Study
- Anukramaṇī
- Source
8 bārhaspatyo bharadvāja: | agni : |triṣṭup |
yathā̍ hota̱rmanu̍ṣo de̱vatā̍tā ya̱jñebhi̍: sūno sahaso̱ yajā̍si |
e̱vā no̍ a̱dya sa̍ma̱nā sa̍mā̱nānu̱śanna̍gna uśa̱to ya̍kṣi de̱vān
||1||यथा॑ होत॒र्मनु॑षो दे॒वता॑ता य॒ज्ञेभि॑: सूनो सहसो॒ यजा॑सि ।
ए॒वा नो॑ अ॒द्य स॑म॒ना स॑मा॒नानु॒शन्न॑ग्न उश॒तो य॑क्षि दे॒वान्
sa no̍ vi̱bhāvā̍ ca̱kṣaṇi̱rna vasto̍ra̱gnirva̱ndāru̱ vedya̱ścano̍ dhāt |
vi̱śvāyu̱ryo a̱mṛto̱ martye̍ṣūṣa̱rbhud bhūdati̍thirjā̱tave̍dāḥ
||2||स नो॑ वि॒भावा॑ च॒क्षणि॒र्न वस्तो॑र॒ग्निर्व॒न्दारु॒ वेद्य॒श्चनो॑ धात् ।
वि॒श्वायु॒र्यो अ॒मृतो॒ मर्त्ये॑षूष॒र्भुद् भूदति॑थिर्जा॒तवे॑दाः
dyāvo̱ na yasya̍ pa̱naya̱ntyabhva̱ṃ bhāsā̍ṃsi vaste̱ sūryo̱ na śu̱kraḥ |
vi ya i̱notya̱jara̍: pāva̱ko 'śna̍sya cicchiśnathat pū̱rvyāṇi̍
||3||द्यावो॒ न यस्य॑ प॒नय॒न्त्यभ्वं॒ भासां॑सि वस्ते॒ सूर्यो॒ न शु॒क्रः ।
वि य इ॒नोत्य॒जर॑: पाव॒को ऽश्न॑स्य चिच्छिश्नथत् पू॒र्व्याणि॑
va̱dmā hi sū̍no̱ asya̍dma̱sadvā̍ ca̱kre a̱gnirja̱nuṣājmānna̍m |
sa tvaṃ na̍ ūrjasana̱ ūrja̍ṃ dhā̱ rāje̍va jeravṛ̱ke kṣe̍ṣya̱ntaḥ
||4||व॒द्मा हि सू॑नो॒ अस्य॑द्म॒सद्वा॑ च॒क्रे अ॒ग्निर्ज॒नुषाज्मान्न॑म् ।
स त्वं न॑ ऊर्जसन॒ ऊर्जं॑ धा॒ राजे॑व जेरवृ॒के क्षे॑ष्य॒न्तः
niti̍kti̱ yo vā̍ra̱ṇamanna̱matti̍ vā̱yurna rāṣṭryatye̍tya̱ktūn |
tu̱ryāma̱ yasta̍ ā̱diśā̱marā̍tī̱ratyo̱ na hruta̱: pata̍taḥ pari̱hrut
||5||निति॑क्ति॒ यो वा॑र॒णमन्न॒मत्ति॑ वा॒युर्न राष्ट्र्यत्ये॑त्य॒क्तून् ।
तु॒र्याम॒ यस्त॑ आ॒दिशा॒मरा॑ती॒रत्यो॒ न ह्रुत॒: पत॑तः परि॒ह्रुत्
ā sūryo̱ na bhā̍nu̱madbhi̍ra̱rkairagne̍ ta̱tantha̱ roda̍sī̱ vi bhā̱sā |
ci̱tro na̍ya̱t pari̱ tamā̍ṃsya̱ktaḥ śo̱ciṣā̱ patma̍nnauśi̱jo na dīya̍n
||6||आ सूर्यो॒ न भा॑नु॒मद्भि॑र॒र्कैरग्ने॑ त॒तन्थ॒ रोद॑सी॒ वि भा॒सा ।
चि॒त्रो न॑य॒त् परि॒ तमां॑स्य॒क्तः शो॒चिषा॒ पत्म॑न्नौशि॒जो न दीय॑न्
tvāṃ hi ma̱ndrata̍mamarkaśo̱kairva̍vṛ̱mahe̱ mahi̍ na̱: śroṣya̍gne |
indra̱ṃ na tvā̱ śava̍sā de̱vatā̍ vā̱yuṃ pṛ̍ṇanti̱ rādha̍sā̱ nṛta̍māḥ
||7||त्वां हि म॒न्द्रत॑ममर्कशो॒कैर्व॑वृ॒महे॒ महि॑ न॒: श्रोष्य॑ग्ने ।
इन्द्रं॒ न त्वा॒ शव॑सा दे॒वता॑ वा॒युं पृ॑णन्ति॒ राध॑सा॒ नृत॑माः
nū no̍ agne'vṛ̱kebhi̍: sva̱sti veṣi̍ rā̱yaḥ pa̱thibhi̱: parṣyaṃha̍: |
tā sū̱ribhyo̍ gṛṇa̱te rā̍si su̱mnaṃ made̍ma śa̱tahi̍māḥ su̱vīrā̍:
||8||नू नो॑ अग्नेऽवृ॒केभि॑: स्व॒स्ति वेषि॑ रा॒यः प॒थिभि॒: पर्ष्यंह॑: ।
ता सू॒रिभ्यो॑ गृण॒ते रा॑सि सु॒म्नं मदे॑म श॒तहि॑माः सु॒वीरा॑: