Study
- Anukramaṇī
- Source
4 bārhaspatyo bharadvāja: | pūṣā |triṣṭup , 2 jagatī |
śu̱kraṃ te̍ a̱nyadya̍ja̱taṃ te̍ a̱nyadviṣu̍rūpe̱ aha̍nī̱ dyauri̍vāsi |
viśvā̱ hi mā̱yā ava̍si svadhāvo bha̱drā te̍ pūṣanni̱ha rā̱tira̍stu
||1||शु॒क्रं ते॑ अ॒न्यद्य॑ज॒तं ते॑ अ॒न्यद्विषु॑रूपे॒ अह॑नी॒ द्यौरि॑वासि ।
विश्वा॒ हि मा॒या अव॑सि स्वधावो भ॒द्रा ते॑ पूषन्नि॒ह रा॒तिर॑स्तु
a̱jāśva̍: paśu̱pā vāja̍pastyo dhiyaṃji̱nvo bhuva̍ne̱ viśve̱ arpi̍taḥ |
aṣṭrā̍ṃ pū̱ṣā śi̍thi̱rāmu̱dvarī̍vṛjatsa̱ṃcakṣā̍ṇo̱ bhuva̍nā de̱va ī̍yate
||2||अ॒जाश्व॑: पशु॒पा वाज॑पस्त्यो धियंजि॒न्वो भुव॑ने॒ विश्वे॒ अर्पि॑तः ।
अष्ट्रां॑ पू॒षा शि॑थि॒रामु॒द्वरी॑वृजत्सं॒चक्षा॑णो॒ भुव॑ना दे॒व ई॑यते
yāste̍ pūṣa̱nnāvo̍ a̱ntaḥ sa̍mu̱dre hi̍ra̱ṇyayī̍ra̱ntari̍kṣe̱ cara̍nti |
tābhi̍ryāsi dū̱tyāṃ sūrya̍sya̱ kāme̍na kṛta̱ śrava̍ i̱cchamā̍naḥ
||3||यास्ते॑ पूष॒न्नावो॑ अ॒न्तः स॑मु॒द्रे हि॑र॒ण्ययी॑र॒न्तरि॑क्षे॒ चर॑न्ति ।
ताभि॑र्यासि दू॒त्यां सूर्य॑स्य॒ कामे॑न कृत॒ श्रव॑ इ॒च्छमा॑नः
pū̱ṣā su̱bandhu̍rdi̱va ā pṛ̍thi̱vyā i̱l̤aspati̍rma̱ghavā̍ da̱smava̍rcāḥ |
yaṃ de̱vāso̱ ada̍duḥ sū̱ryāyai̱ kāme̍na kṛ̱taṃ ta̱vasa̱ṃ svañca̍m
||4||पू॒षा सु॒बन्धु॑र्दि॒व आ पृ॑थि॒व्या इ॒ळस्पति॑र्म॒घवा॑ द॒स्मव॑र्चाः ।
यं दे॒वासो॒ अद॑दुः सू॒र्यायै॒ कामे॑न कृ॒तं त॒वसं॒ स्वञ्च॑म्