Study
- Anukramaṇī
- Source
11 bārhaspatyo bharadvāja: |aśvinau | triṣṭup |
stu̱ṣe narā̍ di̱vo a̱sya pra̱santā̱'śvinā̍ huve̱ jara̍māṇo a̱rkaiḥ |
yā sa̱dya u̱srā vyuṣi̱ jmo antā̱nyuyū̍ṣata̱: paryu̱rū varā̍ṃsi
||1||स्तु॒षे नरा॑ दि॒वो अ॒स्य प्र॒सन्ता॒ऽश्विना॑ हुवे॒ जर॑माणो अ॒र्कैः ।
या स॒द्य उ॒स्रा व्युषि॒ ज्मो अन्ता॒न्युयू॑षत॒: पर्यु॒रू वरां॑सि
tā ya̱jñamā śuci̍bhiścakramā̱ṇā ratha̍sya bhā̱nuṃ ru̍rucū̱ rajo̍bhiḥ |
pu̱rū varā̱ṃsyami̍tā̱ mimā̍nā̱'po dhanvā̱nyati̍ yātho̱ ajrā̍n
||2||ता य॒ज्ञमा शुचि॑भिश्चक्रमा॒णा रथ॑स्य भा॒नुं रु॑रुचू॒ रजो॑भिः ।
पु॒रू वरां॒स्यमि॑ता॒ मिमा॑ना॒ऽपो धन्वा॒न्यति॑ याथो॒ अज्रा॑न्
tā ha̱ tyadva̱rtiryadara̍dhramugre̱tthā dhiya̍ ūhathu̱: śaśva̱daśvai̍: |
mano̍javebhiriṣi̱raiḥ śa̱yadhyai̱ pari̱ vyathi̍rdā̱śuṣo̱ martya̍sya
||3||ता ह॒ त्यद्व॒र्तिर्यदर॑ध्रमुग्रे॒त्था धिय॑ ऊहथु॒: शश्व॒दश्वै॑: ।
मनो॑जवेभिरिषि॒रैः श॒यध्यै॒ परि॒ व्यथि॑र्दा॒शुषो॒ मर्त्य॑स्य
tā navya̍so̱ jara̍māṇasya̱ manmopa̍ bhūṣato yuyujā̱nasa̍ptī |
śubha̱ṃ pṛkṣa̱miṣa̱mūrja̱ṃ vaha̍ntā̱ hotā̍ yakṣatpra̱tno a̱dhrugyuvā̍nā
||4||ता नव्य॑सो॒ जर॑माणस्य॒ मन्मोप॑ भूषतो युयुजा॒नस॑प्ती ।
शुभं॒ पृक्ष॒मिष॒मूर्जं॒ वह॑न्ता॒ होता॑ यक्षत्प्र॒त्नो अ॒ध्रुग्युवा॑ना
tā va̱lgū da̱srā pu̍ru̱śāka̍tamā pra̱tnā navya̍sā̱ vaca̱sā vi̍vāse |
yā śaṃsa̍te stuva̱te śambha̍viṣṭhā babhū̱vatu̍rgṛṇa̱te ci̱trarā̍tī
||5||ता व॒ल्गू द॒स्रा पु॑रु॒शाक॑तमा प्र॒त्ना नव्य॑सा॒ वच॒सा वि॑वासे ।
या शंस॑ते स्तुव॒ते शम्भ॑विष्ठा बभू॒वतु॑र्गृण॒ते चि॒त्ररा॑ती
tā bhu̱jyuṃ vibhi̍ra̱dbhyaḥ sa̍mu̱drāttugra̍sya sū̱numū̍hathū̱ rajo̍bhiḥ |
a̱re̱ṇubhi̱ryoja̍nebhirbhu̱jantā̍ pata̱tribhi̱rarṇa̍so̱ niru̱pasthā̍t
||6||ता भु॒ज्युं विभि॑र॒द्भ्यः स॑मु॒द्रात्तुग्र॑स्य सू॒नुमू॑हथू॒ रजो॑भिः ।
अ॒रे॒णुभि॒र्योज॑नेभिर्भु॒जन्ता॑ पत॒त्रिभि॒रर्ण॑सो॒ निरु॒पस्था॑त्
vi ja̱yuṣā̍ rathyā yāta̱madri̍ṃ śru̱taṃ hava̍ṃ vṛṣaṇā vadhrima̱tyāḥ |
da̱śa̱syantā̍ śa̱yave̍ pipyathu̱rgāmiti̍ cyavānā suma̱tiṃ bhu̍raṇyū
||7||वि ज॒युषा॑ रथ्या यात॒मद्रिं॑ श्रु॒तं हवं॑ वृषणा वध्रिम॒त्याः ।
द॒श॒स्यन्ता॑ श॒यवे॑ पिप्यथु॒र्गामिति॑ च्यवाना सुम॒तिं भु॑रण्यू
yadro̍dasī pra̱divo̱ asti̱ bhūmā̱ hel̤o̍ de̱vānā̍mu̱ta ma̍rtya̱trā |
tadā̍dityā vasavo rudriyāso rakṣo̱yuje̱ tapu̍ra̱ghaṃ da̍dhāta
||8||यद्रो॑दसी प्र॒दिवो॒ अस्ति॒ भूमा॒ हेळो॑ दे॒वाना॑मु॒त म॑र्त्य॒त्रा ।
तदा॑दित्या वसवो रुद्रियासो रक्षो॒युजे॒ तपु॑र॒घं द॑धात
ya ī̱ṃ rājā̍nāvṛtu̱thā vi̱dadha̱draja̍so mi̱tro varu̍ṇa̱ścike̍tat |
ga̱mbhī̱rāya̱ rakṣa̍se he̱tima̍sya̱ droghā̍ya ci̱dvaca̍sa̱ āna̍vāya
||9||य ईं॒ राजा॑नावृतु॒था वि॒दध॒द्रज॑सो मि॒त्रो वरु॑ण॒श्चिके॑तत् ।
ग॒म्भी॒राय॒ रक्ष॑से हे॒तिम॑स्य॒ द्रोघा॑य चि॒द्वच॑स॒ आन॑वाय
anta̍raiśca̱kraistana̍yāya va̱rtirdyu̱matā yā̍taṃ nṛ̱vatā̱ rathe̍na |
sanu̍tyena̱ tyaja̍sā̱ martya̍sya vanuṣya̱tāmapi̍ śī̱rṣā va̍vṛktam
||10||अन्त॑रैश्च॒क्रैस्तन॑याय व॒र्तिर्द्यु॒मता या॑तं नृ॒वता॒ रथे॑न ।
सनु॑त्येन॒ त्यज॑सा॒ मर्त्य॑स्य वनुष्य॒तामपि॑ शी॒र्षा व॑वृक्तम्
ā pa̍ra̱mābhi̍ru̱ta ma̍dhya̱mābhi̍rni̱yudbhi̍ryātamava̱mābhi̍ra̱rvāk |
dṛ̱l̤hasya̍ ci̱dgoma̍to̱ vi vra̱jasya̱ duro̍ vartaṃ gṛṇa̱te ci̍trarātī
||11||आ प॑र॒माभि॑रु॒त म॑ध्य॒माभि॑र्नि॒युद्भि॑र्यातमव॒माभि॑र॒र्वाक् ।
दृ॒ळ्हस्य॑ चि॒द्गोम॑तो॒ वि व्र॒जस्य॒ दुरो॑ वर्तं गृण॒ते चि॑त्रराती