Study
- Anukramaṇī
- Source
5 śunahotro bhāradvāja: | indra: | triṣṭup |
saṃ ca̱ tve ja̱gmurgira̍ indra pū̱rvīrvi ca̱ tvadya̍nti vi̱bhvo̍ manī̱ṣāḥ |
pu̱rā nū̱naṃ ca̍ stu̱taya̱ ṛṣī̍ṇāṃ paspṛ̱dhra indre̱ adhyu̍kthā̱rkā
||1||सं च॒ त्वे ज॒ग्मुर्गिर॑ इन्द्र पू॒र्वीर्वि च॒ त्वद्य॑न्ति वि॒भ्वो॑ मनी॒षाः ।
पु॒रा नू॒नं च॑ स्तु॒तय॒ ऋषी॑णां पस्पृ॒ध्र इन्द्रे॒ अध्यु॑क्था॒र्का
pu̱ru̱hū̱to yaḥ pu̍rugū̱rta ṛbhvā̱m̐ eka̍: purupraśa̱sto asti̍ ya̱jñaiḥ |
ratho̱ na ma̱he śava̍se yujā̱no̱3'smābhi̱rindro̍ anu̱mādyo̍ bhūt
||2||पु॒रु॒हू॒तो यः पु॑रुगू॒र्त ऋभ्वाँ॒ एक॑: पुरुप्रश॒स्तो अस्ति॑ य॒ज्ञैः ।
रथो॒ न म॒हे शव॑से युजा॒नो॒३ऽस्माभि॒रिन्द्रो॑ अनु॒माद्यो॑ भूत्
na yaṃ hiṃsa̍nti dhī̱tayo̱ na vāṇī̱rindra̱ṃ nakṣa̱ntīda̱bhi va̱rdhaya̍ntīḥ |
yadi̍ sto̱tāra̍: śa̱taṃ yatsa̱hasra̍ṃ gṛ̱ṇanti̱ girva̍ṇasa̱ṃ śaṃ tada̍smai
||3||न यं हिंस॑न्ति धी॒तयो॒ न वाणी॒रिन्द्रं॒ नक्ष॒न्तीद॒भि व॒र्धय॑न्तीः ।
यदि॑ स्तो॒तार॑: श॒तं यत्स॒हस्रं॑ गृ॒णन्ति॒ गिर्व॑णसं॒ शं तद॑स्मै
asmā̍ e̱taddi̱vya1rceva̍ mā̱sā mi̍mi̱kṣa indre̱ nya̍yāmi̱ soma̍: |
jana̱ṃ na dhanva̍nna̱bhi saṃ yadāpa̍: sa̱trā vā̍vṛdhu̱rhava̍nāni ya̱jñaiḥ
||4||अस्मा॑ ए॒तद्दि॒व्य१र्चेव॑ मा॒सा मि॑मि॒क्ष इन्द्रे॒ न्य॑यामि॒ सोम॑: ।
जनं॒ न धन्व॑न्न॒भि सं यदाप॑: स॒त्रा वा॑वृधु॒र्हव॑नानि य॒ज्ञैः
asmā̍ e̱tanmahyā̍ṅgū̱ṣama̍smā̱ indrā̍ya sto̱traṃ ma̱tibhi̍ravāci |
asa̱dyathā̍ maha̱ti vṛ̍tra̱tūrya̱ indro̍ vi̱śvāyu̍ravi̱tā vṛ̱dhaśca̍
||5||अस्मा॑ ए॒तन्मह्या॑ङ्गू॒षम॑स्मा॒ इन्द्रा॑य स्तो॒त्रं म॒तिभि॑रवाचि ।
अस॒द्यथा॑ मह॒ति वृ॑त्र॒तूर्य॒ इन्द्रो॑ वि॒श्वायु॑रवि॒ता वृ॒धश्च॑