Study
- Anukramaṇī
- Source
6 bārhaspatyo bharadvāja: | agni : |triṣṭup [ 6 purastājjyotirvā ]|
madhye̱ hotā̍ duro̱ṇe ba̱rhiṣo̱ rāl̤a̱gnisto̱dasya̱ roda̍sī̱ yaja̍dhyai |
a̱yaṃ sa sū̱nuḥ saha̍sa ṛ̱tāvā̍ dū̱rāt sūryo̱ na śo̱ciṣā̍ tatāna
||1||मध्ये॒ होता॑ दुरो॒णे ब॒र्हिषो॒ राळ॒ग्निस्तो॒दस्य॒ रोद॑सी॒ यज॑ध्यै ।
अ॒यं स सू॒नुः सह॑स ऋ॒तावा॑ दू॒रात् सूर्यो॒ न शो॒चिषा॑ ततान
ā yasmi̱n tve svapā̍ke yajatra̱ yakṣa̍d rājan tsa̱rvatā̍teva̱ nu dyauḥ |
tri̱ṣa̱dhastha̍stata̱ruṣo̱ na jaṃho̍ ha̱vyā ma̱ghāni̱ mānu̍ṣā̱ yaja̍dhyai
||2||आ यस्मि॒न् त्वे स्वपा॑के यजत्र॒ यक्ष॑द् राजन् त्स॒र्वता॑तेव॒ नु द्यौः ।
त्रि॒ष॒धस्थ॑स्तत॒रुषो॒ न जंहो॑ ह॒व्या म॒घानि॒ मानु॑षा॒ यज॑ध्यै
teji̍ṣṭhā̱ yasyā̍ra̱tirva̍ne̱rāṭ to̱do adhva̱n na vṛ̍dhasā̱no a̍dyaut |
a̱dro̱gho na dra̍vi̱tā ce̍tati̱ tmannama̍rtyo'va̱rtra oṣa̍dhīṣu
||3||तेजि॑ष्ठा॒ यस्या॑र॒तिर्व॑ने॒राट् तो॒दो अध्व॒न् न वृ॑धसा॒नो अ॑द्यौत् ।
अ॒द्रो॒घो न द्र॑वि॒ता चे॑तति॒ त्मन्नम॑र्त्योऽव॒र्त्र ओष॑धीषु
sāsmāke̍bhire̱tarī̱ na śū̱ṣaira̱gniḥ ṣṭa̍ve̱ dama̱ ā jā̱tave̍dāḥ |
drva̍nno va̱nvan kratvā̱ nārvo̱sraḥ pi̱teva̍ jāra̱yāyi̍ ya̱jñaiḥ
||4||सास्माके॑भिरे॒तरी॒ न शू॒षैर॒ग्निः ष्ट॑वे॒ दम॒ आ जा॒तवे॑दाः ।
द्र्व॑न्नो व॒न्वन् क्रत्वा॒ नार्वो॒स्रः पि॒तेव॑ जार॒यायि॑ य॒ज्ञैः
adha̍ smāsya panayanti̱ bhāso̱ vṛthā̱ yat takṣa̍danu̱yāti̍ pṛ̱thvīm |
sa̱dyo yaḥ spa̱ndro viṣi̍to̱ dhavī̍yānṛ̱ṇo na tā̱yurati̱ dhanvā̍ rāṭ
||5||अध॑ स्मास्य पनयन्ति॒ भासो॒ वृथा॒ यत् तक्ष॑दनु॒याति॑ पृ॒थ्वीम् ।
स॒द्यो यः स्प॒न्द्रो विषि॑तो॒ धवी॑यानृ॒णो न ता॒युरति॒ धन्वा॑ राट्
sa tvaṃ no̍ arva̱n nidā̍yā̱ viśve̍bhiragne a̱gnibhi̍ridhā̱naḥ |
veṣi̍ rā̱yo vi yā̍si du̱cchunā̱ made̍ma śa̱tahi̍māḥ su̱vīrā̍:
||6||स त्वं नो॑ अर्व॒न् निदा॑या॒ विश्वे॑भिरग्ने अ॒ग्निभि॑रिधा॒नः ।
वेषि॑ रा॒यो वि या॑सि दु॒च्छुना॒ मदे॑म श॒तहि॑माः सु॒वीरा॑: