Study
- Anukramaṇī
- Source
7 bārhaspatyo bharadvāja: | vaiśvānarosgni : |triṣṭup , 6 – 7 jagatī |
mū̱rdhāna̍ṃ di̱vo a̍ra̱tiṃ pṛ̍thi̱vyā vai̍śvāna̱ramṛ̱ta ā jā̱tama̱gnim |
ka̱viṃ sa̱mrāja̱mati̍thi̱ṃ janā̍nāmā̱sannā pātra̍ṃ janayanta de̱vāḥ
||1||मू॒र्धानं॑ दि॒वो अ॑र॒तिं पृ॑थि॒व्या वै॑श्वान॒रमृ॒त आ जा॒तम॒ग्निम् ।
क॒विं स॒म्राज॒मति॑थिं॒ जना॑नामा॒सन्ना पात्रं॑ जनयन्त दे॒वाः
nābhi̍ṃ ya̱jñānā̱ṃ sada̍naṃ rayī̱ṇāṃ ma̱hāmā̍hā̱vama̱bhi saṃ na̍vanta |
vai̱śvā̱na̱raṃ ra̱thya̍madhva̱rāṇā̍ṃ ya̱jñasya̍ ke̱tuṃ ja̍nayanta de̱vāḥ
||2||नाभिं॑ य॒ज्ञानां॒ सद॑नं रयी॒णां म॒हामा॑हा॒वम॒भि सं न॑वन्त ।
वै॒श्वा॒न॒रं र॒थ्य॑मध्व॒राणां॑ य॒ज्ञस्य॑ के॒तुं ज॑नयन्त दे॒वाः
tvad vipro̍ jāyate vā̱jya̍gne̱ tvad vī̱rāso̍ abhimāti̱ṣāha̍: |
vaiśvā̍nara̱ tvama̱smāsu̍ dhehi̱ vasū̍ni rājan tspṛha̱yāyyā̍ṇi
||3||त्वद् विप्रो॑ जायते वा॒ज्य॑ग्ने॒ त्वद् वी॒रासो॑ अभिमाति॒षाह॑: ।
वैश्वा॑नर॒ त्वम॒स्मासु॑ धेहि॒ वसू॑नि राजन् त्स्पृह॒याय्या॑णि
tvāṃ viśve̍ amṛta̱ jāya̍māna̱ṃ śiśu̱ṃ na de̱vā a̱bhi saṃ na̍vante |
tava̱ kratu̍bhiramṛta̱tvamā̍ya̱n vaiśvā̍nara̱ yat pi̱troradī̍deḥ
||4||त्वां विश्वे॑ अमृत॒ जाय॑मानं॒ शिशुं॒ न दे॒वा अ॒भि सं न॑वन्ते ।
तव॒ क्रतु॑भिरमृत॒त्वमा॑य॒न् वैश्वा॑नर॒ यत् पि॒त्रोरदी॑देः
vaiśvā̍nara̱ tava̱ tāni̍ vra̱tāni̍ ma̱hānya̍gne̱ naki̱rā da̍dharṣa |
yajjāya̍mānaḥ pi̱troru̱pasthe 'vi̍ndaḥ ke̱tuṃ va̱yune̱ṣvahnā̍m
||5||वैश्वा॑नर॒ तव॒ तानि॑ व्र॒तानि॑ म॒हान्य॑ग्ने॒ नकि॒रा द॑धर्ष ।
यज्जाय॑मानः पि॒त्रोरु॒पस्थे ऽवि॑न्दः के॒तुं व॒युने॒ष्वह्ना॑म्
vai̱śvā̱na̱rasya̱ vimi̍tāni̱ cakṣa̍sā̱ sānū̍ni di̱vo a̱mṛta̍sya ke̱tunā̍ |
tasyedu̱ viśvā̱ bhuva̱nādhi̍ mū̱rdhani̍ va̱yā i̍va ruruhuḥ sa̱pta vi̱sruha̍:
||6||वै॒श्वा॒न॒रस्य॒ विमि॑तानि॒ चक्ष॑सा॒ सानू॑नि दि॒वो अ॒मृत॑स्य के॒तुना॑ ।
तस्येदु॒ विश्वा॒ भुव॒नाधि॑ मू॒र्धनि॑ व॒या इ॑व रुरुहुः स॒प्त वि॒स्रुह॑:
vi yo rajā̱ṃsyami̍mīta su̱kratu̍rvaiśvāna̱ro vi di̱vo ro̍ca̱nā ka̱viḥ |
pari̱ yo viśvā̱ bhuva̍nāni papra̱the 'da̍bdho go̱pā a̱mṛta̍sya rakṣi̱tā
||7||वि यो रजां॒स्यमि॑मीत सु॒क्रतु॑र्वैश्वान॒रो वि दि॒वो रो॑च॒ना क॒विः ।
परि॒ यो विश्वा॒ भुव॑नानि पप्र॒थे ऽद॑ब्धो गो॒पा अ॒मृत॑स्य रक्षि॒ता