Study
- Anukramaṇī
- Source
13 bārhaspatyo bharadvāja: | indra: | triṣṭup , 7 virāṭ |
dyaurna ya i̍ndrā̱bhi bhūmā̱ryasta̱sthau ra̱yiḥ śava̍sā pṛ̱tsu janā̍n |
taṃ na̍: sa̱hasra̍bharamurvarā̱sāṃ da̱ddhi sū̍no sahaso vṛtra̱tura̍m
||1||द्यौर्न य इ॑न्द्रा॒भि भूमा॒र्यस्त॒स्थौ र॒यिः शव॑सा पृ॒त्सु जना॑न् ।
तं न॑: स॒हस्र॑भरमुर्वरा॒सां द॒द्धि सू॑नो सहसो वृत्र॒तुर॑म्
di̱vo na tubhya̱manvi̍ndra sa̱trā 'su̱rya̍ṃ de̱vebhi̍rdhāyi̱ viśva̍m |
ahi̱ṃ yad vṛtrama̱po va̍vri̱vāṃsa̱ṃ hannṛ̍jīṣi̱n viṣṇu̍nā sacā̱naḥ
||2||दि॒वो न तुभ्य॒मन्वि॑न्द्र स॒त्रा ऽसु॒र्यं॑ दे॒वेभि॑र्धायि॒ विश्व॑म् ।
अहिं॒ यद् वृत्रम॒पो व॑व्रि॒वांसं॒ हन्नृ॑जीषि॒न् विष्णु॑ना सचा॒नः
tūrva̱nnojī̍yān ta̱vasa̱stavī̍yān kṛ̱tabra̱hmendro̍ vṛ̱ddhama̍hāḥ |
rājā̍bhava̱nmadhu̍naḥ so̱myasya̱ viśvā̍sā̱ṃ yat pu̱rāṃ da̱rtnumāva̍t
||3||तूर्व॒न्नोजी॑यान् त॒वस॒स्तवी॑यान् कृ॒तब्र॒ह्मेन्द्रो॑ वृ॒द्धम॑हाः ।
राजा॑भव॒न्मधु॑नः सो॒म्यस्य॒ विश्वा॑सां॒ यत् पु॒रां द॒र्त्नुमाव॑त्
śa̱taira̍padran pa̱ṇaya̍ i̱ndrātra̱ daśo̍ṇaye ka̱vaye̱'rkasā̍tau |
va̱dhaiḥ śuṣṇa̍syā̱śuṣa̍sya mā̱yāḥ pi̱tvo nāri̍recī̱t kiṃ ca̱na pra
||4||श॒तैर॑पद्रन् प॒णय॑ इ॒न्द्रात्र॒ दशो॑णये क॒वये॒ऽर्कसा॑तौ ।
व॒धैः शुष्ण॑स्या॒शुष॑स्य मा॒याः पि॒त्वो नारि॑रेची॒त् किं च॒न प्र
ma̱ho dru̱ho apa̍ vi̱śvāyu̍ dhāyi̱ vajra̍sya̱ yat pata̍ne̱ pādi̱ śuṣṇa̍: |
u̱ru ṣa sa̱ratha̱ṃ sāra̍thaye ka̱rindra̱: kutsā̍ya̱ sūrya̍sya sā̱tau
||5||म॒हो द्रु॒हो अप॑ वि॒श्वायु॑ धायि॒ वज्र॑स्य॒ यत् पत॑ने॒ पादि॒ शुष्ण॑: ।
उ॒रु ष स॒रथं॒ सार॑थये क॒रिन्द्र॒: कुत्सा॑य॒ सूर्य॑स्य सा॒तौ
pra śye̱no na ma̍di̱rama̱ṃśuma̍smai̱ śiro̍ dā̱sasya̱ namu̍cermathā̱yan |
prāva̱nnamī̍ṃ sā̱pyaṃ sa̱santa̍ṃ pṛ̱ṇagrā̱yā sami̱ṣā saṃ sva̱sti
||6||प्र श्ये॒नो न म॑दि॒रमं॒शुम॑स्मै॒ शिरो॑ दा॒सस्य॒ नमु॑चेर्मथा॒यन् ।
प्राव॒न्नमीं॑ सा॒प्यं स॒सन्तं॑ पृ॒णग्रा॒या समि॒षा सं स्व॒स्ति
vi pipro̱rahi̍māyasya dṛ̱l̤hāḥ puro̍ vajri̱ñchava̍sā̱ na da̍rdaḥ |
sudā̍ma̱n tad rekṇo̍ apramṛ̱ṣyamṛ̱jiśva̍ne dā̱traṃ dā̱śuṣe̍ dāḥ
||7||वि पिप्रो॒रहि॑मायस्य दृ॒ळ्हाः पुरो॑ वज्रि॒ञ्छव॑सा॒ न द॑र्दः ।
सुदा॑म॒न् तद् रेक्णो॑ अप्रमृ॒ष्यमृ॒जिश्व॑ने दा॒त्रं दा॒शुषे॑ दाः
sa ve̍ta̱suṃ daśa̍māya̱ṃ daśo̍ṇi̱ṃ tūtu̍ji̱mindra̍: svabhi̱ṣṭisu̍mnaḥ |
ā tugra̱ṃ śaśva̱dibha̱ṃ dyota̍nāya mā̱turna sī̱mupa̍ sṛjā i̱yadhyai̍
||8||स वे॑त॒सुं दश॑मायं॒ दशो॑णिं॒ तूतु॑जि॒मिन्द्र॑: स्वभि॒ष्टिसु॑म्नः ।
आ तुग्रं॒ शश्व॒दिभं॒ द्योत॑नाय मा॒तुर्न सी॒मुप॑ सृजा इ॒यध्यै॑
sa ī̱ṃ spṛdho̍ vanate̱ apra̍tīto̱ bibhra̱d vajra̍ṃ vṛtra̱haṇa̱ṃ gabha̍stau |
tiṣṭha̱ddharī̱ adhyaste̍va̱ garte̍ vaco̱yujā̍ vahata̱ indra̍mṛ̱ṣvam
||9||स ईं॒ स्पृधो॑ वनते॒ अप्र॑तीतो॒ बिभ्र॒द् वज्रं॑ वृत्र॒हणं॒ गभ॑स्तौ ।
तिष्ठ॒द्धरी॒ अध्यस्ते॑व॒ गर्ते॑ वचो॒युजा॑ वहत॒ इन्द्र॑मृ॒ष्वम्
sa̱nema̱ te'va̍sā̱ navya̍ indra̱ pra pū̱rava̍: stavanta e̱nā ya̱jñaiḥ |
sa̱pta yat pura̱: śarma̱ śāra̍dī̱rdarddhan dāsī̍: puru̱kutsā̍ya̱ śikṣa̍n
||10||स॒नेम॒ तेऽव॑सा॒ नव्य॑ इन्द्र॒ प्र पू॒रव॑: स्तवन्त ए॒ना य॒ज्ञैः ।
स॒प्त यत् पुर॒: शर्म॒ शार॑दी॒र्दर्द्धन् दासी॑: पुरु॒कुत्सा॑य॒ शिक्ष॑न्
tvaṃ vṛ̱dha i̍ndra pū̱rvyo bhū̍rvariva̱syannu̱śane̍ kā̱vyāya̍ |
parā̱ nava̍vāstvamanu̱deya̍ṃ ma̱he pi̱tre da̍dātha̱ svaṃ napā̍tam
||11||त्वं वृ॒ध इ॑न्द्र पू॒र्व्यो भू॑र्वरिव॒स्यन्नु॒शने॑ का॒व्याय॑ ।
परा॒ नव॑वास्त्वमनु॒देयं॑ म॒हे पि॒त्रे द॑दाथ॒ स्वं नपा॑तम्
tvaṃ dhuni̍rindra̱ dhuni̍matīṝ̱ṇora̱paḥ sī̱rā na srava̍ntīḥ |
pra yatsa̍mu̱dramati̍ śūra̱ parṣi̍ pā̱rayā̍ tu̱rvaśa̱ṃ yadu̍ṃ sva̱sti
||12||त्वं धुनि॑रिन्द्र॒ धुनि॑मतीॠ॒णोर॒पः सी॒रा न स्रव॑न्तीः ।
प्र यत्स॑मु॒द्रमति॑ शूर॒ पर्षि॑ पा॒रया॑ तु॒र्वशं॒ यदुं॑ स्व॒स्ति
tava̍ ha̱ tyadi̍ndra̱ viśva̍mā̱jau sa̱sto dhunī̱cumu̍rī̱ yā ha̱ siṣva̍p |
dī̱daya̱dit tubhya̱ṃ some̍bhiḥ su̱nvan dabhīti̍ri̱dhmabhṛ̍tiḥ pa̱kthya1rkaiḥ
||13||तव॑ ह॒ त्यदि॑न्द्र॒ विश्व॑मा॒जौ स॒स्तो धुनी॒चुमु॑री॒ या ह॒ सिष्व॑प् ।
दी॒दय॒दित् तुभ्यं॒ सोमे॑भिः सु॒न्वन् दभीति॑रि॒ध्मभृ॑तिः प॒क्थ्य१र्कैः