Study
- Anukramaṇī
- Source
5 bārhaspatyo bharadvāja: | indra: | triṣṭup |
ma̱ndrasya̍ ka̱verdi̱vyasya̱ vahne̱rvipra̍manmano vaca̱nasya̱ madhva̍: |
apā̍ na̱stasya̍ saca̱nasya̍ de̱veṣo̍ yuvasva gṛṇa̱te goa̍grāḥ
||1||म॒न्द्रस्य॑ क॒वेर्दि॒व्यस्य॒ वह्ने॒र्विप्र॑मन्मनो वच॒नस्य॒ मध्व॑: ।
अपा॑ न॒स्तस्य॑ सच॒नस्य॑ दे॒वेषो॑ युवस्व गृण॒ते गोअ॑ग्राः
a̱yamu̍śā̱naḥ paryadri̍mu̱srā ṛ̱tadhī̍tibhiṝta̱yugyu̍jā̱naḥ |
ru̱jadaru̍gṇa̱ṃ vi va̱lasya̱ sānu̍ṃ pa̱ṇīm̐rvaco̍bhira̱bhi yo̍dha̱dindra̍:
||2||अ॒यमु॑शा॒नः पर्यद्रि॑मु॒स्रा ऋ॒तधी॑तिभिॠत॒युग्यु॑जा॒नः ।
रु॒जदरु॑ग्णं॒ वि व॒लस्य॒ सानुं॑ प॒णीँर्वचो॑भिर॒भि यो॑ध॒दिन्द्र॑:
a̱yaṃ dyo̍tayada̱dyuto̱ vya1ktūndo̱ṣā vasto̍: śa̱rada̱ indu̍rindra |
i̱maṃ ke̱tuma̍dadhu̱rnū ci̱dahnā̱ṃ śuci̍janmana u̱ṣasa̍ścakāra
||3||अ॒यं द्यो॑तयद॒द्युतो॒ व्य१क्तून्दो॒षा वस्तो॑: श॒रद॒ इन्दु॑रिन्द्र ।
इ॒मं के॒तुम॑दधु॒र्नू चि॒दह्नां॒ शुचि॑जन्मन उ॒षस॑श्चकार
a̱yaṃ ro̍cayada̱ruco̍ rucā̱no̱3'yaṃ vā̍saya̱dvyṛ1tena̍ pū̱rvīḥ |
a̱yamī̍yata ṛta̱yugbhi̱raśvai̍: sva̱rvidā̱ nābhi̍nā carṣaṇi̱prāḥ
||4||अ॒यं रो॑चयद॒रुचो॑ रुचा॒नो॒३ऽयं वा॑सय॒द्व्यृ१तेन॑ पू॒र्वीः ।
अ॒यमी॑यत ऋत॒युग्भि॒रश्वै॑: स्व॒र्विदा॒ नाभि॑ना चर्षणि॒प्राः
nū gṛ̍ṇā̱no gṛ̍ṇa̱te pra̍tna rāja̱nniṣa̍: pinva vasu̱deyā̍ya pū̱rvīḥ |
a̱pa oṣa̍dhīravi̱ṣā vanā̍ni̱ gā arva̍to̱ nṝnṛ̱case̍ rirīhi
||5||नू गृ॑णा॒नो गृ॑ण॒ते प्र॑त्न राज॒न्निष॑: पिन्व वसु॒देया॑य पू॒र्वीः ।
अ॒प ओष॑धीरवि॒षा वना॑नि॒ गा अर्व॑तो॒ नॄनृ॒चसे॑ रिरीहि