Study
- Anukramaṇī
- Source
22 śaṃyurbārhaspatya: [tṛṇapāṇi:] |1-10agni:; 11- 15, 20 – 21 maruta: [ 13-15 liṃgoktā vā ], 16-19 pūṣā, 22 dyāvābhūmī vā pṛśnirvā | pragātha:; =[ 1,3 bṛhatī; 2, 4 satobṛhatī; 5 bṛhatī, 6 mahāsatobṛhatī; 7 mahābṛhatī, 8 mahāsatobṛhatī; 9 bṛhatī, 10 satobṛhatī; 11 kakup , 12 satobṛhatī ], 13 purauṣṇik ,14 bṛhatī, 15 atijagatī, 16 kakup , 17 satobṛhatī, 18 purauṣṇik, 19-20 bṛhatī , 21 mahābṛhatī yavamadhyā, 22 anuṣṭup |
ya̱jñāya̍jñā vo a̱gnaye̍ gi̱rāgi̍rā ca̱ dakṣa̍se | prapra̍ va̱yama̱mṛta̍ṃ jā̱tave̍dasaṃ pri̱yaṃ mi̱traṃ na śa̍ṃsiṣam
||1||य॒ज्ञाय॑ज्ञा वो अ॒ग्नये॑ गि॒रागि॑रा च॒ दक्ष॑से । प्रप्र॑ व॒यम॒मृतं॑ जा॒तवे॑दसं प्रि॒यं मि॒त्रं न शं॑सिषम्
ū̱rjo napā̍ta̱ṃ sa hi̱nāyama̍sma̱yurdāśe̍ma ha̱vyadā̍taye | bhuva̱dvāje̍ṣvavi̱tā bhuva̍dvṛ̱dha u̱ta trā̱tā ta̱nūnā̍m
||2||ऊ॒र्जो नपा॑तं॒ स हि॒नायम॑स्म॒युर्दाशे॑म ह॒व्यदा॑तये । भुव॒द्वाजे॑ष्ववि॒ता भुव॑द्वृ॒ध उ॒त त्रा॒ता त॒नूना॑म्
vṛṣā̱ hya̍gne a̱jaro̍ ma̱hānvi̱bhāsya̱rciṣā̍ | aja̍sreṇa śo̱ciṣā̱ śośu̍cacchuce sudī̱tibhi̱: su dī̍dihi
||3||वृषा॒ ह्य॑ग्ने अ॒जरो॑ म॒हान्वि॒भास्य॒र्चिषा॑ । अज॑स्रेण शो॒चिषा॒ शोशु॑चच्छुचे सुदी॒तिभि॒: सु दी॑दिहि
ma̱ho de̱vānyaja̍si̱ yakṣyā̍nu̱ṣaktava̱ kratvo̱ta da̱ṃsanā̍ | a̱rvāca̍: sīṃ kṛṇuhya̱gne'va̍se̱ rāsva̱ vājo̱ta va̍ṃsva
||4||म॒हो दे॒वान्यज॑सि॒ यक्ष्या॑नु॒षक्तव॒ क्रत्वो॒त दं॒सना॑ । अ॒र्वाच॑: सीं कृणुह्य॒ग्नेऽव॑से॒ रास्व॒ वाजो॒त वं॑स्व
yamāpo̱ adra̍yo̱ vanā̱ garbha̍mṛ̱tasya̱ pipra̍ti | saha̍sā̱ yo ma̍thi̱to jāya̍te̱ nṛbhi̍: pṛthi̱vyā adhi̱ sāna̍vi
||5||यमापो॒ अद्र॑यो॒ वना॒ गर्भ॑मृ॒तस्य॒ पिप्र॑ति । सह॑सा॒ यो म॑थि॒तो जाय॑ते॒ नृभि॑: पृथि॒व्या अधि॒ सान॑वि
ā yaḥ pa̱prau bhā̱nunā̱ roda̍sī u̱bhe dhū̱mena̍ dhāvate di̱vi | ti̱rastamo̍ dadṛśa̱ ūrmyā̱svā śyā̱vāsva̍ru̱ṣo vṛṣā śyā̱vā a̍ru̱ṣo vṛṣā̍
||6||आ यः प॒प्रौ भा॒नुना॒ रोद॑सी उ॒भे धू॒मेन॑ धावते दि॒वि । ति॒रस्तमो॑ ददृश॒ ऊर्म्या॒स्वा श्या॒वास्व॑रु॒षो वृषा श्या॒वा अ॑रु॒षो वृषा॑
bṛ̱hadbhi̍ragne a̱rcibhi̍: śu̱kreṇa̍ deva śo̱ciṣā̍ | bha̱radvā̍je samidhā̱no ya̍viṣṭhya re̱vanna̍: śukra dīdihi dyu̱matpā̍vaka dīdihi
||7||बृ॒हद्भि॑रग्ने अ॒र्चिभि॑: शु॒क्रेण॑ देव शो॒चिषा॑ । भ॒रद्वा॑जे समिधा॒नो य॑विष्ठ्य रे॒वन्न॑: शुक्र दीदिहि द्यु॒मत्पा॑वक दीदिहि
viśvā̍sāṃ gṛ̱hapa̍tirvi̱śāma̍si̱ tvama̍gne̱ mānu̍ṣīṇām | śa̱taṃ pū̱rbhirya̍viṣṭha pā̱hyaṃha̍saḥ same̱ddhāra̍ṃ śa̱taṃ himā̍: sto̱tṛbhyo̱ ye ca̱ dada̍ti
||8||विश्वा॑सां गृ॒हप॑तिर्वि॒शाम॑सि॒ त्वम॑ग्ने॒ मानु॑षीणाम् । श॒तं पू॒र्भिर्य॑विष्ठ पा॒ह्यंह॑सः समे॒द्धारं॑ श॒तं हिमा॑: स्तो॒तृभ्यो॒ ये च॒ दद॑ति
tvaṃ na̍ści̱tra ū̱tyā vaso̱ rādhā̍ṃsi codaya | a̱sya rā̱yastvama̍gne ra̱thīra̍si vi̱dā gā̱dhaṃ tu̱ce tu na̍:
||9||त्वं न॑श्चि॒त्र ऊ॒त्या वसो॒ राधां॑सि चोदय । अ॒स्य रा॒यस्त्वम॑ग्ने र॒थीर॑सि वि॒दा गा॒धं तु॒चे तु न॑:
parṣi̍ to̱kaṃ tana̍yaṃ pa̱rtṛbhi̱ṣṭvamada̍bdhai̱rapra̍yutvabhiḥ | agne̱ hel̤ā̍ṃsi̱ daivyā̍ yuyodhi̱ no'de̍vāni̱ hvarā̍ṃsi ca
||10||पर्षि॑ तो॒कं तन॑यं प॒र्तृभि॒ष्ट्वमद॑ब्धै॒रप्र॑युत्वभिः । अग्ने॒ हेळां॑सि॒ दैव्या॑ युयोधि॒ नोऽदे॑वानि॒ ह्वरां॑सि च
ā sa̍khāyaḥ saba̱rdughā̍ṃ dhe̱numa̍jadhva̱mupa̱ navya̍sā̱ vaca̍: | sṛ̱jadhva̱mana̍pasphurām
||11||आ स॑खायः सब॒र्दुघां॑ धे॒नुम॑जध्व॒मुप॒ नव्य॑सा॒ वच॑: । सृ॒जध्व॒मन॑पस्फुराम्
yā śardhā̍ya̱ māru̍tāya̱ svabhā̍nave̱ śravo'mṛ̍tyu̱ dhukṣa̍ta | yā mṛ̍l̤ī̱ke ma̱rutā̍ṃ tu̱rāṇā̱ṃ yā su̱mnaire̍va̱yāva̍rī
||12||या शर्धा॑य॒ मारु॑ताय॒ स्वभा॑नवे॒ श्रवोऽमृ॑त्यु॒ धुक्ष॑त । या मृ॑ळी॒के म॒रुतां॑ तु॒राणां॒ या सु॒म्नैरे॑व॒याव॑री
bha̱radvā̍jā̱yāva̍ dhukṣata dvi̱tā | dhe̱nuṃ ca̍ vi̱śvado̍hasa̱miṣa̍ṃ ca vi̱śvabho̍jasam
||13||भ॒रद्वा॑जा॒याव॑ धुक्षत द्वि॒ता । धे॒नुं च॑ वि॒श्वदो॑हस॒मिषं॑ च वि॒श्वभो॑जसम्
taṃ va̱ indra̱ṃ na su̱kratu̱ṃ varu̍ṇamiva mā̱yina̍m | a̱rya̱maṇa̱ṃ na ma̱ndraṃ sṛ̱prabho̍jasa̱ṃ viṣṇu̱ṃ na stu̍ṣa ā̱diśe̍
||14||तं व॒ इन्द्रं॒ न सु॒क्रतुं॒ वरु॑णमिव मा॒यिन॑म् । अ॒र्य॒मणं॒ न म॒न्द्रं सृ॒प्रभो॑जसं॒ विष्णुं॒ न स्तु॑ष आ॒दिशे॑
tve̱ṣaṃ śardho̱ na māru̍taṃ tuvi̱ṣvaṇya̍na̱rvāṇa̍ṃ pū̱ṣaṇa̱ṃ saṃ yathā̍ śa̱tā | saṃ sa̱hasrā̱ kāri̍ṣaccarṣa̱ṇibhya̱ ām̐ ā̱virgū̱l̤hā vasū̍ karatsu̱vedā̍ no̱ vasū̍ karat
||15||त्वे॒षं शर्धो॒ न मारु॑तं तुवि॒ष्वण्य॑न॒र्वाणं॑ पू॒षणं॒ सं यथा॑ श॒ता । सं स॒हस्रा॒ कारि॑षच्चर्ष॒णिभ्य॒ आँ आ॒विर्गू॒ळ्हा वसू॑ करत्सु॒वेदा॑ नो॒ वसू॑ करत्
ā mā̍ pūṣa̱nnupa̍ drava̱ śaṃsi̍ṣa̱ṃ nu te̍ apika̱rṇa ā̍ghṛṇe | a̱ghā a̱ryo arā̍tayaḥ
||16||आ मा॑ पूष॒न्नुप॑ द्रव॒ शंसि॑षं॒ नु ते॑ अपिक॒र्ण आ॑घृणे । अ॒घा अ॒र्यो अरा॑तयः
mā kā̍ka̱mbīra̱mudvṛ̍ho̱ vana̱spati̱maśa̍stī̱rvi hi nīna̍śaḥ | mota sūro̱ aha̍ e̱vā ca̱na grī̱vā ā̱dadha̍te̱ veḥ
||17||मा का॑क॒म्बीर॒मुद्वृ॑हो॒ वन॒स्पति॒मश॑स्ती॒र्वि हि नीन॑शः । मोत सूरो॒ अह॑ ए॒वा च॒न ग्री॒वा आ॒दध॑ते॒ वेः
dṛte̍riva te'vṛ̱kama̍stu sa̱khyam | acchi̍drasya dadha̱nvata̱: supū̍rṇasya dadha̱nvata̍:
||18||दृते॑रिव तेऽवृ॒कम॑स्तु स॒ख्यम् । अच्छि॑द्रस्य दध॒न्वत॒: सुपू॑र्णस्य दध॒न्वत॑:
pa̱ro hi martyai̱rasi̍ sa̱mo de̱vairu̱ta śri̱yā | a̱bhi khya̍: pūṣa̱npṛta̍nāsu na̱stvamavā̍ nū̱naṃ yathā̍ pu̱rā
||19||प॒रो हि मर्त्यै॒रसि॑ स॒मो दे॒वैरु॒त श्रि॒या । अ॒भि ख्य॑: पूष॒न्पृत॑नासु न॒स्त्वमवा॑ नू॒नं यथा॑ पु॒रा
vā̱mī vā̱masya̍ dhūtaya̱: praṇī̍tirastu sū̱nṛtā̍ | de̱vasya̍ vā maruto̱ martya̍sya vejā̱nasya̍ prayajyavaḥ
||20||वा॒मी वा॒मस्य॑ धूतय॒: प्रणी॑तिरस्तु सू॒नृता॑ । दे॒वस्य॑ वा मरुतो॒ मर्त्य॑स्य वेजा॒नस्य॑ प्रयज्यवः
sa̱dyaści̱dyasya̍ carkṛ̱tiḥ pari̱ dyāṃ de̱vo naiti̱ sūrya̍: | tve̱ṣaṃ śavo̍ dadhire̱ nāma̍ ya̱jñiya̍ṃ ma̱ruto̍ vṛtra̱haṃ śavo̱ jyeṣṭha̍ṃ vṛtra̱haṃ śava̍:
||21||स॒द्यश्चि॒द्यस्य॑ चर्कृ॒तिः परि॒ द्यां दे॒वो नैति॒ सूर्य॑: । त्वे॒षं शवो॑ दधिरे॒ नाम॑ य॒ज्ञियं॑ म॒रुतो॑ वृत्र॒हं शवो॒ ज्येष्ठं॑ वृत्र॒हं शव॑:
sa̱kṛddha̱ dyaura̍jāyata sa̱kṛdbhūmi̍rajāyata | pṛśnyā̍ du̱gdhaṃ sa̱kṛtpaya̱stada̱nyo nānu̍ jāyate
||22||स॒कृद्ध॒ द्यौर॑जायत स॒कृद्भूमि॑रजायत । पृश्न्या॑ दु॒ग्धं स॒कृत्पय॒स्तद॒न्यो नानु॑ जायते