Study
- Anukramaṇī
- Source
6 bārhaspatyo bharadvāja: | uṣā:| triṣṭup |
e̱ṣā syā no̍ duhi̱tā di̍vo̱jāḥ kṣi̱tīru̱cchantī̱ mānu̍ṣīrajīgaḥ |
yā bhā̱nunā̱ ruśa̍tā rā̱myāsvajñā̍yi ti̱rastama̍saścida̱ktūn
||1||ए॒षा स्या नो॑ दुहि॒ता दि॑वो॒जाः क्षि॒तीरु॒च्छन्ती॒ मानु॑षीरजीगः ।
या भा॒नुना॒ रुश॑ता रा॒म्यास्वज्ञा॑यि ति॒रस्तम॑सश्चिद॒क्तून्
vi tadya̍yuraruṇa̱yugbhi̱raśvai̍ści̱traṃ bhā̍ntyu̱ṣasa̍śca̱ndrara̍thāḥ |
agra̍ṃ ya̱jñasya̍ bṛha̱to naya̍ntī̱rvi tā bā̍dhante̱ tama̱ ūrmyā̍yāḥ
||2||वि तद्य॑युररुण॒युग्भि॒रश्वै॑श्चि॒त्रं भा॑न्त्यु॒षस॑श्च॒न्द्रर॑थाः ।
अग्रं॑ य॒ज्ञस्य॑ बृह॒तो नय॑न्ती॒र्वि ता बा॑धन्ते॒ तम॒ ऊर्म्या॑याः
śravo̱ vāja̱miṣa̱mūrja̱ṃ vaha̍ntī̱rni dā̱śuṣa̍ uṣaso̱ martyā̍ya |
ma̱ghonī̍rvī̱rava̱tpatya̍mānā̱ avo̍ dhāta vidha̱te ratna̍ma̱dya
||3||श्रवो॒ वाज॒मिष॒मूर्जं॒ वह॑न्ती॒र्नि दा॒शुष॑ उषसो॒ मर्त्या॑य ।
म॒घोनी॑र्वी॒रव॒त्पत्य॑माना॒ अवो॑ धात विध॒ते रत्न॑म॒द्य
i̱dā hi vo̍ vidha̱te ratna̱mastī̱dā vī̱rāya̍ dā̱śuṣa̍ uṣāsaḥ |
i̱dā viprā̍ya̱ jara̍te̱ yadu̱kthā ni ṣma̱ māva̍te vahathā pu̱rā ci̍t
||4||इ॒दा हि वो॑ विध॒ते रत्न॒मस्ती॒दा वी॒राय॑ दा॒शुष॑ उषासः ।
इ॒दा विप्रा॑य॒ जर॑ते॒ यदु॒क्था नि ष्म॒ माव॑ते वहथा पु॒रा चि॑त्
i̱dā hi ta̍ uṣo adrisāno go̱trā gavā̱maṅgi̍raso gṛ̱ṇanti̍ |
vya1rkeṇa̍ bibhidu̱rbrahma̍ṇā ca sa̱tyā nṛ̱ṇāma̍bhavadde̱vahū̍tiḥ
||5||इ॒दा हि त॑ उषो अद्रिसानो गो॒त्रा गवा॒मङ्गि॑रसो गृ॒णन्ति॑ ।
व्य१र्केण॑ बिभिदु॒र्ब्रह्म॑णा च स॒त्या नृ॒णाम॑भवद्दे॒वहू॑तिः
u̱cchā di̍vo duhitaḥ pratna̱vanno̍ bharadvāja̱vadvi̍dha̱te ma̍ghoni |
su̱vīra̍ṃ ra̱yiṃ gṛ̍ṇa̱te ri̍rīhyurugā̱yamadhi̍ dhehi̱ śravo̍ naḥ
||6||उ॒च्छा दि॑वो दुहितः प्रत्न॒वन्नो॑ भरद्वाज॒वद्वि॑ध॒ते म॑घोनि ।
सु॒वीरं॑ र॒यिं गृ॑ण॒ते रि॑रीह्युरुगा॒यमधि॑ धेहि॒ श्रवो॑ नः