Study
- Anukramaṇī
- Source
14 śaṃyurbārhaspatya:| indra: pragātha: [= viṣamā bṛhatī, samā satobṛhatī ] |
tvāmiddhi havā̍mahe sā̱tā vāja̍sya kā̱rava̍: |
tvāṃ vṛ̱treṣvi̍ndra̱ satpa̍ti̱ṃ nara̱stvāṃ kāṣṭhā̱svarva̍taḥ
||1||त्वामिद्धि हवा॑महे सा॒ता वाज॑स्य का॒रव॑: ।
त्वां वृ॒त्रेष्वि॑न्द्र॒ सत्प॑तिं॒ नर॒स्त्वां काष्ठा॒स्वर्व॑तः
sa tvaṃ na̍ścitra vajrahasta dhṛṣṇu̱yā ma̱haḥ sta̍vā̱no a̍drivaḥ |
gāmaśva̍ṃ ra̱thya̍mindra̱ saṃ ki̍ra sa̱trā vāja̱ṃ na ji̱gyuṣe̍
||2||स त्वं न॑श्चित्र वज्रहस्त धृष्णु॒या म॒हः स्त॑वा॒नो अ॑द्रिवः ।
गामश्वं॑ र॒थ्य॑मिन्द्र॒ सं कि॑र स॒त्रा वाजं॒ न जि॒ग्युषे॑
yaḥ sa̍trā̱hā vica̍rṣaṇi̱rindra̱ṃ taṃ hū̍mahe va̱yam |
saha̍sramuṣka̱ tuvi̍nṛmṇa̱ satpa̍te̱ bhavā̍ sa̱matsu̍ no vṛ̱dhe
||3||यः स॑त्रा॒हा विच॑र्षणि॒रिन्द्रं॒ तं हू॑महे व॒यम् ।
सह॑स्रमुष्क॒ तुवि॑नृम्ण॒ सत्प॑ते॒ भवा॑ स॒मत्सु॑ नो वृ॒धे
bādha̍se̱ janā̍nvṛṣa̱bheva̍ ma̱nyunā̱ ghṛṣau̍ mī̱l̤ha ṛ̍cīṣama |
a̱smāka̍ṃ bodhyavi̱tā ma̍hādha̱ne ta̱nūṣva̱psu sūrye̍
||4||बाध॑से॒ जना॑न्वृष॒भेव॑ म॒न्युना॒ घृषौ॑ मी॒ळ्ह ऋ॑चीषम ।
अ॒स्माकं॑ बोध्यवि॒ता म॑हाध॒ने त॒नूष्व॒प्सु सूर्ये॑
indra̱ jyeṣṭha̍ṃ na̱ ā bha̍ra̱m̐ oji̍ṣṭha̱ṃ papu̍ri̱ śrava̍: |
yene̱me ci̍tra vajrahasta̱ roda̍sī̱ obhe su̍śipra̱ prāḥ
||5||इन्द्र॒ ज्येष्ठं॑ न॒ आ भ॑रँ॒ ओजि॑ष्ठं॒ पपु॑रि॒ श्रव॑: ।
येने॒मे चि॑त्र वज्रहस्त॒ रोद॑सी॒ ओभे सु॑शिप्र॒ प्राः
tvāmu̱gramava̍se carṣaṇī̱saha̱ṃ rāja̍nde̱veṣu̍ hūmahe |
viśvā̱ su no̍ vithu̱rā pi̍bda̱nā va̍so̱'mitrā̍ntsu̱ṣahā̍nkṛdhi
||6||त्वामु॒ग्रमव॑से चर्षणी॒सहं॒ राज॑न्दे॒वेषु॑ हूमहे ।
विश्वा॒ सु नो॑ विथु॒रा पि॑ब्द॒ना व॑सो॒ऽमित्रा॑न्त्सु॒षहा॑न्कृधि
yadi̍ndra̱ nāhu̍ṣī̱ṣvām̐ ojo̍ nṛ̱mṇaṃ ca̍ kṛ̱ṣṭiṣu̍ |
yadvā̱ pañca̍ kṣitī̱nāṃ dyu̱mnamā bha̍ra sa̱trā viśvā̍ni̱ pauṃsyā̍
||7||यदि॑न्द्र॒ नाहु॑षी॒ष्वाँ ओजो॑ नृ॒म्णं च॑ कृ॒ष्टिषु॑ ।
यद्वा॒ पञ्च॑ क्षिती॒नां द्यु॒म्नमा भ॑र स॒त्रा विश्वा॑नि॒ पौंस्या॑
yadvā̍ tṛ̱kṣau ma̍ghavandru̱hyāvā jane̱ yatpū̱rau kacca̱ vṛṣṇya̍m |
a̱smabhya̱ṃ tadri̍rīhi̱ saṃ nṛ̱ṣāhye̱'mitrā̍npṛ̱tsu tu̱rvaṇe̍
||8||यद्वा॑ तृ॒क्षौ म॑घवन्द्रु॒ह्यावा जने॒ यत्पू॒रौ कच्च॒ वृष्ण्य॑म् ।
अ॒स्मभ्यं॒ तद्रि॑रीहि॒ सं नृ॒षाह्ये॒ऽमित्रा॑न्पृ॒त्सु तु॒र्वणे॑
indra̍ tri̱dhātu̍ śara̱ṇaṃ tri̱varū̍thaṃ svasti̱mat |
cha̱rdirya̍ccha ma̱ghava̍dbhyaśca̱ mahya̍ṃ ca yā̱vayā̍ di̱dyume̍bhyaḥ
||9||इन्द्र॑ त्रि॒धातु॑ शर॒णं त्रि॒वरू॑थं स्वस्ति॒मत् ।
छ॒र्दिर्य॑च्छ म॒घव॑द्भ्यश्च॒ मह्यं॑ च या॒वया॑ दि॒द्युमे॑भ्यः
ye ga̍vya̱tā mana̍sā̱ śatru̍māda̱bhura̍bhipra̱ghnanti̍ dhṛṣṇu̱yā |
adha̍ smā no maghavannindra girvaṇastanū̱pā anta̍mo bhava
||10||ये ग॑व्य॒ता मन॑सा॒ शत्रु॑माद॒भुर॑भिप्र॒घ्नन्ति॑ धृष्णु॒या ।
अध॑ स्मा नो मघवन्निन्द्र गिर्वणस्तनू॒पा अन्त॑मो भव
adha̍ smā no vṛ̱dhe bha̱vendra̍ nā̱yama̍vā yu̱dhi |
yada̱ntari̍kṣe pa̱taya̍nti pa̱rṇino̍ di̱dyava̍sti̱gmamū̍rdhānaḥ
||11||अध॑ स्मा नो वृ॒धे भ॒वेन्द्र॑ ना॒यम॑वा यु॒धि ।
यद॒न्तरि॑क्षे प॒तय॑न्ति प॒र्णिनो॑ दि॒द्यव॑स्ति॒ग्ममू॑र्धानः
yatra̱ śūrā̍sasta̱nvo̍ vitanva̱te pri̱yā śarma̍ pitṝ̱ṇām |
adha̍ smā yaccha ta̱nve̱3 tane̍ ca cha̱rdira̱citta̍ṃ yā̱vaya̱ dveṣa̍:
||12||यत्र॒ शूरा॑सस्त॒न्वो॑ वितन्व॒ते प्रि॒या शर्म॑ पितॄ॒णाम् ।
अध॑ स्मा यच्छ त॒न्वे॒३ तने॑ च छ॒र्दिर॒चित्तं॑ या॒वय॒ द्वेष॑:
yadi̍ndra̱ sarge̱ arva̍taśco̱dayā̍se mahādha̱ne |
a̱sa̱ma̱ne adhva̍ni vṛji̱ne pa̱thi śye̱nām̐ i̍va śravasya̱taḥ
||13||यदि॑न्द्र॒ सर्गे॒ अर्व॑तश्चो॒दया॑से महाध॒ने ।
अ॒स॒म॒ने अध्व॑नि वृजि॒ने प॒थि श्ये॒नाँ इ॑व श्रवस्य॒तः
sindhū̍m̐riva prava̱ṇa ā̍śu̱yā ya̱to yadi̱ klośa̱manu̱ ṣvaṇi̍ |
ā ye vayo̱ na varvṛ̍ta̱tyāmi̍ṣi gṛbhī̱tā bā̱hvorgavi̍
||14||सिन्धूँ॑रिव प्रव॒ण आ॑शु॒या य॒तो यदि॒ क्लोश॒मनु॒ ष्वणि॑ ।
आ ये वयो॒ न वर्वृ॑त॒त्यामि॑षि गृभी॒ता बा॒ह्वोर्गवि॑