Study
- Anukramaṇī
- Source
11 bārhaspatyo bharadvāja: | indrāvaruṇau | triṣṭup , 9-10 jagatī |
śru̱ṣṭī vā̍ṃ ya̱jña udya̍taḥ sa̱joṣā̍ manu̱ṣvadvṛ̱ktaba̍rhiṣo̱ yaja̍dhyai |
ā ya indrā̱varu̍ṇāvi̱ṣe a̱dya ma̱he su̱mnāya̍ ma̱ha ā̍va̱varta̍t
||1||श्रु॒ष्टी वां॑ य॒ज्ञ उद्य॑तः स॒जोषा॑ मनु॒ष्वद्वृ॒क्तब॑र्हिषो॒ यज॑ध्यै ।
आ य इन्द्रा॒वरु॑णावि॒षे अ॒द्य म॒हे सु॒म्नाय॑ म॒ह आ॑व॒वर्त॑त्
tā hi śreṣṭhā̍ de̱vatā̍tā tu̱jā śūrā̍ṇā̱ṃ śavi̍ṣṭhā̱ tā hi bhū̱tam |
ma̱ghonā̱ṃ maṃhi̍ṣṭhā tuvi̱śuṣma̍ ṛ̱tena̍ vṛtra̱turā̱ sarva̍senā
||2||ता हि श्रेष्ठा॑ दे॒वता॑ता तु॒जा शूरा॑णां॒ शवि॑ष्ठा॒ ता हि भू॒तम् ।
म॒घोनां॒ मंहि॑ष्ठा तुवि॒शुष्म॑ ऋ॒तेन॑ वृत्र॒तुरा॒ सर्व॑सेना
tā gṛ̍ṇīhi nama̱sye̍bhiḥ śū̱ṣaiḥ su̱mnebhi̱rindrā̱varu̍ṇā cakā̱nā |
vajre̍ṇā̱nyaḥ śava̍sā̱ hanti̍ vṛ̱traṃ siṣa̍ktya̱nyo vṛ̱jane̍ṣu̱ vipra̍:
||3||ता गृ॑णीहि नम॒स्ये॑भिः शू॒षैः सु॒म्नेभि॒रिन्द्रा॒वरु॑णा चका॒ना ।
वज्रे॑णा॒न्यः शव॑सा॒ हन्ति॑ वृ॒त्रं सिष॑क्त्य॒न्यो वृ॒जने॑षु॒ विप्र॑:
gnāśca̱ yannara̍śca vāvṛ̱dhanta̱ viśve̍ de̱vāso̍ na̱rāṃ svagū̍rtāḥ |
praibhya̍ indrāvaruṇā mahi̱tvā dyauśca̍ pṛthivi bhūtamu̱rvī
||4||ग्नाश्च॒ यन्नर॑श्च वावृ॒धन्त॒ विश्वे॑ दे॒वासो॑ न॒रां स्वगू॑र्ताः ।
प्रैभ्य॑ इन्द्रावरुणा महि॒त्वा द्यौश्च॑ पृथिवि भूतमु॒र्वी
sa itsu̱dānu̱: svavā̍m̐ ṛ̱tāvendrā̱ yo vā̍ṃ varuṇa̱ dāśa̍ti̱ tman |
i̱ṣā sa dvi̱ṣasta̍re̱ddāsvā̱nvaṃsa̍dra̱yiṃ ra̍yi̱vata̍śca̱ janā̍n
||5||स इत्सु॒दानु॒: स्ववाँ॑ ऋ॒तावेन्द्रा॒ यो वां॑ वरुण॒ दाश॑ति॒ त्मन् ।
इ॒षा स द्वि॒षस्त॑रे॒द्दास्वा॒न्वंस॑द्र॒यिं र॑यि॒वत॑श्च॒ जना॑न्
yaṃ yu̱vaṃ dā̱śva̍dhvarāya devā ra̱yiṃ dha̱ttho vasu̍mantaṃ puru̱kṣum |
a̱sme sa i̍ndrāvaruṇā̱vapi̍ ṣyā̱tpra yo bha̱nakti̍ va̱nuṣā̱maśa̍stīḥ
||6||यं यु॒वं दा॒श्व॑ध्वराय देवा र॒यिं ध॒त्थो वसु॑मन्तं पुरु॒क्षुम् ।
अ॒स्मे स इ॑न्द्रावरुणा॒वपि॑ ष्या॒त्प्र यो भ॒नक्ति॑ व॒नुषा॒मश॑स्तीः
u̱ta na̍: sutrā̱tro de̱vago̍pāḥ sū̱ribhya̍ indrāvaruṇā ra̱yiḥ ṣyā̍t |
yeṣā̱ṃ śuṣma̱: pṛta̍nāsu sā̱hvānpra sa̱dyo dyu̱mnā ti̱rate̱ tatu̍riḥ
||7||उ॒त न॑: सुत्रा॒त्रो दे॒वगो॑पाः सू॒रिभ्य॑ इन्द्रावरुणा र॒यिः ष्या॑त् ।
येषां॒ शुष्म॒: पृत॑नासु सा॒ह्वान्प्र स॒द्यो द्यु॒म्ना ति॒रते॒ ततु॑रिः
nū na̍ indrāvaruṇā gṛṇā̱nā pṛ̱ṅktaṃ ra̱yiṃ sau̍śrava̱sāya̍ devā |
i̱tthā gṛ̱ṇanto̍ ma̱hina̍sya̱ śardho̱'po na nā̱vā du̍ri̱tā ta̍rema
||8||नू न॑ इन्द्रावरुणा गृणा॒ना पृ॒ङ्क्तं र॒यिं सौ॑श्रव॒साय॑ देवा ।
इ॒त्था गृ॒णन्तो॑ म॒हिन॑स्य॒ शर्धो॒ऽपो न ना॒वा दु॑रि॒ता त॑रेम
pra sa̱mrāje̍ bṛha̱te manma̱ nu pri̱yamarca̍ de̱vāya̱ varu̍ṇāya sa̱pratha̍: |
a̱yaṃ ya u̱rvī ma̍hi̱nā mahi̍vrata̱: kratvā̍ vi̱bhātya̱jaro̱ na śo̱ciṣā̍
||9||प्र स॒म्राजे॑ बृह॒ते मन्म॒ नु प्रि॒यमर्च॑ दे॒वाय॒ वरु॑णाय स॒प्रथ॑: ।
अ॒यं य उ॒र्वी म॑हि॒ना महि॑व्रत॒: क्रत्वा॑ वि॒भात्य॒जरो॒ न शो॒चिषा॑
indrā̍varuṇā sutapāvi̱maṃ su̱taṃ soma̍ṃ pibata̱ṃ madya̍ṃ dhṛtavratā |
yu̱vo ratho̍ adhva̱raṃ de̱vavī̍taye̱ prati̱ svasa̍ra̱mupa̍ yāti pī̱taye̍
||10||इन्द्रा॑वरुणा सुतपावि॒मं सु॒तं सोमं॑ पिबतं॒ मद्यं॑ धृतव्रता ।
यु॒वो रथो॑ अध्व॒रं दे॒ववी॑तये॒ प्रति॒ स्वस॑र॒मुप॑ याति पी॒तये॑
indrā̍varuṇā̱ madhu̍mattamasya̱ vṛṣṇa̱: soma̍sya vṛṣa̱ṇā vṛ̍ṣethām |
i̱daṃ vā̱mandha̱: pari̍ṣiktama̱sme ā̱sadyā̱sminba̱rhiṣi̍ mādayethām
||11||इन्द्रा॑वरुणा॒ मधु॑मत्तमस्य॒ वृष्ण॒: सोम॑स्य वृष॒णा वृ॑षेथाम् ।
इ॒दं वा॒मन्ध॒: परि॑षिक्तम॒स्मे आ॒सद्या॒स्मिन्ब॒र्हिषि॑ मादयेथाम्