Study
- Anukramaṇī
- Source
5 suhotro bhāradvāja: | indra: | triṣṭup ,4 śakvarī |
abhū̱reko̍ rayipate rayī̱ṇāmā hasta̍yoradhithā indra kṛ̱ṣṭīḥ |
vi to̱ke a̱psu tana̍ye ca̱ sūre'vo̍canta carṣa̱ṇayo̱ vivā̍caḥ
||1||अभू॒रेको॑ रयिपते रयी॒णामा हस्त॑योरधिथा इन्द्र कृ॒ष्टीः ।
वि तो॒के अ॒प्सु तन॑ये च॒ सूरेऽवो॑चन्त चर्ष॒णयो॒ विवा॑चः
tvadbhi̱yendra̱ pārthi̍vāni̱ viśvācyu̍tā ciccyāvayante̱ rajā̍ṃsi |
dyāvā̱kṣāmā̱ parva̍tāso̱ vanā̍ni̱ viśva̍ṃ dṛ̱l̤haṃ bha̍yate̱ ajma̱nnā te̍
||2||त्वद्भि॒येन्द्र॒ पार्थि॑वानि॒ विश्वाच्यु॑ता चिच्च्यावयन्ते॒ रजां॑सि ।
द्यावा॒क्षामा॒ पर्व॑तासो॒ वना॑नि॒ विश्वं॑ दृ॒ळ्हं भ॑यते॒ अज्म॒न्ना ते॑
tvaṃ kutse̍nā̱bhi śuṣṇa̍mindrā̱śuṣa̍ṃ yudhya̱ kuya̍va̱ṃ gavi̍ṣṭau |
daśa̍ prapi̱tve adha̱ sūrya̍sya muṣā̱yaśca̱kramavi̍ve̱ rapā̍ṃsi
||3||त्वं कुत्से॑ना॒भि शुष्ण॑मिन्द्रा॒शुषं॑ युध्य॒ कुय॑वं॒ गवि॑ष्टौ ।
दश॑ प्रपि॒त्वे अध॒ सूर्य॑स्य मुषा॒यश्च॒क्रमवि॑वे॒ रपां॑सि
tvaṃ śa̱tānyava̱ śamba̍rasya̱ puro̍ jaghanthāpra̱tīni̱ dasyo̍: |
aśi̍kṣo̱ yatra̱ śacyā̍ śacīvo̱ divo̍dāsāya sunva̱te su̍takre bha̱radvā̍jāya gṛṇa̱te vasū̍ni
||4||त्वं श॒तान्यव॒ शम्ब॑रस्य॒ पुरो॑ जघन्थाप्र॒तीनि॒ दस्यो॑: ।
अशि॑क्षो॒ यत्र॒ शच्या॑ शचीवो॒ दिवो॑दासाय सुन्व॒ते सु॑तक्रे भ॒रद्वा॑जाय गृण॒ते वसू॑नि
sa sa̍tyasatvanmaha̱te raṇā̍ya̱ ratha̱mā ti̍ṣṭha tuvinṛmṇa bhī̱mam |
yā̱hi pra̍pathi̱nnava̱sopa̍ ma̱drikpra ca̍ śruta śrāvaya carṣa̱ṇibhya̍:
||5||स स॑त्यसत्वन्मह॒ते रणा॑य॒ रथ॒मा ति॑ष्ठ तुविनृम्ण भी॒मम् ।
या॒हि प्र॑पथि॒न्नव॒सोप॑ म॒द्रिक्प्र च॑ श्रुत श्रावय चर्ष॒णिभ्य॑: