Study
- Anukramaṇī
- Source
7 bārhaspatyo bharadvāja: | agni : |triṣṭup |
hu̱ve va̍: sū̱nuṃ saha̍so̱ yuvā̍na̱madro̍ghavācaṃ ma̱tibhi̱ryavi̍ṣṭham |
ya inva̍ti̱ dravi̍ṇāni̱ prace̍tā vi̱śvavā̍rāṇi puru̱vāro̍ a̱dhruk
||1||हु॒वे व॑: सू॒नुं सह॑सो॒ युवा॑न॒मद्रो॑घवाचं म॒तिभि॒र्यवि॑ष्ठम् ।
य इन्व॑ति॒ द्रवि॑णानि॒ प्रचे॑ता वि॒श्ववा॑राणि पुरु॒वारो॑ अ॒ध्रुक्
tve vasū̍ni purvaṇīka hotardo̱ṣā vasto̱reri̍re ya̱jñiyā̍saḥ |
kṣāme̍va̱ viśvā̱ bhuva̍nāni̱ yasmi̱n tsaṃ saubha̍gāni dadhi̱re pā̍va̱ke
||2||त्वे वसू॑नि पुर्वणीक होतर्दो॒षा वस्तो॒रेरि॑रे य॒ज्ञिया॑सः ।
क्षामे॑व॒ विश्वा॒ भुव॑नानि॒ यस्मि॒न् त्सं सौभ॑गानि दधि॒रे पा॑व॒के
tvaṃ vi̱kṣu pra̱diva̍: sīda ā̱su kratvā̍ ra̱thīra̍bhavo̱ vāryā̍ṇām |
ata̍ inoṣi vidha̱te ci̍kitvo̱ vyā̍nu̱ṣagjā̍tavedo̱ vasū̍ni
||3||त्वं वि॒क्षु प्र॒दिव॑: सीद आ॒सु क्रत्वा॑ र॒थीर॑भवो॒ वार्या॑णाम् ।
अत॑ इनोषि विध॒ते चि॑कित्वो॒ व्या॑नु॒षग्जा॑तवेदो॒ वसू॑नि
yo na̱: sanu̍tyo abhi̱dāsa̍dagne̱ yo anta̍ro mitramaho vanu̱ṣyāt |
tama̱jare̍bhi̱rvṛṣa̍bhi̱stava̱ svaistapā̍ tapiṣṭha̱ tapa̍sā̱ tapa̍svān
||4||यो न॒: सनु॑त्यो अभि॒दास॑दग्ने॒ यो अन्त॑रो मित्रमहो वनु॒ष्यात् ।
तम॒जरे॑भि॒र्वृष॑भि॒स्तव॒ स्वैस्तपा॑ तपिष्ठ॒ तप॑सा॒ तप॑स्वान्
yaste̍ ya̱jñena̍ sa̱midhā̱ ya u̱kthaira̱rkebhi̍: sūno sahaso̱ dadā̍śat |
sa martye̍ṣvamṛta̱ prace̍tā rā̱yā dyu̱mnena̱ śrava̍sā̱ vi bhā̍ti
||5||यस्ते॑ य॒ज्ञेन॑ स॒मिधा॒ य उ॒क्थैर॒र्केभि॑: सूनो सहसो॒ ददा॑शत् ।
स मर्त्ये॑ष्वमृत॒ प्रचे॑ता रा॒या द्यु॒म्नेन॒ श्रव॑सा॒ वि भा॑ति
sa tat kṛ̍dhīṣi̱tastūya̍magne̱ spṛdho̍ bādhasva̱ saha̍sā̱ saha̍svān |
yaccha̱syase̱ dyubhi̍ra̱kto vaco̍bhi̱stajju̍ṣasva jari̱turghoṣi̱ manma̍
||6||स तत् कृ॑धीषि॒तस्तूय॑मग्ने॒ स्पृधो॑ बाधस्व॒ सह॑सा॒ सह॑स्वान् ।
यच्छ॒स्यसे॒ द्युभि॑र॒क्तो वचो॑भि॒स्तज्जु॑षस्व जरि॒तुर्घोषि॒ मन्म॑
a̱śyāma̱ taṃ kāma̍magne̱ tavo̱tī a̱śyāma̍ ra̱yiṃ ra̍yivaḥ su̱vīra̍m |
a̱śyāma̱ vāja̍ma̱bhi vā̱jaya̍nto̱ 'śyāma̍ dyu̱mnama̍jarā̱jara̍ṃ te
||7||अ॒श्याम॒ तं काम॑मग्ने॒ तवो॒ती अ॒श्याम॑ र॒यिं र॑यिवः सु॒वीर॑म् ।
अ॒श्याम॒ वाज॑म॒भि वा॒जय॑न्तो॒ ऽश्याम॑ द्यु॒म्नम॑जरा॒जरं॑ ते