābhi̍rdhau̱tarī̍bhiruru̱ṣyā pā̱yura̍bhava̱tsakhi̍bhyaḥ
||7||अवि॑द॒द्दक्षं॑ मि॒त्रो नवी॑यान्पपा॒नो दे॒वेभ्यो॒ वस्यो॑ अचैत् ।
स॒स॒वान्त्स्तौ॒लाभि॑र्धौ॒तरी॑भिरुरु॒ष्या पा॒युर॑भव॒त्सखि॑भ्यः
ṛ̱tasya̍ pa̱thi ve̱dhā a̍pāyi śri̱ye manā̍ṃsi de̱vāso̍ akran |
dadhā̍no̱ nāma̍ ma̱ho vaco̍bhi̱rvapu̍rdṛ̱śaye̍ ve̱nyo vyā̍vaḥ
||8||ऋ॒तस्य॑ प॒थि वे॒धा अ॑पायि श्रि॒ये मनां॑सि दे॒वासो॑ अक्रन् ।
दधा॑नो॒ नाम॑ म॒हो वचो॑भि॒र्वपु॑र्दृ॒शये॑ वे॒न्यो व्या॑वः
dyu̱matta̍ma̱ṃ dakṣa̍ṃ dhehya̱sme sedhā̱ janā̍nāṃ pū̱rvīrarā̍tīḥ |
varṣī̍yo̱ vaya̍: kṛṇuhi̱ śacī̍bhi̱rdhana̍sya sā̱tāva̱smām̐ a̍viḍḍhi
||9||द्यु॒मत्त॑मं॒ दक्षं॑ धेह्य॒स्मे सेधा॒ जना॑नां पू॒र्वीररा॑तीः ।
वर्षी॑यो॒ वय॑: कृणुहि॒ शची॑भि॒र्धन॑स्य सा॒ताव॒स्माँ अ॑विड्ढि
indra̱ tubhya̱minma̍ghavannabhūma va̱yaṃ dā̱tre ha̍rivo̱ mā vi ve̍naḥ |
naki̍rā̱pirda̍dṛśe martya̱trā kima̱ṅga ra̍dhra̱coda̍naṃ tvāhuḥ
||10||इन्द्र॒ तुभ्य॒मिन्म॑घवन्नभूम व॒यं दा॒त्रे ह॑रिवो॒ मा वि वे॑नः ।
नकि॑रा॒पिर्द॑दृशे मर्त्य॒त्रा किम॒ङ्ग र॑ध्र॒चोद॑नं त्वाहुः
mā jasva̍ne vṛṣabha no rarīthā̱ mā te̍ re̱vata̍: sa̱khye ri̍ṣāma |
pū̱rvīṣṭa̍ indra ni̱ṣṣidho̱ jane̍ṣu ja̱hyasu̍ṣvī̱npra vṛ̱hāpṛ̍ṇataḥ
||11||मा जस्व॑ने वृषभ नो ररीथा॒ मा ते॑ रे॒वत॑: स॒ख्ये रि॑षाम ।
पू॒र्वीष्ट॑ इन्द्र नि॒ष्षिधो॒ जने॑षु ज॒ह्यसु॑ष्वी॒न्प्र वृ॒हापृ॑णतः
uda̱bhrāṇī̍va sta̱naya̍nniya̱rtīndro̱ rādhā̱ṃsyaśvyā̍ni̱ gavyā̍ |
tvama̍si pra̱diva̍: kā̱rudhā̍yā̱ mā tvā̍dā̱māna̱ ā da̍bhanma̱ghona̍:
||12||उद॒भ्राणी॑व स्त॒नय॑न्निय॒र्तीन्द्रो॒ राधां॒स्यश्व्या॑नि॒ गव्या॑ ।
त्वम॑सि प्र॒दिव॑: का॒रुधा॑या॒ मा त्वा॑दा॒मान॒ आ द॑भन्म॒घोन॑:
adhva̍ryo vīra̱ pra ma̱he su̱tānā̱mindrā̍ya bhara̱ sa hya̍sya̱ rājā̍ |
yaḥ pū̱rvyābhi̍ru̱ta nūta̍nābhirgī̱rbhirvā̍vṛ̱dhe gṛ̍ṇa̱tāmṛṣī̍ṇām
||13||अध्व॑र्यो वीर॒ प्र म॒हे सु॒ताना॒मिन्द्रा॑य भर॒ स ह्य॑स्य॒ राजा॑ ।
यः पू॒र्व्याभि॑रु॒त नूत॑नाभिर्गी॒र्भिर्वा॑वृ॒धे गृ॑ण॒तामृषी॑णाम्
a̱sya made̍ pu̱ru varpā̍ṃsi vi̱dvānindro̍ vṛ̱trāṇya̍pra̱tī ja̍ghāna |
tamu̱ pra ho̍ṣi̱ madhu̍mantamasmai̱ soma̍ṃ vī̱rāya̍ śi̱priṇe̱ piba̍dhyai
||14||अ॒स्य मदे॑ पु॒रु वर्पां॑सि वि॒द्वानिन्द्रो॑ वृ॒त्राण्य॑प्र॒ती ज॑घान ।
तमु॒ प्र हो॑षि॒ मधु॑मन्तमस्मै॒ सोमं॑ वी॒राय॑ शि॒प्रिणे॒ पिब॑ध्यै
pātā̍ su̱tamindro̍ astu̱ soma̱ṃ hantā̍ vṛ̱traṃ vajre̍ṇa mandasā̱naḥ |
gantā̍ ya̱jñaṃ pa̍rā̱vata̍ści̱dacchā̱ vasu̍rdhī̱nāma̍vi̱tā kā̱rudhā̍yāḥ
||15||पाता॑ सु॒तमिन्द्रो॑ अस्तु॒ सोमं॒ हन्ता॑ वृ॒त्रं वज्रे॑ण मन्दसा॒नः ।
गन्ता॑ य॒ज्ञं प॑रा॒वत॑श्चि॒दच्छा॒ वसु॑र्धी॒नाम॑वि॒ता का॒रुधा॑याः
i̱daṃ tyatpātra̍mindra̱pāna̱mindra̍sya pri̱yama̱mṛta̍mapāyi |
matsa̱dyathā̍ saumana̱sāya̍ de̱vaṃ vya1smaddveṣo̍ yu̱yava̱dvyaṃha̍:
||16||इ॒दं त्यत्पात्र॑मिन्द्र॒पान॒मिन्द्र॑स्य प्रि॒यम॒मृत॑मपायि ।
मत्स॒द्यथा॑ सौमन॒साय॑ दे॒वं व्य१स्मद्द्वेषो॑ यु॒यव॒द्व्यंह॑:
e̱nā ma̍ndā̱no ja̱hi śū̍ra̱ śatrū̍ñjā̱mimajā̍miṃ maghavanna̱mitrā̍n |
a̱bhi̱ṣe̱ṇām̐ a̱bhyā̱3dedi̍śānā̱nparā̍ca indra̱ pra mṛ̍ṇā ja̱hī ca̍
||17||ए॒ना म॑न्दा॒नो ज॒हि शू॑र॒ शत्रू॑ञ्जा॒मिमजा॑मिं मघवन्न॒मित्रा॑न् ।
अ॒भि॒षे॒णाँ अ॒भ्या॒३देदि॑शाना॒न्परा॑च इन्द्र॒ प्र मृ॑णा ज॒ही च॑
ā̱su ṣmā̍ ṇo maghavannindra pṛ̱tsva1smabhya̱ṃ mahi̱ vari̍vaḥ su̱gaṃ ka̍: |
a̱pāṃ to̱kasya̱ tana̍yasya je̱ṣa indra̍ sū̱rīnkṛ̍ṇu̱hi smā̍ no a̱rdham
||18||आ॒सु ष्मा॑ णो मघवन्निन्द्र पृ॒त्स्व१स्मभ्यं॒ महि॒ वरि॑वः सु॒गं क॑: ।
अ॒पां तो॒कस्य॒ तन॑यस्य जे॒ष इन्द्र॑ सू॒रीन्कृ॑णु॒हि स्मा॑ नो अ॒र्धम्
ā tvā̱ hara̍yo̱ vṛṣa̍ṇo yujā̱nā vṛṣa̍rathāso̱ vṛṣa̍raśma̱yo'tyā̍: |
a̱sma̱trāñco̱ vṛṣa̍ṇo vajra̱vāho̱ vṛṣṇe̱ madā̍ya su̱yujo̍ vahantu
||19||आ त्वा॒ हर॑यो॒ वृष॑णो युजा॒ना वृष॑रथासो॒ वृष॑रश्म॒योऽत्या॑: ।
अ॒स्म॒त्राञ्चो॒ वृष॑णो वज्र॒वाहो॒ वृष्णे॒ मदा॑य सु॒युजो॑ वहन्तु
ā te̍ vṛṣa̱nvṛṣa̍ṇo̱ droṇa̍masthurghṛta̱pruṣo̱ normayo̱ mada̍ntaḥ |
indra̱ pra tubhya̱ṃ vṛṣa̍bhiḥ su̱tānā̱ṃ vṛṣṇe̍ bharanti vṛṣa̱bhāya̱ soma̍m
||20||आ ते॑ वृष॒न्वृष॑णो॒ द्रोण॑मस्थुर्घृत॒प्रुषो॒ नोर्मयो॒ मद॑न्तः ।
इन्द्र॒ प्र तुभ्यं॒ वृष॑भिः सु॒तानां॒ वृष्णे॑ भरन्ति वृष॒भाय॒ सोम॑म्
vṛṣā̍si di̱vo vṛ̍ṣa̱bhaḥ pṛ̍thi̱vyā vṛṣā̱ sindhū̍nāṃ vṛṣa̱bhaḥ stiyā̍nām |
vṛṣṇe̍ ta̱ indu̍rvṛṣabha pīpāya svā̱dū raso̍ madhu̱peyo̱ varā̍ya
||21||वृषा॑सि दि॒वो वृ॑ष॒भः पृ॑थि॒व्या वृषा॒ सिन्धू॑नां वृष॒भः स्तिया॑नाम् ।
वृष्णे॑ त॒ इन्दु॑र्वृषभ पीपाय स्वा॒दू रसो॑ मधु॒पेयो॒ वरा॑य
a̱yaṃ de̱vaḥ saha̍sā̱ jāya̍māna̱ indre̍ṇa yu̱jā pa̱ṇima̍stabhāyat |
a̱yaṃ svasya̍ pi̱turāyu̍dhā̱nīndu̍ramuṣṇā̱daśi̍vasya mā̱yāḥ
||22||अ॒यं दे॒वः सह॑सा॒ जाय॑मान॒ इन्द्रे॑ण यु॒जा प॒णिम॑स्तभायत् ।
अ॒यं स्वस्य॑ पि॒तुरायु॑धा॒नीन्दु॑रमुष्णा॒दशि॑वस्य मा॒याः
a̱yama̍kṛṇodu̱ṣasa̍: su̱patnī̍ra̱yaṃ sūrye̍ adadhā̱jjyoti̍ra̱ntaḥ |
a̱yaṃ tri̱dhātu̍ di̱vi ro̍ca̱neṣa̱ tri̱teṣu̍ vindada̱mṛta̱ṃ nigū̍l̤ham
||23||अ॒यम॑कृणोदु॒षस॑: सु॒पत्नी॑र॒यं सूर्ये॑ अदधा॒ज्ज्योति॑र॒न्तः ।
अ॒यं त्रि॒धातु॑ दि॒वि रो॑च॒नेष॒॑ त्रि॒तेषु॑ विन्दद॒मृतं॒ निगू॑ळ्हम्
a̱yaṃ dyāvā̍pṛthi̱vī vi ṣka̍bhāyada̱yaṃ ratha̍mayunaksa̱ptara̍śmim |
a̱yaṃ goṣu̱ śacyā̍ pa̱kvama̱ntaḥ somo̍ dādhāra̱ daśa̍yantra̱mutsa̍m
||24||अ॒यं द्यावा॑पृथि॒वी वि ष्क॑भायद॒यं रथ॑मयुनक्स॒प्तर॑श्मिम् ।
अ॒यं गोषु॒ शच्या॑ प॒क्वम॒न्तः सोमो॑ दाधार॒ दश॑यन्त्र॒मुत्स॑म्