Study
- Anukramaṇī
- Source
5 naro bhāradvāja: | indra: | triṣṭup |
sa̱trā madā̍sa̱stava̍ vi̱śvaja̍nyāḥ sa̱trā rāyo'dha̱ ye pārthi̍vāsaḥ |
sa̱trā vājā̍nāmabhavo vibha̱ktā yadde̱veṣu̍ dhā̱raya̍thā asu̱rya̍m
||1||स॒त्रा मदा॑स॒स्तव॑ वि॒श्वज॑न्याः स॒त्रा रायोऽध॒ ये पार्थि॑वासः ।
स॒त्रा वाजा॑नामभवो विभ॒क्ता यद्दे॒वेषु॑ धा॒रय॑था असु॒र्य॑म्
anu̱ pra ye̍je̱ jana̱ ojo̍ asya sa̱trā da̍dhire̱ anu̍ vī̱ryā̍ya |
syū̱ma̱gṛbhe̱ dudha̱ye'rva̍te ca̱ kratu̍ṃ vṛñja̱ntyapi̍ vṛtra̱hatye̍
||2||अनु॒ प्र ये॑जे॒ जन॒ ओजो॑ अस्य स॒त्रा द॑धिरे॒ अनु॑ वी॒र्या॑य ।
स्यू॒म॒गृभे॒ दुध॒येऽर्व॑ते च॒ क्रतुं॑ वृञ्ज॒न्त्यपि॑ वृत्र॒हत्ये॑
taṃ sa̱dhrīcī̍rū̱tayo̱ vṛṣṇyā̍ni̱ pauṃsyā̍ni ni̱yuta̍: saścu̱rindra̍m |
sa̱mu̱draṃ na sindha̍va u̱kthaśu̍ṣmā uru̱vyaca̍sa̱ṃ gira̱ ā vi̍śanti
||3||तं स॒ध्रीची॑रू॒तयो॒ वृष्ण्या॑नि॒ पौंस्या॑नि नि॒युत॑: सश्चु॒रिन्द्र॑म् ।
स॒मु॒द्रं न सिन्ध॑व उ॒क्थशु॑ष्मा उरु॒व्यच॑सं॒ गिर॒ आ वि॑शन्ति
sa rā̱yaskhāmupa̍ sṛjā gṛṇā̱naḥ pu̍ruśca̱ndrasya̱ tvami̍ndra̱ vasva̍: |
pati̍rbabhū̱thāsa̍mo̱ janā̍nā̱meko̱ viśva̍sya̱ bhuva̍nasya̱ rājā̍
||4||स रा॒यस्खामुप॑ सृजा गृणा॒नः पु॑रुश्च॒न्द्रस्य॒ त्वमि॑न्द्र॒ वस्व॑: ।
पति॑र्बभू॒थास॑मो॒ जना॑ना॒मेको॒ विश्व॑स्य॒ भुव॑नस्य॒ राजा॑
sa tu śru̍dhi̱ śrutyā̱ yo du̍vo̱yurdyaurna bhūmā̱bhi rāyo̍ a̱ryaḥ |
aso̱ yathā̍ na̱: śava̍sā cakā̱no yu̱geyu̍ge̱ vaya̍sā̱ ceki̍tānaḥ
||5||स तु श्रु॑धि॒ श्रुत्या॒ यो दु॑वो॒युर्द्यौर्न भूमा॒भि रायो॑ अ॒र्यः ।
असो॒ यथा॑ न॒: शव॑सा चका॒नो यु॒गेयु॑गे॒ वय॑सा॒ चेकि॑तानः