Study
- Anukramaṇī
- Source
15 bārhaspatyo bharadvāja:| indrāgnī |gāyatrī;1-3, 13 triṣṭup ,14 bṛhatī,15 anuṣṭap|
śnatha̍dvṛ̱tramu̱ta sa̍noti̱ vāja̱mindrā̱ yo a̱gnī sahu̍rī sapa̱ryāt |
i̱ra̱jyantā̍ vasa̱vya̍sya̱ bhūre̱: saha̍stamā̱ saha̍sā vāja̱yantā̍
||1||श्नथ॑द्वृ॒त्रमु॒त स॑नोति॒ वाज॒मिन्द्रा॒ यो अ॒ग्नी सहु॑री सप॒र्यात् ।
इ॒र॒ज्यन्ता॑ वस॒व्य॑स्य॒ भूरे॒: सह॑स्तमा॒ सह॑सा वाज॒यन्ता॑
tā yo̍dhiṣṭama̱bhi gā i̍ndra nū̱nama̱paḥ sva̍ru̱ṣaso̍ agna ū̱l̤hāḥ |
diśa̱: sva̍ru̱ṣasa̍ indra ci̱trā a̱po gā a̍gne yuvase ni̱yutvā̍n
||2||ता यो॑धिष्टम॒भि गा इ॑न्द्र नू॒नम॒पः स्व॑रु॒षसो॑ अग्न ऊ॒ळ्हाः ।
दिश॒: स्व॑रु॒षस॑ इन्द्र चि॒त्रा अ॒पो गा अ॑ग्ने युवसे नि॒युत्वा॑न्
ā vṛ̍trahaṇā vṛtra̱habhi̱: śuṣmai̱rindra̍ yā̱taṃ namo̍bhiragne a̱rvāk |
yu̱vaṃ rādho̍bhi̱raka̍vebhiri̱ndrāgne̍ a̱sme bha̍vatamutta̱mebhi̍:
||3||आ वृ॑त्रहणा वृत्र॒हभि॒: शुष्मै॒रिन्द्र॑ या॒तं नमो॑भिरग्ने अ॒र्वाक् ।
यु॒वं राधो॑भि॒रक॑वेभिरि॒न्द्राग्ने॑ अ॒स्मे भ॑वतमुत्त॒मेभि॑:
tā hu̍ve̱ yayo̍ri̱daṃ pa̱pne viśva̍ṃ pu̱rā kṛ̱tam | i̱ndrā̱gnī na ma̍rdhataḥ
||4||ता हु॑वे॒ ययो॑रि॒दं प॒प्ने विश्वं॑ पु॒रा कृ॒तम् । इ॒न्द्रा॒ग्नी न म॑र्धतः
u̱grā vi̍gha̱ninā̱ mṛdha̍ indrā̱gnī ha̍vāmahe | tā no̍ mṛl̤āta ī̱dṛśe̍
||5||उ॒ग्रा वि॑घ॒निना॒ मृध॑ इन्द्रा॒ग्नी ह॑वामहे । ता नो॑ मृळात ई॒दृशे॑
ha̱to vṛ̱trāṇyāryā̍ ha̱to dāsā̍ni̱ satpa̍tī | ha̱to viśvā̱ apa̱ dviṣa̍:
||6||ह॒तो वृ॒त्राण्यार्या॑ ह॒तो दासा॑नि॒ सत्प॑ती । ह॒तो विश्वा॒ अप॒ द्विष॑:
indrā̍gnī yu̱vāmi̱me̱3'bhi stomā̍ anūṣata | piba̍taṃ śambhuvā su̱tam
||7||इन्द्रा॑ग्नी यु॒वामि॒मे॒३ऽभि स्तोमा॑ अनूषत । पिब॑तं शम्भुवा सु॒तम्
yā vā̱ṃ santi̍ puru̱spṛho̍ ni̱yuto̍ dā̱śuṣe̍ narā | indrā̍gnī̱ tābhi̱rā ga̍tam
||8||या वां॒ सन्ति॑ पुरु॒स्पृहो॑ नि॒युतो॑ दा॒शुषे॑ नरा । इन्द्रा॑ग्नी॒ ताभि॒रा ग॑तम्
tābhi̱rā ga̍cchataṃ na̱rope̱daṃ sava̍naṃ su̱tam | indrā̍gnī̱ soma̍pītaye
||9||ताभि॒रा ग॑च्छतं न॒रोपे॒दं सव॑नं सु॒तम् । इन्द्रा॑ग्नी॒ सोम॑पीतये
tamī̍l̤iṣva̱ yo a̱rciṣā̱ vanā̱ viśvā̍ pari̱ṣvaja̍t | kṛ̱ṣṇā kṛ̱ṇoti̍ ji̱hvayā̍
||10||तमी॑ळिष्व॒ यो अ॒र्चिषा॒ वना॒ विश्वा॑ परि॒ष्वज॑त् । कृ॒ष्णा कृ॒णोति॑ जि॒ह्वया॑
ya i̱ddha ā̱vivā̍sati su̱mnamindra̍sya̱ martya̍: | dyu̱mnāya̍ su̱tarā̍ a̱paḥ
||11||य इ॒द्ध आ॒विवा॑सति सु॒म्नमिन्द्र॑स्य॒ मर्त्य॑: । द्यु॒म्नाय॑ सु॒तरा॑ अ॒पः
tā no̱ vāja̍vatī̱riṣa̍ ā̱śūnpi̍pṛta̱marva̍taḥ | indra̍ma̱gniṃ ca̱ vol̤ha̍ve
||12||ता नो॒ वाज॑वती॒रिष॑ आ॒शून्पि॑पृत॒मर्व॑तः । इन्द्र॑म॒ग्निं च॒ वोळ्ह॑वे
u̱bhā vā̍mindrāgnī āhu̱vadhyā̍ u̱bhā rādha̍saḥ sa̱ha mā̍da̱yadhyai̍ |
u̱bhā dā̱tārā̍vi̱ṣāṃ ra̍yī̱ṇāmu̱bhā vāja̍sya sā̱taye̍ huve vām
||13||उ॒भा वा॑मिन्द्राग्नी आहु॒वध्या॑ उ॒भा राध॑सः स॒ह मा॑द॒यध्यै॑ ।
उ॒भा दा॒तारा॑वि॒षां र॑यी॒णामु॒भा वाज॑स्य सा॒तये॑ हुवे वाम्
ā no̱ gavye̍bhi̱raśvyai̍rvasa̱vyai̱3rupa̍ gacchatam |
sakhā̍yau de̱vau sa̱khyāya̍ śa̱mbhuve̍ndrā̱gnī tā ha̍vāmahe
||14||आ नो॒ गव्ये॑भि॒रश्व्यै॑र्वस॒व्यै॒३रुप॑ गच्छतम् ।
सखा॑यौ दे॒वौ स॒ख्याय॑ श॒म्भुवे॑न्द्रा॒ग्नी ता ह॑वामहे
indrā̍gnī śṛṇu̱taṃ hava̱ṃ yaja̍mānasya sunva̱taḥ | vī̱taṃ ha̱vyānyā ga̍ta̱ṃ piba̍taṃ so̱myaṃ madhu̍
||15||इन्द्रा॑ग्नी शृणु॒तं हवं॒ यज॑मानस्य सुन्व॒तः । वी॒तं ह॒व्यान्या ग॑तं॒ पिब॑तं सो॒म्यं मधु॑