Study
- Anukramaṇī
- Source
5 bārhaspatyo bharadvāja: | indra: | triṣṭup |
ahe̍l̤amāna̱ upa̍ yāhi ya̱jñaṃ tubhya̍ṃ pavanta̱ inda̍vaḥ su̱tāsa̍: |
gāvo̱ na va̍jri̱ntsvamoko̱ acchendrā ga̍hi pratha̱mo ya̱jñiyā̍nām
||1||अहे॑ळमान॒ उप॑ याहि य॒ज्ञं तुभ्यं॑ पवन्त॒ इन्द॑वः सु॒तास॑: ।
गावो॒ न व॑ज्रि॒न्त्स्वमोको॒ अच्छेन्द्रा ग॑हि प्रथ॒मो य॒ज्ञिया॑नाम्
yā te̍ kā̱kutsukṛ̍tā̱ yā vari̍ṣṭhā̱ yayā̱ śaśva̱tpiba̍si̱ madhva̍ ū̱rmim |
tayā̍ pāhi̱ pra te̍ adhva̱ryura̍sthā̱tsaṃ te̱ vajro̍ vartatāmindra ga̱vyuḥ
||2||या ते॑ का॒कुत्सुकृ॑ता॒ या वरि॑ष्ठा॒ यया॒ शश्व॒त्पिब॑सि॒ मध्व॑ ऊ॒र्मिम् ।
तया॑ पाहि॒ प्र ते॑ अध्व॒र्युर॑स्था॒त्सं ते॒ वज्रो॑ वर्ततामिन्द्र ग॒व्युः
e̱ṣa dra̱pso vṛ̍ṣa̱bho vi̱śvarū̍pa̱ indrā̍ya̱ vṛṣṇe̱ sama̍kāri̱ soma̍: |
e̱taṃ pi̍ba harivaḥ sthātarugra̱ yasyeśi̍ṣe pra̱divi̱ yaste̱ anna̍m
||3||ए॒ष द्र॒प्सो वृ॑ष॒भो वि॒श्वरू॑प॒ इन्द्रा॑य॒ वृष्णे॒ सम॑कारि॒ सोम॑: ।
ए॒तं पि॑ब हरिवः स्थातरुग्र॒ यस्येशि॑षे प्र॒दिवि॒ यस्ते॒ अन्न॑म्
su̱taḥ somo̱ asu̍tādindra̱ vasyā̍na̱yaṃ śreyā̍ñciki̱tuṣe̱ raṇā̍ya |
e̱taṃ ti̍tirva̱ upa̍ yāhi ya̱jñaṃ tena̱ viśvā̱stavi̍ṣī̱rā pṛ̍ṇasva
||4||सु॒तः सोमो॒ असु॑तादिन्द्र॒ वस्या॑न॒यं श्रेया॑ञ्चिकि॒तुषे॒ रणा॑य ।
ए॒तं ति॑तिर्व॒ उप॑ याहि य॒ज्ञं तेन॒ विश्वा॒स्तवि॑षी॒रा पृ॑णस्व
hvayā̍masi̱ tvendra̍ yāhya̱rvāṅara̍ṃ te̱ soma̍sta̱nve̍ bhavāti |
śata̍krato mā̱daya̍svā su̱teṣu̱ prāsmām̐ a̍va̱ pṛta̍nāsu̱ pra vi̱kṣu
||5||ह्वया॑मसि॒ त्वेन्द्र॑ याह्य॒र्वाङरं॑ ते॒ सोम॑स्त॒न्वे॑ भवाति ।
शत॑क्रतो मा॒दय॑स्वा सु॒तेषु॒ प्रास्माँ अ॑व॒ पृत॑नासु॒ प्र वि॒क्षु