Study
- Anukramaṇī
- Source
17 ṛjiśvā bhāradvāja: | viśve devā: | triṣṭup , 7-12 gāyatrī, 14 jagatī |
na taddi̱vā na pṛ̍thi̱vyānu̍ manye̱ na ya̱jñena̱ nota śamī̍bhirā̱bhiḥ |
u̱bjantu̱ taṃ su̱bhva1: parva̍tāso̱ ni hī̍yatāmatiyā̱jasya̍ ya̱ṣṭā
||1||न तद्दि॒वा न पृ॑थि॒व्यानु॑ मन्ये॒ न य॒ज्ञेन॒ नोत शमी॑भिरा॒भिः ।
उ॒ब्जन्तु॒ तं सु॒भ्व१: पर्व॑तासो॒ नि ही॑यतामतिया॒जस्य॑ य॒ष्टा
ati̍ vā̱ yo ma̍ruto̱ manya̍te no̱ brahma̍ vā̱ yaḥ kri̱yamā̍ṇa̱ṃ nini̍tsāt |
tapū̍ṃṣi̱ tasmai̍ vṛji̱nāni̍ santu brahma̱dviṣa̍ma̱bhi taṃ śo̍catu̱ dyauḥ
||2||अति॑ वा॒ यो म॑रुतो॒ मन्य॑ते नो॒ ब्रह्म॑ वा॒ यः क्रि॒यमा॑णं॒ निनि॑त्सात् ।
तपूं॑षि॒ तस्मै॑ वृजि॒नानि॑ सन्तु ब्रह्म॒द्विष॑म॒भि तं शो॑चतु॒ द्यौः
kima̱ṅga tvā̱ brahma̍ṇaḥ soma go̱pāṃ kima̱ṅga tvā̍hurabhiśasti̱pāṃ na̍: |
kima̱ṅga na̍: paśyasi ni̱dyamā̍nānbrahma̱dviṣe̱ tapu̍ṣiṃ he̱tima̍sya
||3||किम॒ङ्ग त्वा॒ ब्रह्म॑णः सोम गो॒पां किम॒ङ्ग त्वा॑हुरभिशस्ति॒पां न॑: ।
किम॒ङ्ग न॑: पश्यसि नि॒द्यमा॑नान्ब्रह्म॒द्विषे॒ तपु॑षिं हे॒तिम॑स्य
ava̍ntu̱ māmu̱ṣaso̱ jāya̍mānā̱ ava̍ntu mā̱ sindha̍va̱: pinva̍mānāḥ |
ava̍ntu mā̱ parva̍tāso dhru̱vāso'va̍ntu mā pi̱taro̍ de̱vahū̍tau
||4||अव॑न्तु॒ मामु॒षसो॒ जाय॑माना॒ अव॑न्तु मा॒ सिन्ध॑व॒: पिन्व॑मानाः ।
अव॑न्तु मा॒ पर्व॑तासो ध्रु॒वासोऽव॑न्तु मा पि॒तरो॑ दे॒वहू॑तौ
vi̱śva̱dānī̍ṃ su̱mana̍saḥ syāma̱ paśye̍ma̱ nu sūrya̍mu̱ccara̍ntam |
tathā̍ kara̱dvasu̍pati̱rvasū̍nāṃ de̱vām̐ ohā̱no'va̱sāga̍miṣṭhaḥ
||5||वि॒श्व॒दानीं॑ सु॒मन॑सः स्याम॒ पश्ये॑म॒ नु सूर्य॑मु॒च्चर॑न्तम् ।
तथा॑ कर॒द्वसु॑पति॒र्वसू॑नां दे॒वाँ ओहा॒नोऽव॒साग॑मिष्ठः
indro̱ nedi̍ṣṭha̱mava̱sāga̍miṣṭha̱: sara̍svatī̱ sindhu̍bhi̱: pinva̍mānā |
pa̱rjanyo̍ na̱ oṣa̍dhībhirmayo̱bhura̱gniḥ su̱śaṃsa̍: su̱hava̍: pi̱teva̍
||6||इन्द्रो॒ नेदि॑ष्ठ॒मव॒साग॑मिष्ठ॒: सर॑स्वती॒ सिन्धु॑भि॒: पिन्व॑माना ।
प॒र्जन्यो॑ न॒ ओष॑धीभिर्मयो॒भुर॒ग्निः सु॒शंस॑: सु॒हव॑: पि॒तेव॑
viśve̍ devāsa̱ ā ga̍ta śṛṇu̱tā ma̍ i̱maṃ hava̍m | edaṃ ba̱rhirni ṣī̍data
||7||विश्वे॑ देवास॒ आ ग॑त शृणु॒ता म॑ इ॒मं हव॑म् । एदं ब॒र्हिर्नि षी॑दत
yo vo̍ devā ghṛ̱tasnu̍nā ha̱vyena̍ prati̱bhūṣa̍ti | taṃ viśva̱ upa̍ gacchatha
||8||यो वो॑ देवा घृ॒तस्नु॑ना ह॒व्येन॑ प्रति॒भूष॑ति । तं विश्व॒ उप॑ गच्छथ
upa̍ naḥ sū̱navo̱ gira̍: śṛ̱ṇvantva̱mṛta̍sya̱ ye | su̱mṛ̱l̤ī̱kā bha̍vantu naḥ
||9||उप॑ नः सू॒नवो॒ गिर॑: शृ॒ण्वन्त्व॒मृत॑स्य॒ ये । सु॒मृ॒ळी॒का भ॑वन्तु नः
viśve̍ de̱vā ṛ̍tā̱vṛdha̍ ṛ̱tubhi̍rhavana̱śruta̍: | ju̱ṣantā̱ṃ yujya̱ṃ paya̍:
||10||विश्वे॑ दे॒वा ऋ॑ता॒वृध॑ ऋ॒तुभि॑र्हवन॒श्रुत॑: । जु॒षन्तां॒ युज्यं॒ पय॑:
sto̱tramindro̍ ma̱rudga̍ṇa̱stvaṣṭṛ̍mānmi̱tro a̍rya̱mā | i̱mā ha̱vyā ju̍ṣanta naḥ
||11||स्तो॒त्रमिन्द्रो॑ म॒रुद्ग॑ण॒स्त्वष्टृ॑मान्मि॒त्रो अ॑र्य॒मा । इ॒मा ह॒व्या जु॑षन्त नः
i̱maṃ no̍ agne adhva̱raṃ hota̍rvayuna̱śo ya̍ja | ci̱ki̱tvāndaivya̱ṃ jana̍m
||12||इ॒मं नो॑ अग्ने अध्व॒रं होत॑र्वयुन॒शो य॑ज । चि॒कि॒त्वान्दैव्यं॒ जन॑म्
viśve̍ devāḥ śṛṇu̱temaṃ hava̍ṃ me̱ ye a̱ntari̍kṣe̱ ya upa̱ dyavi̱ ṣṭha |
ye a̍gniji̱hvā u̱ta vā̱ yaja̍trā ā̱sadyā̱sminba̱rhiṣi̍ mādayadhvam
||13||विश्वे॑ देवाः शृणु॒तेमं हवं॑ मे॒ ये अ॒न्तरि॑क्षे॒ य उप॒ द्यवि॒ ष्ठ ।
ये अ॑ग्निजि॒ह्वा उ॒त वा॒ यज॑त्रा आ॒सद्या॒स्मिन्ब॒र्हिषि॑ मादयध्वम्
viśve̍ de̱vā mama̍ śṛṇvantu ya̱jñiyā̍ u̱bhe roda̍sī a̱pāṃ napā̍cca̱ manma̍ |
mā vo̱ vacā̍ṃsi pari̱cakṣyā̍ṇi vocaṃ su̱mneṣvidvo̱ anta̍mā madema
||14||विश्वे॑ दे॒वा मम॑ शृण्वन्तु य॒ज्ञिया॑ उ॒भे रोद॑सी अ॒पां नपा॑च्च॒ मन्म॑ ।
मा वो॒ वचां॑सि परि॒चक्ष्या॑णि वोचं सु॒म्नेष्विद्वो॒ अन्त॑मा मदेम
ye ke ca̱ jmā ma̱hino̱ ahi̍māyā di̱vo ja̍jñi̱re a̱pāṃ sa̱dhasthe̍ |
te a̱smabhya̍mi̱ṣaye̱ viśva̱māyu̱: kṣapa̍ u̱srā va̍rivasyantu de̱vāḥ
||15||ये के च॒ ज्मा म॒हिनो॒ अहि॑माया दि॒वो ज॑ज्ञि॒रे अ॒पां स॒धस्थे॑ ।
ते अ॒स्मभ्य॑मि॒षये॒ विश्व॒मायु॒: क्षप॑ उ॒स्रा व॑रिवस्यन्तु दे॒वाः
agnī̍parjanyā̱vava̍ta̱ṃ dhiya̍ṃ me̱'sminhave̍ suhavā suṣṭu̱tiṃ na̍: |
il̤ā̍ma̱nyo ja̱naya̱dgarbha̍ma̱nyaḥ pra̱jāva̍tī̱riṣa̱ ā dha̍ttama̱sme
||16||अग्नी॑पर्जन्या॒वव॑तं॒ धियं॑ मे॒ऽस्मिन्हवे॑ सुहवा सुष्टु॒तिं न॑: ।
इळा॑म॒न्यो ज॒नय॒द्गर्भ॑म॒न्यः प्र॒जाव॑ती॒रिष॒ आ ध॑त्तम॒स्मे
stī̱rṇe ba̱rhiṣi̍ samidhā̱ne a̱gnau sū̱ktena̍ ma̱hā nama̱sā vi̍vāse |
a̱sminno̍ a̱dya vi̱dathe̍ yajatrā̱ viśve̍ devā ha̱viṣi̍ mādayadhvam
||17||स्ती॒र्णे ब॒र्हिषि॑ समिधा॒ने अ॒ग्नौ सू॒क्तेन॑ म॒हा नम॒सा वि॑वासे ।
अ॒स्मिन्नो॑ अ॒द्य वि॒दथे॑ यजत्रा॒ विश्वे॑ देवा ह॒विषि॑ मादयध्वम्