Study
- Anukramaṇī
- Source
13 bārhaspatyo bharadvāja: | agni : | triṣṭup |
tvaṃ hya̍gne pratha̱mo ma̱notā̱ 'syā dhi̱yo abha̍vo dasma̱ hotā̍ |
tvaṃ sī̍ṃ vṛṣannakṛṇordu̱ṣṭarī̍tu̱ saho̱ viśva̍smai̱ saha̍se̱ saha̍dhyai
||1||त्वं ह्य॑ग्ने प्रथ॒मो म॒नोता॒ ऽस्या धि॒यो अभ॑वो दस्म॒ होता॑ ।
त्वं सीं॑ वृषन्नकृणोर्दु॒ष्टरी॑तु॒ सहो॒ विश्व॑स्मै॒ सह॑से॒ सह॑ध्यै
adhā̱ hotā̱ nya̍sīdo̱ yajī̍yāni̱l̤aspa̱da i̱ṣaya̱nnīḍya̱: san |
taṃ tvā̱ nara̍: pratha̱maṃ de̍va̱yanto̍ ma̱ho rā̱ye ci̱taya̍nto̱ anu̍ gman
||2||अधा॒ होता॒ न्य॑सीदो॒ यजी॑यानि॒ळस्प॒द इ॒षय॒न्नीड्य॒: सन् ।
तं त्वा॒ नर॑: प्रथ॒मं दे॑व॒यन्तो॑ म॒हो रा॒ये चि॒तय॑न्तो॒ अनु॑ ग्मन्
vṛ̱teva̱ yanta̍ṃ ba̱hubhi̍rvasa̱vyai̱3stve ra̱yiṃ jā̍gṛ̱vāṃso̱ anu̍ gman |
ruśa̍ntama̱gniṃ da̍rśa̱ta bṛ̱hanta̍ṃ va̱pāva̍ntaṃ vi̱śvahā̍ dīdi̱vāṃsa̍m
||3||वृ॒तेव॒ यन्तं॑ ब॒हुभि॑र्वस॒व्यै॒३स्त्वे र॒यिं जा॑गृ॒वांसो॒ अनु॑ ग्मन् ।
रुश॑न्तम॒ग्निं द॑र्श॒त बृ॒हन्तं॑ व॒पाव॑न्तं वि॒श्वहा॑ दीदि॒वांस॑म्
pa̱daṃ de̱vasya̱ nama̍sā̱ vyanta̍: śrava̱syava̱: śrava̍ āpa̱nnamṛ̍ktam |
nāmā̍ni cid dadhire ya̱jñiyā̍ni bha̱drāyā̍ṃ te raṇayanta̱ saṃdṛ̍ṣṭau
||4||प॒दं दे॒वस्य॒ नम॑सा॒ व्यन्त॑: श्रव॒स्यव॒: श्रव॑ आप॒न्नमृ॑क्तम् ।
नामा॑नि चिद् दधिरे य॒ज्ञिया॑नि भ॒द्रायां॑ ते रणयन्त॒ संदृ॑ष्टौ
tvāṃ va̍rdhanti kṣi̱taya̍: pṛthi̱vyāṃ tvāṃ rāya̍ u̱bhayā̍so̱ janā̍nām |
tvaṃ trā̱tā ta̍raṇe̱ cetyo̍ bhūḥ pi̱tā mā̱tā sada̱minmānu̍ṣāṇām
||5||त्वां व॑र्धन्ति क्षि॒तय॑: पृथि॒व्यां त्वां राय॑ उ॒भया॑सो॒ जना॑नाम् ।
त्वं त्रा॒ता त॑रणे॒ चेत्यो॑ भूः पि॒ता मा॒ता सद॒मिन्मानु॑षाणाम्
sa̱pa̱ryeṇya̱: sa pri̱yo vi̱kṣva1gnirhotā̍ ma̱ndro ni ṣa̍sādā̱ yajī̍yān |
taṃ tvā̍ va̱yaṃ dama̱ ā dī̍di̱vāṃsa̱mupa̍ jñu̱bādho̱ nama̍sā sadema
||6||स॒प॒र्येण्य॒: स प्रि॒यो वि॒क्ष्व१ग्निर्होता॑ म॒न्द्रो नि ष॑सादा॒ यजी॑यान् ।
तं त्वा॑ व॒यं दम॒ आ दी॑दि॒वांस॒मुप॑ ज्ञु॒बाधो॒ नम॑सा सदेम
taṃ tvā̍ va̱yaṃ su̱dhyo̱3 navya̍magne sumnā̱yava̍ īmahe deva̱yanta̍: |
tvaṃ viśo̍ anayo̱ dīdyā̍no di̱vo a̍gne bṛha̱tā ro̍ca̱nena̍
||7||तं त्वा॑ व॒यं सु॒ध्यो॒३ नव्य॑मग्ने सुम्ना॒यव॑ ईमहे देव॒यन्त॑: ।
त्वं विशो॑ अनयो॒ दीद्या॑नो दि॒वो अ॑ग्ने बृह॒ता रो॑च॒नेन॑
vi̱śāṃ ka̱viṃ vi̱śpati̱ṃ śaśva̍tīnāṃ ni̱tośa̍naṃ vṛṣa̱bhaṃ ca̍rṣaṇī̱nām |
pretī̍ṣaṇimi̱ṣaya̍ntaṃ pāva̱kaṃ rāja̍ntama̱gniṃ ya̍ja̱taṃ ra̍yī̱ṇām
||8||वि॒शां क॒विं वि॒श्पतिं॒ शश्व॑तीनां नि॒तोश॑नं वृष॒भं च॑र्षणी॒नाम् ।
प्रेती॑षणिमि॒षय॑न्तं पाव॒कं राज॑न्तम॒ग्निं य॑ज॒तं र॑यी॒णाम्
so a̍gna īje śaśa̱me ca̱ marto̱ yasta̱ āna̍ṭ sa̱midhā̍ ha̱vyadā̍tim |
ya āhu̍ti̱ṃ pari̱ vedā̱ namo̍bhi̱rviśvet sa vā̱mā da̍dhate̱ tvāta̍:
||9||सो अ॑ग्न ईजे शश॒मे च॒ मर्तो॒ यस्त॒ आन॑ट् स॒मिधा॑ ह॒व्यदा॑तिम् ।
य आहु॑तिं॒ परि॒ वेदा॒ नमो॑भि॒र्विश्वेत् स वा॒मा द॑धते॒ त्वात॑:
a̱smā u̍ te̱ mahi̍ ma̱he vi̍dhema̱ namo̍bhiragne sa̱midho̱ta ha̱vyaiḥ |
vedī̍ sūno sahaso gī̱rbhiru̱kthairā te̍ bha̱drāyā̍ṃ suma̱tau ya̍tema
||10||अ॒स्मा उ॑ ते॒ महि॑ म॒हे वि॑धेम॒ नमो॑भिरग्ने स॒मिधो॒त ह॒व्यैः ।
वेदी॑ सूनो सहसो गी॒र्भिरु॒क्थैरा ते॑ भ॒द्रायां॑ सुम॒तौ य॑तेम
ā yasta̱tantha̱ roda̍sī̱ vi bhā̱sā śravo̍bhiśca śrava̱sya1staru̍traḥ |
bṛ̱hadbhi̱rvājai̱: sthavi̍rebhira̱sme re̱vadbhi̍ragne vita̱raṃ vi bhā̍hi
||11||आ यस्त॒तन्थ॒ रोद॑सी॒ वि भा॒सा श्रवो॑भिश्च श्रव॒स्य१स्तरु॑त्रः ।
बृ॒हद्भि॒र्वाजै॒: स्थवि॑रेभिर॒स्मे रे॒वद्भि॑रग्ने वित॒रं वि भा॑हि
nṛ̱vad va̍so̱ sada̱middhe̍hya̱sme bhūri̍ to̱kāya̱ tana̍yāya pa̱śvaḥ |
pū̱rvīriṣo̍ bṛha̱tīrā̱rea̍ghā a̱sme bha̱drā sau̍śrava̱sāni̍ santu
||12||नृ॒वद् व॑सो॒ सद॒मिद्धे॑ह्य॒स्मे भूरि॑ तो॒काय॒ तन॑याय प॒श्वः ।
पू॒र्वीरिषो॑ बृह॒तीरा॒रेअ॑घा अ॒स्मे भ॒द्रा सौ॑श्रव॒सानि॑ सन्तु
pu̱rūṇya̍gne puru̱dhā tvā̱yā vasū̍ni rājan va̱sutā̍ te aśyām |
pu̱rūṇi̱ hi tve pu̍ruvāra̱ santyagne̱ vasu̍ vidha̱te rāja̍ni̱ tve
||13||पु॒रूण्य॑ग्ने पुरु॒धा त्वा॒या वसू॑नि राजन् व॒सुता॑ ते अश्याम् ।
पु॒रूणि॒ हि त्वे पु॑रुवार॒ सन्त्यग्ने॒ वसु॑ विध॒ते राज॑नि॒ त्वे