Study
- Anukramaṇī
- Source
8 bārhaspatyo bharadvāja: | indrāviṣṇū| triṣṭup |
saṃ vā̱ṃ karma̍ṇā̱ sami̱ṣā hi̍no̱mīndrā̍viṣṇū̱ apa̍saspā̱re a̱sya |
ju̱ṣethā̍ṃ ya̱jñaṃ dravi̍ṇaṃ ca dhatta̱mari̍ṣṭairnaḥ pa̱thibhi̍: pā̱raya̍ntā
||1||सं वां॒ कर्म॑णा॒ समि॒षा हि॑नो॒मीन्द्रा॑विष्णू॒ अप॑सस्पा॒रे अ॒स्य ।
जु॒षेथां॑ य॒ज्ञं द्रवि॑णं च धत्त॒मरि॑ष्टैर्नः प॒थिभि॑: पा॒रय॑न्ता
yā viśvā̍sāṃ jani̱tārā̍ matī̱nāmindrā̱viṣṇū̍ ka̱laśā̍ soma̱dhānā̍ |
pra vā̱ṃ gira̍: śa̱syamā̍nā avantu̱ pra stomā̍so gī̱yamā̍nāso a̱rkaiḥ
||2||या विश्वा॑सां जनि॒तारा॑ मती॒नामिन्द्रा॒विष्णू॑ क॒लशा॑ सोम॒धाना॑ ।
प्र वां॒ गिर॑: श॒स्यमा॑ना अवन्तु॒ प्र स्तोमा॑सो गी॒यमा॑नासो अ॒र्कैः
indrā̍viṣṇū madapatī madānā̱mā soma̍ṃ yāta̱ṃ dravi̍ṇo̱ dadhā̍nā |
saṃ vā̍mañjantva̱ktubhi̍rmatī̱nāṃ saṃ stomā̍saḥ śa̱syamā̍nāsa u̱kthaiḥ
||3||इन्द्रा॑विष्णू मदपती मदाना॒मा सोमं॑ यातं॒ द्रवि॑णो॒ दधा॑ना ।
सं वा॑मञ्जन्त्व॒क्तुभि॑र्मती॒नां सं स्तोमा॑सः श॒स्यमा॑नास उ॒क्थैः
ā vā̱maśvā̍so abhimāti̱ṣāha̱ indrā̍viṣṇū sadha̱mādo̍ vahantu |
ju̱ṣethā̱ṃ viśvā̱ hava̍nā matī̱nāmupa̱ brahmā̍ṇi śṛṇuta̱ṃ giro̍ me
||4||आ वा॒मश्वा॑सो अभिमाति॒षाह॒ इन्द्रा॑विष्णू सध॒मादो॑ वहन्तु ।
जु॒षेथां॒ विश्वा॒ हव॑ना मती॒नामुप॒ ब्रह्मा॑णि शृणुतं॒ गिरो॑ मे
indrā̍viṣṇū̱ tatpa̍na̱yāyya̍ṃ vā̱ṃ soma̍sya̱ mada̍ u̱ru ca̍kramāthe |
akṛ̍ṇutama̱ntari̍kṣa̱ṃ varī̱yo'pra̍thataṃ jī̱vase̍ no̱ rajā̍ṃsi
||5||इन्द्रा॑विष्णू॒ तत्प॑न॒याय्यं॑ वां॒ सोम॑स्य॒ मद॑ उ॒रु च॑क्रमाथे ।
अकृ॑णुतम॒न्तरि॑क्षं॒ वरी॒योऽप्र॑थतं जी॒वसे॑ नो॒ रजां॑सि
indrā̍viṣṇū ha̱viṣā̍ vāvṛdhā̱nā'grā̍dvānā̱ nama̍sā rātahavyā |
ghṛtā̍sutī̱ dravi̍ṇaṃ dhattama̱sme sa̍mu̱draḥ stha̍: ka̱laśa̍: soma̱dhāna̍:
||6||इन्द्रा॑विष्णू ह॒विषा॑ वावृधा॒नाऽग्रा॑द्वाना॒ नम॑सा रातहव्या ।
घृता॑सुती॒ द्रवि॑णं धत्तम॒स्मे स॑मु॒द्रः स्थ॑: क॒लश॑: सोम॒धान॑:
indrā̍viṣṇū̱ piba̍ta̱ṃ madhvo̍ a̱sya soma̍sya dasrā ja̱ṭhara̍ṃ pṛṇethām |
ā vā̱mandhā̍ṃsi madi̱rāṇya̍gma̱nnupa̱ brahmā̍ṇi śṛṇuta̱ṃ hava̍ṃ me
||7||इन्द्रा॑विष्णू॒ पिब॑तं॒ मध्वो॑ अ॒स्य सोम॑स्य दस्रा ज॒ठरं॑ पृणेथाम् ।
आ वा॒मन्धां॑सि मदि॒राण्य॑ग्म॒न्नुप॒ ब्रह्मा॑णि शृणुतं॒ हवं॑ मे
u̱bhā ji̍gyathu̱rna parā̍ jayethe̱ na parā̍ jigye kata̱raśca̱naino̍: |
indra̍śca viṣṇo̱ yadapa̍spṛdhethāṃ tre̱dhā sa̱hasra̱ṃ vi tadai̍rayethām
||8||उ॒भा जि॑ग्यथु॒र्न परा॑ जयेथे॒ न परा॑ जिग्ये कत॒रश्च॒नैनो॑: ।
इन्द्र॑श्च विष्णो॒ यदप॑स्पृधेथां त्रे॒धा स॒हस्रं॒ वि तदै॑रयेथाम्