Study
- Anukramaṇī
- Source
12 bārhaspatyo bharadvāja: | indra:, 9 , 11 viśve devā: | triṣṭup |
i̱mā u̍ tvā puru̱tama̍sya kā̱rorhavya̍ṃ vīra̱ havyā̍ havante |
dhiyo̍ rathe̱ṣṭhāma̱jara̱ṃ navī̍yo ra̱yirvibhū̍tirīyate vaca̱syā
||1||इ॒मा उ॑ त्वा पुरु॒तम॑स्य का॒रोर्हव्यं॑ वीर॒ हव्या॑ हवन्ते ।
धियो॑ रथे॒ष्ठाम॒जरं॒ नवी॑यो र॒यिर्विभू॑तिरीयते वच॒स्या
tamu̍ stuṣa̱ indra̱ṃ yo vidā̍no̱ girvā̍hasaṃ gī̱rbhirya̱jñavṛ̍ddham |
yasya̱ diva̱mati̍ ma̱hnā pṛ̍thi̱vyāḥ pu̍rumā̱yasya̍ riri̱ce ma̍hi̱tvam
||2||तमु॑ स्तुष॒ इन्द्रं॒ यो विदा॑नो॒ गिर्वा॑हसं गी॒र्भिर्य॒ज्ञवृ॑द्धम् ।
यस्य॒ दिव॒मति॑ म॒ह्ना पृ॑थि॒व्याः पु॑रुमा॒यस्य॑ रिरि॒चे म॑हि॒त्वम्
sa it tamo̍'vayu̱naṃ ta̍ta̱nvat sūrye̍ṇa va̱yuna̍vaccakāra |
ka̱dā te̱ martā̍ a̱mṛta̍sya̱ dhāmeya̍kṣanto̱ na mi̍nanti svadhāvaḥ
||3||स इत् तमो॑ऽवयु॒नं त॑त॒न्वत् सूर्ये॑ण व॒युन॑वच्चकार ।
क॒दा ते॒ मर्ता॑ अ॒मृत॑स्य॒ धामेय॑क्षन्तो॒ न मि॑नन्ति स्वधावः
yastā ca̱kāra̱ sa kuha̍ svi̱dindra̱: kamā jana̍ṃ carati̱ kāsu̍ vi̱kṣu |
kaste̍ ya̱jño mana̍se̱ śaṃ varā̍ya̱ ko a̱rka i̍ndra kata̱maḥ sa hotā̍
||4||यस्ता च॒कार॒ स कुह॑ स्वि॒दिन्द्र॒: कमा जनं॑ चरति॒ कासु॑ वि॒क्षु ।
कस्ते॑ य॒ज्ञो मन॑से॒ शं वरा॑य॒ को अ॒र्क इ॑न्द्र कत॒मः स होता॑
i̱dā hi te̱ vevi̍ṣataḥ purā̱jāḥ pra̱tnāsa̍ ā̱suḥ pu̍rukṛ̱t sakhā̍yaḥ |
ye ma̍dhya̱māsa̍ u̱ta nūta̍nāsa u̱tāva̱masya̍ puruhūta bodhi
||5||इ॒दा हि ते॒ वेवि॑षतः पुरा॒जाः प्र॒त्नास॑ आ॒सुः पु॑रुकृ॒त् सखा॑यः ।
ये म॑ध्य॒मास॑ उ॒त नूत॑नास उ॒ताव॒मस्य॑ पुरुहूत बोधि
taṃ pṛ̱cchanto'va̍rāsa̱: parā̍ṇi pra̱tnā ta̍ indra̱ śrutyānu̍ yemuḥ |
arcā̍masi vīra brahmavāho̱ yāde̱va vi̱dma tāt tvā̍ ma̱hānta̍m
||6||तं पृ॒च्छन्तोऽव॑रास॒: परा॑णि प्र॒त्ना त॑ इन्द्र॒ श्रुत्यानु॑ येमुः ।
अर्चा॑मसि वीर ब्रह्मवाहो॒ यादे॒व वि॒द्म तात् त्वा॑ म॒हान्त॑म्
a̱bhi tvā̱ pājo̍ ra̱kṣaso̱ vi ta̍sthe̱ mahi̍ jajñā̱nama̱bhi tat su ti̍ṣṭha |
tava̍ pra̱tnena̱ yujye̍na̱ sakhyā̱ vajre̍ṇa dhṛṣṇo̱ apa̱ tā nu̍dasva
||7||अ॒भि त्वा॒ पाजो॑ र॒क्षसो॒ वि त॑स्थे॒ महि॑ जज्ञा॒नम॒भि तत् सु ति॑ष्ठ ।
तव॑ प्र॒त्नेन॒ युज्ये॑न॒ सख्या॒ वज्रे॑ण धृष्णो॒ अप॒ ता नु॑दस्व
sa tu śru̍dhīndra̱ nūta̍nasya brahmaṇya̱to vī̍ra kārudhāyaḥ |
tvaṃ hyā̱3piḥ pra̱divi̍ pitṝ̱ṇāṃ śaśva̍d ba̱bhūtha̍ su̱hava̱ eṣṭau̍
||8||स तु श्रु॑धीन्द्र॒ नूत॑नस्य ब्रह्मण्य॒तो वी॑र कारुधायः ।
त्वं ह्या॒३पिः प्र॒दिवि॑ पितॄ॒णां शश्व॑द् ब॒भूथ॑ सु॒हव॒ एष्टौ॑
protaye̱ varu̍ṇaṃ mi̱tramindra̍ṃ ma̱ruta̍: kṛ̱ṣvāva̍se no a̱dya |
pra pū̱ṣaṇa̱ṃ viṣṇu̍ma̱gniṃ pura̍ṃdhiṃ savi̱tāra̱moṣa̍dhī̱: parva̍tām̐śca
||9||प्रोतये॒ वरु॑णं मि॒त्रमिन्द्रं॑ म॒रुत॑: कृ॒ष्वाव॑से नो अ॒द्य ।
प्र पू॒षणं॒ विष्णु॑म॒ग्निं पुरं॑धिं सवि॒तार॒मोष॑धी॒: पर्व॑ताँश्च
i̱ma u̍ tvā puruśāka prayajyo jari̱tāro̍ a̱bhya̍rcantya̱rkaiḥ |
śru̱dhī hava̱mā hu̍va̱to hu̍vā̱no na tvāvā̍m̐ a̱nyo a̍mṛta̱ tvada̍sti
||10||इ॒म उ॑ त्वा पुरुशाक प्रयज्यो जरि॒तारो॑ अ॒भ्य॑र्चन्त्य॒र्कैः ।
श्रु॒धी हव॒मा हु॑व॒तो हु॑वा॒नो न त्वावाँ॑ अ॒न्यो अ॑मृत॒ त्वद॑स्ति
nū ma̱ ā vāca̱mupa̍ yāhi vi̱dvān viśve̍bhiḥ sūno sahaso̱ yaja̍traiḥ |
ye a̍gniji̱hvā ṛ̍ta̱sāpa̍ ā̱surye manu̍ṃ ca̱krurupa̍ra̱ṃ dasā̍ya
||11||नू म॒ आ वाच॒मुप॑ याहि वि॒द्वान् विश्वे॑भिः सूनो सहसो॒ यज॑त्रैः ।
ये अ॑ग्निजि॒ह्वा ऋ॑त॒साप॑ आ॒सुर्ये मनुं॑ च॒क्रुरुप॑रं॒ दसा॑य
sa no̍ bodhi purae̱tā su̱geṣū̱ta du̱rgeṣu̍ pathi̱kṛd vidā̍naḥ |
ye aśra̍māsa u̱ravo̱ vahi̍ṣṭhā̱stebhi̍rna indrā̱bhi va̍kṣi̱ vāja̍m
||12||स नो॑ बोधि पुरए॒ता सु॒गेषू॒त दु॒र्गेषु॑ पथि॒कृद् विदा॑नः ।
ये अश्र॑मास उ॒रवो॒ वहि॑ष्ठा॒स्तेभि॑र्न इन्द्रा॒भि व॑क्षि॒ वाज॑म्