Study
- Anukramaṇī
- Source
15 ṛjiśvā bhāradvāja: | viśve devā: |triṣṭup , 15 śakvarī |
stu̱ṣe jana̍ṃ suvra̱taṃ navya̍sībhirgī̱rbhirmi̱trāvaru̍ṇā sumna̱yantā̍ |
ta ā ga̍mantu̱ ta i̱ha śru̍vantu sukṣa̱trāso̱ varu̍ṇo mi̱tro a̱gniḥ
||1||स्तु॒षे जनं॑ सुव्र॒तं नव्य॑सीभिर्गी॒र्भिर्मि॒त्रावरु॑णा सुम्न॒यन्ता॑ ।
त आ ग॑मन्तु॒ त इ॒ह श्रु॑वन्तु सुक्ष॒त्रासो॒ वरु॑णो मि॒त्रो अ॒ग्निः
vi̱śovi̍śa̱ īḍya̍madhva̱reṣvadṛ̍ptakratumara̱tiṃ yu̍va̱tyoḥ |
di̱vaḥ śiśu̱ṃ saha̍saḥ sū̱numa̱gniṃ ya̱jñasya̍ ke̱tuma̍ru̱ṣaṃ yaja̍dhyai
||2||वि॒शोवि॑श॒ ईड्य॑मध्व॒रेष्वदृ॑प्तक्रतुमर॒तिं यु॑व॒त्योः ।
दि॒वः शिशुं॒ सह॑सः सू॒नुम॒ग्निं य॒ज्ञस्य॑ के॒तुम॑रु॒षं यज॑ध्यै
a̱ru̱ṣasya̍ duhi̱tarā̱ virū̍pe̱ stṛbhi̍ra̱nyā pi̍pi̱śe sūro̍ a̱nyā |
mi̱tha̱sturā̍ vi̱cara̍ntī pāva̱ke manma̍ śru̱taṃ na̍kṣata ṛ̱cyamā̍ne
||3||अ॒रु॒षस्य॑ दुहि॒तरा॒ विरू॑पे॒ स्तृभि॑र॒न्या पि॑पि॒शे सूरो॑ अ॒न्या ।
मि॒थ॒स्तुरा॑ वि॒चर॑न्ती पाव॒के मन्म॑ श्रु॒तं न॑क्षत ऋ॒च्यमा॑ने
pra vā̱yumacchā̍ bṛha̱tī ma̍nī̱ṣā bṛ̱hadra̍yiṃ vi̱śvavā̍raṃ ratha̱prām |
dyu̱tadyā̍mā ni̱yuta̱: patya̍mānaḥ ka̱viḥ ka̱vimi̍yakṣasi prayajyo
||4||प्र वा॒युमच्छा॑ बृह॒ती म॑नी॒षा बृ॒हद्र॑यिं वि॒श्ववा॑रं रथ॒प्राम् ।
द्यु॒तद्या॑मा नि॒युत॒: पत्य॑मानः क॒विः क॒विमि॑यक्षसि प्रयज्यो
sa me̱ vapu̍śchadayada̱śvino̱ryo ratho̍ vi̱rukmā̱nmana̍sā yujā̱naḥ |
yena̍ narā nāsatyeṣa̱yadhyai̍ va̱rtiryā̱thastana̍yāya̱ tmane̍ ca
||5||स मे॒ वपु॑श्छदयद॒श्विनो॒र्यो रथो॑ वि॒रुक्मा॒न्मन॑सा युजा॒नः ।
येन॑ नरा नासत्येष॒यध्यै॑ व॒र्तिर्या॒थस्तन॑याय॒ त्मने॑ च
parja̍nyavātā vṛṣabhā pṛthi̱vyāḥ purī̍ṣāṇi jinvata̱mapyā̍ni |
satya̍śrutaḥ kavayo̱ yasya̍ gī̱rbhirjaga̍taḥ sthāta̱rjaga̱dā kṛ̍ṇudhvam
||6||पर्ज॑न्यवाता वृषभा पृथि॒व्याः पुरी॑षाणि जिन्वत॒मप्या॑नि ।
सत्य॑श्रुतः कवयो॒ यस्य॑ गी॒र्भिर्जग॑तः स्थात॒र्जग॒दा कृ॑णुध्वम्
pāvī̍ravī ka̱nyā̍ ci̱trāyu̱: sara̍svatī vī̱rapa̍tnī̱ dhiya̍ṃ dhāt |
gnābhi̱racchi̍draṃ śara̱ṇaṃ sa̱joṣā̍ durā̱dharṣa̍ṃ gṛṇa̱te śarma̍ yaṃsat
||7||पावी॑रवी क॒न्या॑ चि॒त्रायु॒: सर॑स्वती वी॒रप॑त्नी॒ धियं॑ धात् ।
ग्नाभि॒रच्छि॑द्रं शर॒णं स॒जोषा॑ दुरा॒धर्षं॑ गृण॒ते शर्म॑ यंसत्
pa̱thaspa̍tha̱: pari̍patiṃ vaca̱syā kāme̍na kṛ̱to a̱bhyā̍nal̤a̱rkam |
sa no̍ rāsacchu̱rudha̍śca̱ndrāgrā̱ dhiya̍ṃdhiyaṃ sīṣadhāti̱ pra pū̱ṣā
||8||प॒थस्प॑थ॒: परि॑पतिं वच॒स्या कामे॑न कृ॒तो अ॒भ्या॑नळ॒र्कम् ।
स नो॑ रासच्छु॒रुध॑श्च॒न्द्राग्रा॒ धियं॑धियं सीषधाति॒ प्र पू॒षा
pra̱tha̱ma̱bhāja̍ṃ ya̱śasa̍ṃ vayo̱dhāṃ su̍pā̱ṇiṃ de̱vaṃ su̱gabha̍sti̱mṛbhva̍m |
hotā̍ yakṣadyaja̱taṃ pa̱styā̍nāma̱gnistvaṣṭā̍raṃ su̱hava̍ṃ vi̱bhāvā̍
||9||प्र॒थ॒म॒भाजं॑ य॒शसं॑ वयो॒धां सु॑पा॒णिं दे॒वं सु॒गभ॑स्ति॒मृभ्व॑म् ।
होता॑ यक्षद्यज॒तं प॒स्त्या॑नाम॒ग्निस्त्वष्टा॑रं सु॒हवं॑ वि॒भावा॑
bhuva̍nasya pi̱tara̍ṃ gī̱rbhirā̱bhī ru̱draṃ divā̍ va̱rdhayā̍ ru̱drama̱ktau |
bṛ̱hanta̍mṛ̱ṣvama̱jara̍ṃ suṣu̱mnamṛdha̍gghuvema ka̱vine̍ṣi̱tāsa̍:
||10||भुव॑नस्य पि॒तरं॑ गी॒र्भिरा॒भी रु॒द्रं दिवा॑ व॒र्धया॑ रु॒द्रम॒क्तौ ।
बृ॒हन्त॑मृ॒ष्वम॒जरं॑ सुषु॒म्नमृध॑ग्घुवेम क॒विने॑षि॒तास॑:
ā yu̍vānaḥ kavayo yajñiyāso̱ maru̍to ga̱nta gṛ̍ṇa̱to va̍ra̱syām |
a̱ci̱traṃ ci̱ddhi jinva̍thā vṛ̱dhanta̍ i̱tthā nakṣa̍nto naro aṅgira̱svat
||11||आ यु॑वानः कवयो यज्ञियासो॒ मरु॑तो ग॒न्त गृ॑ण॒तो व॑र॒स्याम् ।
अ॒चि॒त्रं चि॒द्धि जिन्व॑था वृ॒धन्त॑ इ॒त्था नक्ष॑न्तो नरो अङ्गिर॒स्वत्
pra vī̱rāya̱ pra ta̱vase̍ tu̱rāyā'jā̍ yū̱theva̍ paśu̱rakṣi̱rasta̍m |
sa pi̍spṛśati ta̱nvi̍ śru̱tasya̱ stṛbhi̱rna nāka̍ṃ vaca̱nasya̱ vipa̍:
||12||प्र वी॒राय॒ प्र त॒वसे॑ तु॒रायाऽजा॑ यू॒थेव॑ पशु॒रक्षि॒रस्त॑म् ।
स पि॑स्पृशति त॒न्वि॑ श्रु॒तस्य॒ स्तृभि॒र्न नाकं॑ वच॒नस्य॒ विप॑:
yo rajā̍ṃsi vima̱me pārthi̍vāni̱ triści̱dviṣṇu̱rmana̍ve bādhi̱tāya̍ |
tasya̍ te̱ śarma̍nnupada̱dyamā̍ne rā̱yā ma̍dema ta̱nvā̱3 tanā̍ ca
||13||यो रजां॑सि विम॒मे पार्थि॑वानि॒ त्रिश्चि॒द्विष्णु॒र्मन॑वे बाधि॒ताय॑ ।
तस्य॑ ते॒ शर्म॑न्नुपद॒द्यमा॑ने रा॒या म॑देम त॒न्वा॒३ तना॑ च
tanno'hi̍rbu̱dhnyo̍ a̱dbhira̱rkaistatparva̍ta̱statsa̍vi̱tā cano̍ dhāt |
tadoṣa̍dhībhira̱bhi rā̍ti̱ṣāco̱ bhaga̱: pura̍ṃdhirjinvatu̱ pra rā̱ye
||14||तन्नोऽहि॑र्बु॒ध्न्यो॑ अ॒द्भिर॒र्कैस्तत्पर्व॑त॒स्तत्स॑वि॒ता चनो॑ धात् ।
तदोष॑धीभिर॒भि रा॑ति॒षाचो॒ भग॒: पुरं॑धिर्जिन्वतु॒ प्र रा॒ये
nū no̍ ra̱yiṃ ra̱thya̍ṃ carṣaṇi̱prāṃ pu̍ru̱vīra̍ṃ ma̱ha ṛ̱tasya̍ go̱pām |
kṣaya̍ṃ dātā̱jara̱ṃ yena̱ janā̱ntspṛdho̱ ade̍vīra̱bhi ca̱ kramā̍ma̱ viśa̱ āde̍vīra̱bhya1śnavā̍ma
||15||नू नो॑ र॒यिं र॒थ्यं॑ चर्षणि॒प्रां पु॑रु॒वीरं॑ म॒ह ऋ॒तस्य॑ गो॒पाम् ।
क्षयं॑ दाता॒जरं॒ येन॒ जना॒न्त्स्पृधो॒ अदे॑वीर॒भि च॒ क्रमा॑म॒ विश॒ आदे॑वीर॒भ्य१श्नवा॑म