Study
- Anukramaṇī
- Source
11 bārhaspatyo bharadvāja: | mitrāvaruṇau | triṣṭup |
viśve̍ṣāṃ vaḥ sa̱tāṃ jyeṣṭha̍tamā gī̱rbhirmi̱trāvaru̍ṇā vāvṛ̱dhadhyai̍ |
saṃ yā ra̱śmeva̍ ya̱matu̱ryami̍ṣṭhā̱ dvā janā̱m̐ asa̍mā bā̱hubhi̱: svaiḥ
||1||विश्वे॑षां वः स॒तां ज्येष्ठ॑तमा गी॒र्भिर्मि॒त्रावरु॑णा वावृ॒धध्यै॑ ।
सं या र॒श्मेव॑ य॒मतु॒र्यमि॑ष्ठा॒ द्वा जनाँ॒ अस॑मा बा॒हुभि॒: स्वैः
i̱yaṃ madvā̱ṃ pra stṛ̍ṇīte manī̱ṣopa̍ pri̱yā nama̍sā ba̱rhiraccha̍ |
ya̱ntaṃ no̍ mitrāvaruṇā̱vadhṛ̍ṣṭaṃ cha̱rdiryadvā̍ṃ varū̱thya̍ṃ sudānū
||2||इ॒यं मद्वां॒ प्र स्तृ॑णीते मनी॒षोप॑ प्रि॒या नम॑सा ब॒र्हिरच्छ॑ ।
य॒न्तं नो॑ मित्रावरुणा॒वधृ॑ष्टं छ॒र्दिर्यद्वां॑ वरू॒थ्यं॑ सुदानू
ā yā̍taṃ mitrāvaruṇā suśa̱styupa̍ pri̱yā nama̍sā hū̱yamā̍nā |
saṃ yāva̍pna̱:stho a̱pase̍va̱ janā̍ñchrudhīya̱taści̍dyatatho mahi̱tvā
||3||आ या॑तं मित्रावरुणा सुश॒स्त्युप॑ प्रि॒या नम॑सा हू॒यमा॑ना ।
सं याव॑प्न॒:स्थो अ॒पसे॑व॒ जना॑ञ्छ्रुधीय॒तश्चि॑द्यतथो महि॒त्वा
aśvā̱ na yā vā̱jinā̍ pū̱taba̍ndhū ṛ̱tā yadgarbha̱madi̍ti̱rbhara̍dhyai |
pra yā mahi̍ ma̱hāntā̱ jāya̍mānā gho̱rā martā̍ya ri̱pave̱ ni dī̍dhaḥ
||4||अश्वा॒ न या वा॒जिना॑ पू॒तब॑न्धू ऋ॒ता यद्गर्भ॒मदि॑ति॒र्भर॑ध्यै ।
प्र या महि॑ म॒हान्ता॒ जाय॑माना घो॒रा मर्ता॑य रि॒पवे॒ नि दी॑धः
viśve̱ yadvā̍ṃ ma̱ṃhanā̱ manda̍mānāḥ kṣa̱traṃ de̱vāso̱ ada̍dhuḥ sa̱joṣā̍: |
pari̱ yadbhū̱tho roda̍sī cidu̱rvī santi̱ spaśo̱ ada̍bdhāso̱ amū̍rāḥ
||5||विश्वे॒ यद्वां॑ मं॒हना॒ मन्द॑मानाः क्ष॒त्रं दे॒वासो॒ अद॑धुः स॒जोषा॑: ।
परि॒ यद्भू॒थो रोद॑सी चिदु॒र्वी सन्ति॒ स्पशो॒ अद॑ब्धासो॒ अमू॑राः
tā hi kṣa̱traṃ dhā̱raye̍the̱ anu̱ dyūndṛ̱ṃhethe̱ sānu̍mupa̱mādi̍va̱ dyoḥ |
dṛ̱l̤ho nakṣa̍tra u̱ta vi̱śvade̍vo̱ bhūmi̱mātā̱ndyāṃ dhā̱sinā̱yoḥ
||6||ता हि क्ष॒त्रं धा॒रये॑थे॒ अनु॒ द्यून्दृं॒हेथे॒ सानु॑मुप॒मादि॑व॒ द्योः ।
दृ॒ळ्हो नक्ष॑त्र उ॒त वि॒श्वदे॑वो॒ भूमि॒माता॒न्द्यां धा॒सिना॒योः
tā vi̱graṃ dhai̍the ja̱ṭhara̍ṃ pṛ̱ṇadhyā̱ ā yatsadma̱ sabhṛ̍tayaḥ pṛ̱ṇanti̍ |
na mṛ̍ṣyante yuva̱tayo'vā̍tā̱ vi yatpayo̍ viśvajinvā̱ bhara̍nte
||7||ता वि॒ग्रं धै॑थे ज॒ठरं॑ पृ॒णध्या॒ आ यत्सद्म॒ सभृ॑तयः पृ॒णन्ति॑ ।
न मृ॑ष्यन्ते युव॒तयोऽवा॑ता॒ वि यत्पयो॑ विश्वजिन्वा॒ भर॑न्ते
tā ji̱hvayā̱ sada̱medaṃ su̍me̱dhā ā yadvā̍ṃ sa̱tyo a̍ra̱tiṝ̱te bhūt |
tadvā̍ṃ mahi̱tvaṃ ghṛ̍tānnāvastu yu̱vaṃ dā̱śuṣe̱ vi ca̍yiṣṭa̱maṃha̍:
||8||ता जि॒ह्वया॒ सद॒मेदं सु॑मे॒धा आ यद्वां॑ स॒त्यो अ॑र॒तिॠ॒ते भूत् ।
तद्वां॑ महि॒त्वं घृ॑तान्नावस्तु यु॒वं दा॒शुषे॒ वि च॑यिष्ट॒मंह॑:
pra yadvā̍ṃ mitrāvaruṇā spū̱rdhanpri̱yā dhāma̍ yu̱vadhi̍tā mi̱nanti̍ |
na ye de̱vāsa̱ oha̍sā̱ na martā̱ aya̍jñasāco̱ apyo̱ na pu̱trāḥ
||9||प्र यद्वां॑ मित्रावरुणा स्पू॒र्धन्प्रि॒या धाम॑ यु॒वधि॑ता मि॒नन्ति॑ ।
न ये दे॒वास॒ ओह॑सा॒ न मर्ता॒ अय॑ज्ञसाचो॒ अप्यो॒ न पु॒त्राः
vi yadvāca̍ṃ kī̱stāso̱ bhara̍nte̱ śaṃsa̍nti̱ ke ci̍nni̱vido̍ manā̱nāḥ |
ādvā̍ṃ bravāma sa̱tyānyu̱kthā naki̍rde̱vebhi̍ryatatho mahi̱tvā
||10||वि यद्वाचं॑ की॒स्तासो॒ भर॑न्ते॒ शंस॑न्ति॒ के चि॑न्नि॒विदो॑ मना॒नाः ।
आद्वां॑ ब्रवाम स॒त्यान्यु॒क्था नकि॑र्दे॒वेभि॑र्यतथो महि॒त्वा
a̱vori̱tthā vā̍ṃ cha̱rdiṣo̍ a̱bhiṣṭau̍ yu̱vormi̍trāvaruṇā̱vaskṛ̍dhoyu |
anu̱ yadgāva̍: sphu̱rānṛ̍ji̱pyaṃ dhṛ̱ṣṇuṃ yadraṇe̱ vṛṣa̍ṇaṃ yu̱naja̍n
||11||अ॒वोरि॒त्था वां॑ छ॒र्दिषो॑ अ॒भिष्टौ॑ यु॒वोर्मि॑त्रावरुणा॒वस्कृ॑धोयु ।
अनु॒ यद्गाव॑: स्फु॒रानृ॑जि॒प्यं धृ॒ष्णुं यद्रणे॒ वृष॑णं यु॒नज॑न्