Study
- Anukramaṇī
- Source
6 bārhaspatyo bharadvāja: |iṃdrāpūṣaṇau | gāyatrī |
indrā̱ nu pū̱ṣaṇā̍ va̱yaṃ sa̱khyāya̍ sva̱staye̍ | hu̱vema̱ vāja̍sātaye
||1||इन्द्रा॒ नु पू॒षणा॑ व॒यं स॒ख्याय॑ स्व॒स्तये॑ । हु॒वेम॒ वाज॑सातये
soma̍ma̱nya upā̍sada̱tpāta̍ve ca̱mvo̍: su̱tam | ka̱ra̱mbhama̱nya i̍cchati
||2||सोम॑म॒न्य उपा॑सद॒त्पात॑वे च॒म्वो॑: सु॒तम् । क॒र॒म्भम॒न्य इ॑च्छति
a̱jā a̱nyasya̱ vahna̍yo̱ harī̍ a̱nyasya̱ sambhṛ̍tā | tābhyā̍ṃ vṛ̱trāṇi̍ jighnate
||3||अ॒जा अ॒न्यस्य॒ वह्न॑यो॒ हरी॑ अ॒न्यस्य॒ सम्भृ॑ता । ताभ्यां॑ वृ॒त्राणि॑ जिघ्नते
yadindro̱ ana̍ya̱drito̍ ma̱hīra̱po vṛṣa̍ntamaḥ | tatra̍ pū̱ṣābha̍va̱tsacā̍
||4||यदिन्द्रो॒ अन॑य॒द्रितो॑ म॒हीर॒पो वृष॑न्तमः । तत्र॑ पू॒षाभ॑व॒त्सचा॑
tāṃ pū̱ṣṇaḥ su̍ma̱tiṃ va̱yaṃ vṛ̱kṣasya̱ pra va̱yāmi̍va | indra̍sya̱ cā ra̍bhāmahe
||5||तां पू॒ष्णः सु॑म॒तिं व॒यं वृ॒क्षस्य॒ प्र व॒यामि॑व । इन्द्र॑स्य॒ चा र॑भामहे
utpū̱ṣaṇa̍ṃ yuvāmahe̱'bhīśū̍m̐riva̱ sāra̍thiḥ | ma̱hyā indra̍ṃ sva̱staye̍
||6||उत्पू॒षणं॑ युवामहे॒ऽभीशूँ॑रिव॒ सार॑थिः । म॒ह्या इन्द्रं॑ स्व॒स्तये॑