Study
- Anukramaṇī
- Source
8 bārhaspatyo bharadvāja: | indra:, 8 abhyāvartī cāyamāna: [ dāna: ] | triṣṭup |
kima̍sya̱ made̱ kimva̍sya pī̱tāvindra̱: kima̍sya sa̱khye ca̍kāra |
raṇā̍ vā̱ ye ni̱ṣadi̱ kiṃ te a̍sya pu̱rā vi̍vidre̱ kimu̱ nūta̍nāsaḥ
||1||किम॑स्य॒ मदे॒ किम्व॑स्य पी॒ताविन्द्र॒: किम॑स्य स॒ख्ये च॑कार ।
रणा॑ वा॒ ये नि॒षदि॒ किं ते अ॑स्य पु॒रा वि॑विद्रे॒ किमु॒ नूत॑नासः
sada̍sya̱ made̱ sadva̍sya pī̱tāvindra̱: sada̍sya sa̱khye ca̍kāra |
raṇā̍ vā̱ ye ni̱ṣadi̱ satte a̍sya pu̱rā vi̍vidre̱ sadu̱ nūta̍nāsaḥ
||2||सद॑स्य॒ मदे॒ सद्व॑स्य पी॒ताविन्द्र॒: सद॑स्य स॒ख्ये च॑कार ।
रणा॑ वा॒ ये नि॒षदि॒ सत्ते अ॑स्य पु॒रा वि॑विद्रे॒ सदु॒ नूत॑नासः
na̱hi nu te̍ mahi̱mana̍: samasya̱ na ma̍ghavanmaghava̱ttvasya̍ vi̱dma |
na rādha̍sorādhaso̱ nūta̍na̱syendra̱ naki̍rdadṛśa indri̱yaṃ te̍
||3||न॒हि नु ते॑ महि॒मन॑: समस्य॒ न म॑घवन्मघव॒त्त्वस्य॑ वि॒द्म ।
न राध॑सोराधसो॒ नूत॑न॒स्येन्द्र॒ नकि॑र्ददृश इन्द्रि॒यं ते॑
e̱tattyatta̍ indri̱yama̍ceti̱ yenāva̍dhīrva̱raśi̍khasya̱ śeṣa̍: |
vajra̍sya̱ yatte̱ niha̍tasya̱ śuṣmā̍tsva̱nācci̍dindra para̱mo da̱dāra̍
||4||ए॒तत्त्यत्त॑ इन्द्रि॒यम॑चेति॒ येनाव॑धीर्व॒रशि॑खस्य॒ शेष॑: ।
वज्र॑स्य॒ यत्ते॒ निह॑तस्य॒ शुष्मा॑त्स्व॒नाच्चि॑दिन्द्र पर॒मो द॒दार॑
vadhī̱dindro̍ va̱raśi̍khasya̱ śeṣo̍'bhyāva̱rtine̍ cāyamā̱nāya̱ śikṣa̍n |
vṛ̱cīva̍to̱ yaddha̍riyū̱pīyā̍yā̱ṃ hanpūrve̱ ardhe̍ bhi̱yasāpa̍ro̱ dart
||5||वधी॒दिन्द्रो॑ व॒रशि॑खस्य॒ शेषो॑ऽभ्याव॒र्तिने॑ चायमा॒नाय॒ शिक्ष॑न् ।
वृ॒चीव॑तो॒ यद्ध॑रियू॒पीया॑यां॒ हन्पूर्वे॒ अर्धे॑ भि॒यसाप॑रो॒ दर्त्
tri̱ṃśaccha̍taṃ va̱rmiṇa̍ indra sā̱kaṃ ya̱vyāva̍tyāṃ puruhūta śrava̱syā |
vṛ̱cīva̍nta̱: śara̍ve̱ patya̍mānā̱: pātrā̍ bhindā̱nā nya̱rthānyā̍yan
||6||त्रिं॒शच्छ॑तं व॒र्मिण॑ इन्द्र सा॒कं य॒व्याव॑त्यां पुरुहूत श्रव॒स्या ।
वृ॒चीव॑न्त॒: शर॑वे॒ पत्य॑माना॒: पात्रा॑ भिन्दा॒ना न्य॒र्थान्या॑यन्
yasya̱ gāvā̍varu̱ṣā sū̍yava̱syū a̱ntarū̱ ṣu cara̍to̱ reri̍hāṇā |
sa sṛñja̍yāya tu̱rvaśa̱ṃ parā̍dādvṛ̱cīva̍to daivavā̱tāya̱ śikṣa̍n
||7||यस्य॒ गावा॑वरु॒षा सू॑यव॒स्यू अ॒न्तरू॒ षु चर॑तो॒ रेरि॑हाणा ।
स सृञ्ज॑याय तु॒र्वशं॒ परा॑दाद्वृ॒चीव॑तो दैववा॒ताय॒ शिक्ष॑न्
dva̱yām̐ a̍gne ra̱thino̍ viṃśa̱tiṃ gā va̱dhūma̍to ma̱ghavā̱ mahya̍ṃ sa̱mrāṭ |
a̱bhyā̱va̱rtī cā̍yamā̱no da̍dāti dū̱ṇāśe̱yaṃ dakṣi̍ṇā pārtha̱vānā̍m
||8||द्व॒याँ अ॑ग्ने र॒थिनो॑ विंश॒तिं गा व॒धूम॑तो म॒घवा॒ मह्यं॑ स॒म्राट् ।
अ॒भ्या॒व॒र्ती चा॑यमा॒नो द॑दाति दू॒णाशे॒यं दक्षि॑णा पार्थ॒वाना॑म्