Study
- Anukramaṇī
- Source
5 bārhaspatyo bharadvāja: | indra: | triṣṭup |
a̱rvāgratha̍ṃ vi̱śvavā̍raṃ ta u̱grendra̍ yu̱ktāso̱ hara̍yo vahantu |
kī̱riści̱ddhi tvā̱ hava̍te̱ sva̍rvānṛdhī̱mahi̍ sadha̱māda̍ste a̱dya
||1||अ॒र्वाग्रथं॑ वि॒श्ववा॑रं त उ॒ग्रेन्द्र॑ यु॒क्तासो॒ हर॑यो वहन्तु ।
की॒रिश्चि॒द्धि त्वा॒ हव॑ते॒ स्व॑र्वानृधी॒महि॑ सध॒माद॑स्ते अ॒द्य
pro droṇe̱ hara̍ya̱: karmā̍gmanpunā̱nāsa̱ ṛjya̍nto abhūvan |
indro̍ no a̱sya pū̱rvyaḥ pa̍pīyāddyu̱kṣo mada̍sya so̱myasya̱ rājā̍
||2||प्रो द्रोणे॒ हर॑य॒: कर्मा॑ग्मन्पुना॒नास॒ ऋज्य॑न्तो अभूवन् ।
इन्द्रो॑ नो अ॒स्य पू॒र्व्यः प॑पीयाद्द्यु॒क्षो मद॑स्य सो॒म्यस्य॒ राजा॑
ā̱sa̱srā̱ṇāsa̍: śavasā̱namacchendra̍ṃ suca̱kre ra̱thyā̍so̱ aśvā̍: |
a̱bhi śrava̱ ṛjya̍nto vaheyu̱rnū ci̱nnu vā̱yora̱mṛta̱ṃ vi da̍syet
||3||आ॒स॒स्रा॒णास॑: शवसा॒नमच्छेन्द्रं॑ सुच॒क्रे र॒थ्या॑सो॒ अश्वा॑: ।
अ॒भि श्रव॒ ऋज्य॑न्तो वहेयु॒र्नू चि॒न्नु वा॒योर॒मृतं॒ वि द॑स्येत्
vari̍ṣṭho asya̱ dakṣi̍ṇāmiya̱rtīndro̍ ma̱ghonā̍ṃ tuvikū̱rmita̍maḥ |
yayā̍ vajrivaḥ pari̱yāsyaṃho̍ ma̱ghā ca̍ dhṛṣṇo̱ daya̍se̱ vi sū̱rīn
||4||वरि॑ष्ठो अस्य॒ दक्षि॑णामिय॒र्तीन्द्रो॑ म॒घोनां॑ तुविकू॒र्मित॑मः ।
यया॑ वज्रिवः परि॒यास्यंहो॑ म॒घा च॑ धृष्णो॒ दय॑से॒ वि सू॒रीन्
indro̱ vāja̍sya̱ sthavi̍rasya dā̱tendro̍ gī̱rbhirva̍rdhatāṃ vṛ̱ddhama̍hāḥ |
indro̍ vṛ̱traṃ hani̍ṣṭho astu̱ satvā ''tā sū̱riḥ pṛ̍ṇati̱ tūtu̍jānaḥ
||5||इन्द्रो॒ वाज॑स्य॒ स्थवि॑रस्य दा॒तेन्द्रो॑ गी॒र्भिर्व॑र्धतां वृ॒द्धम॑हाः ।
इन्द्रो॑ वृ॒त्रं हनि॑ष्ठो अस्तु॒ सत्वा ऽऽता सू॒रिः पृ॑णति॒ तूतु॑जानः