Study
- Anukramaṇī
- Source
10 bārhaspatyo bharadvāja: | pūṣā | gāyatrī |
saṃ pū̍ṣanvi̱duṣā̍ naya̱ yo añja̍sānu̱śāsa̍ti | ya e̱vedamiti̱ brava̍t
||1||सं पू॑षन्वि॒दुषा॑ नय॒ यो अञ्ज॑सानु॒शास॑ति । य ए॒वेदमिति॒ ब्रव॑त्
samu̍ pū̱ṣṇā ga̍memahi̱ yo gṛ̱hām̐ a̍bhi̱śāsa̍ti | i̱ma e̱veti̍ ca̱ brava̍t
||2||समु॑ पू॒ष्णा ग॑मेमहि॒ यो गृ॒हाँ अ॑भि॒शास॑ति । इ॒म ए॒वेति॑ च॒ ब्रव॑त्
pū̱ṣṇaśca̱kraṃ na ri̍ṣyati̱ na kośo'va̍ padyate | no a̍sya vyathate pa̱viḥ
||3||पू॒ष्णश्च॒क्रं न रि॑ष्यति॒ न कोशोऽव॑ पद्यते । नो अ॑स्य व्यथते प॒विः
yo a̍smai ha̱viṣāvi̍dha̱nna taṃ pū̱ṣāpi̍ mṛṣyate | pra̱tha̱mo vi̍ndate̱ vasu̍
||4||यो अ॑स्मै ह॒विषावि॑ध॒न्न तं पू॒षापि॑ मृष्यते । प्र॒थ॒मो वि॑न्दते॒ वसु॑
pū̱ṣā gā anve̍tu naḥ pū̱ṣā ra̍kṣa̱tvarvataḥ | pū̱ṣā vāja̍ṃ sanotu naḥ
||5||पू॒षा गा अन्वे॑तु नः पू॒षा र॑क्ष॒त्वर्वतः । पू॒षा वाजं॑ सनोतु नः
pūṣa̱nnanu̱ pra gā i̍hi̱ yaja̍mānasya sunva̱taḥ | a̱smāka̍ṃ stuva̱tāmu̱ta
||6||पूष॒न्ननु॒ प्र गा इ॑हि॒ यज॑मानस्य सुन्व॒तः । अ॒स्माकं॑ स्तुव॒तामु॒त
māki̍rneśa̱nmākī̍ṃ riṣa̱nmākī̱ṃ saṃ śā̍ri̱ keva̍ṭe | athāri̍ṣṭābhi̱rā ga̍hi
||7||माकि॑र्नेश॒न्माकीं॑ रिष॒न्माकीं॒ सं शा॑रि॒ केव॑टे । अथारि॑ष्टाभि॒रा ग॑हि
śṛ̱ṇvanta̍ṃ pū̱ṣaṇa̍ṃ va̱yamirya̱mana̍ṣṭavedasam | īśā̍naṃ rā̱ya ī̍mahe
||8||शृ॒ण्वन्तं॑ पू॒षणं॑ व॒यमिर्य॒मन॑ष्टवेदसम् । ईशा॑नं रा॒य ई॑महे
pūṣa̱ntava̍ vra̱te va̱yaṃ na ri̍ṣyema̱ kadā̍ ca̱na | sto̱tāra̍sta i̱ha sma̍si
||9||पूष॒न्तव॑ व्र॒ते व॒यं न रि॑ष्येम॒ कदा॑ च॒न । स्तो॒तार॑स्त इ॒ह स्म॑सि
pari̍ pū̱ṣā pa̱rastā̱ddhasta̍ṃ dadhātu̱ dakṣi̍ṇam | puna̍rno na̱ṣṭamāja̍tu
||10||परि॑ पू॒षा प॒रस्ता॒द्धस्तं॑ दधातु॒ दक्षि॑णम् । पुन॑र्नो न॒ष्टमाज॑तु