Study
- Anukramaṇī
- Source
6 bārhaspatyo bharadvāja: | agni : |triṣṭup |
tvad viśvā̍ subhaga̱ saubha̍gā̱nyagne̱ vi ya̍nti va̱nino̱ na va̱yāḥ |
śru̱ṣṭī ra̱yirvājo̍ vṛtra̱tūrye̍ di̱vo vṛ̱ṣṭirīḍyo̍ rī̱tira̱pām
||1||त्वद् विश्वा॑ सुभग॒ सौभ॑गा॒न्यग्ने॒ वि य॑न्ति व॒निनो॒ न व॒याः ।
श्रु॒ष्टी र॒यिर्वाजो॑ वृत्र॒तूर्ये॑ दि॒वो वृ॒ष्टिरीड्यो॑ री॒तिर॒पाम्
tvaṃ bhago̍ na̱ ā hi ratna̍mi̱ṣe pari̍jmeva kṣayasi da̱smava̍rcāḥ |
agne̍ mi̱tro na bṛ̍ha̱ta ṛ̱tasyā'si̍ kṣa̱ttā vā̱masya̍ deva̱ bhūre̍:
||2||त्वं भगो॑ न॒ आ हि रत्न॑मि॒षे परि॑ज्मेव क्षयसि द॒स्मव॑र्चाः ।
अग्ने॑ मि॒त्रो न बृ॑ह॒त ऋ॒तस्याऽसि॑ क्ष॒त्ता वा॒मस्य॑ देव॒ भूरे॑:
sa satpa̍ti̱: śava̍sā hanti vṛ̱tramagne̱ vipro̱ vi pa̱ṇerbha̍rti̱ vāja̍m |
yaṃ tvaṃ pra̍ceta ṛtajāta rā̱yā sa̱joṣā̱ naptrā̱pāṃ hi̱noṣi̍
||3||स सत्प॑ति॒: शव॑सा हन्ति वृ॒त्रमग्ने॒ विप्रो॒ वि प॒णेर्भ॑र्ति॒ वाज॑म् ।
यं त्वं प्र॑चेत ऋतजात रा॒या स॒जोषा॒ नप्त्रा॒पां हि॒नोषि॑
yaste̍ sūno sahaso gī̱rbhiru̱kthairya̱jñairmarto̱ niśi̍tiṃ ve̱dyāna̍ṭ |
viśva̱ṃ sa de̍va̱ prati̱ vāra̍magne dha̱tte dhā̱nyaṃ1 patya̍te vasa̱vyai̍:
||4||यस्ते॑ सूनो सहसो गी॒र्भिरु॒क्थैर्य॒ज्ञैर्मर्तो॒ निशि॑तिं वे॒द्यान॑ट् ।
विश्वं॒ स दे॑व॒ प्रति॒ वार॑मग्ने ध॒त्ते धा॒न्यं१ पत्य॑ते वस॒व्यै॑:
tā nṛbhya̱ ā sau̍śrava̱sā su̱vīrā 'gne̍ sūno sahasaḥ pu̱ṣyase̍ dhāḥ |
kṛ̱ṇoṣi̱ yacchava̍sā̱ bhūri̍ pa̱śvo vayo̱ vṛkā̍yā̱raye̱ jasu̍raye
||5||ता नृभ्य॒ आ सौ॑श्रव॒सा सु॒वीरा ऽग्ने॑ सूनो सहसः पु॒ष्यसे॑ धाः ।
कृ॒णोषि॒ यच्छव॑सा॒ भूरि॑ प॒श्वो वयो॒ वृका॑या॒रये॒ जसु॑रये
va̱dmā sū̍no sahaso no̱ vihā̍yā̱ agne̍ to̱kaṃ tana̍yaṃ vā̱ji no̍ dāḥ |
viśvā̍bhirgī̱rbhira̱bhi pū̱rtima̍śyā̱ṃ made̍ma śa̱tahi̍māḥ su̱vīrā̍:
||6||व॒द्मा सू॑नो सहसो नो॒ विहा॑या॒ अग्ने॑ तो॒कं तन॑यं वा॒जि नो॑ दाः ।
विश्वा॑भिर्गी॒र्भिर॒भि पू॒र्तिम॑श्यां॒ मदे॑म श॒तहि॑माः सु॒वीरा॑: