Study
- Anukramaṇī
- Source
5 bārhaspatyo bharadvāja: | indra: | triṣṭup |
bhūya̱ idvā̍vṛdhe vī̱ryā̍ya̱m̐ eko̍ aju̱ryo da̍yate̱ vasū̍ni |
pra ri̍rice di̱va indra̍: pṛthi̱vyā a̱rdhamida̍sya̱ prati̱ roda̍sī u̱bhe
||1||भूय॒ इद्वा॑वृधे वी॒र्या॑यँ॒ एको॑ अजु॒र्यो द॑यते॒ वसू॑नि ।
प्र रि॑रिचे दि॒व इन्द्र॑: पृथि॒व्या अ॒र्धमिद॑स्य॒ प्रति॒ रोद॑सी उ॒भे
adhā̍ manye bṛ̱hada̍su̱rya̍masya̱ yāni̍ dā̱dhāra̱ naki̱rā mi̍nāti |
di̱vedi̍ve̱ sūryo̍ darśa̱to bhū̱dvi sadmā̍nyurvi̱yā su̱kratu̍rdhāt
||2||अधा॑ मन्ये बृ॒हद॑सु॒र्य॑मस्य॒ यानि॑ दा॒धार॒ नकि॒रा मि॑नाति ।
दि॒वेदि॑वे॒ सूर्यो॑ दर्श॒तो भू॒द्वि सद्मा॑न्युर्वि॒या सु॒क्रतु॑र्धात्
a̱dyā ci̱nnū ci̱ttadapo̍ na̱dīnā̱ṃ yadā̍bhyo̱ ara̍do gā̱tumi̍ndra |
ni parva̍tā adma̱sado̱ na se̍du̱stvayā̍ dṛ̱l̤hāni̍ sukrato̱ rajā̍ṃsi
||3||अ॒द्या चि॒न्नू चि॒त्तदपो॑ न॒दीनां॒ यदा॑भ्यो॒ अर॑दो गा॒तुमि॑न्द्र ।
नि पर्व॑ता अद्म॒सदो॒ न से॑दु॒स्त्वया॑ दृ॒ळ्हानि॑ सुक्रतो॒ रजां॑सि
sa̱tyamittanna tvāvā̍m̐ a̱nyo a̱stīndra̍ de̱vo na martyo̱ jyāyā̍n |
aha̱nnahi̍ṃ pari̱śayā̍na̱marṇo'vā̍sṛjo a̱po acchā̍ samu̱dram
||4||स॒त्यमित्तन्न त्वावाँ॑ अ॒न्यो अ॒स्तीन्द्र॑ दे॒वो न मर्त्यो॒ ज्याया॑न् ।
अह॒न्नहिं॑ परि॒शया॑न॒मर्णोऽवा॑सृजो अ॒पो अच्छा॑ समु॒द्रम्
tvama̱po vi duro̱ viṣū̍cī̱rindra̍ dṛ̱l̤hama̍ruja̱: parva̍tasya |
rājā̍bhavo̱ jaga̍taścarṣaṇī̱nāṃ sā̱kaṃ sūrya̍ṃ ja̱naya̱ndyāmu̱ṣāsa̍m
||5||त्वम॒पो वि दुरो॒ विषू॑ची॒रिन्द्र॑ दृ॒ळ्हम॑रुज॒: पर्व॑तस्य ।
राजा॑भवो॒ जग॑तश्चर्षणी॒नां सा॒कं सूर्यं॑ ज॒नय॒न्द्यामु॒षास॑म्