Study
- Anukramaṇī
- Source
5 bārhaspatyo bharadvāja: | indra: | triṣṭup |
apā̍di̱ta udu̍ naści̱trata̍mo ma̱hīṃ bha̍rṣaddyu̱matī̱mindra̍hūtim |
panya̍sīṃ dhī̱tiṃ daivya̍sya̱ yāma̱ñjana̍sya rā̱tiṃ va̍nate su̱dānu̍:
||1||अपा॑दि॒त उदु॑ नश्चि॒त्रत॑मो म॒हीं भ॑र्षद्द्यु॒मती॒मिन्द्र॑हूतिम् ।
पन्य॑सीं धी॒तिं दैव्य॑स्य॒ याम॒ञ्जन॑स्य रा॒तिं व॑नते सु॒दानु॑:
dū̱rācci̱dā va̍sato asya̱ karṇā̱ ghoṣā̱dindra̍sya tanyati bruvā̱ṇaḥ |
eyame̍naṃ de̱vahū̍tirvavṛtyānma̱drya1gindra̍mi̱yamṛ̱cyamā̍nā
||2||दू॒राच्चि॒दा व॑सतो अस्य॒ कर्णा॒ घोषा॒दिन्द्र॑स्य तन्यति ब्रुवा॒णः ।
एयमे॑नं दे॒वहू॑तिर्ववृत्यान्म॒द्र्य१गिन्द्र॑मि॒यमृ॒च्यमा॑ना
taṃ vo̍ dhi̱yā pa̍ra̱mayā̍ purā̱jāma̱jara̱mindra̍ma̱bhya̍nūṣya̱rkaiḥ |
brahmā̍ ca̱ giro̍ dadhi̱re sama̍sminma̱hām̐śca̱ stomo̱ adhi̍ vardha̱dindre̍
||3||तं वो॑ धि॒या प॑र॒मया॑ पुरा॒जाम॒जर॒मिन्द्र॑म॒भ्य॑नूष्य॒र्कैः ।
ब्रह्मा॑ च॒ गिरो॑ दधि॒रे सम॑स्मिन्म॒हाँश्च॒ स्तोमो॒ अधि॑ वर्ध॒दिन्द्रे॑
vardhā̱dyaṃ ya̱jña u̱ta soma̱ indra̱ṃ vardhā̱dbrahma̱ gira̍ u̱kthā ca̱ manma̍ |
vardhāhai̍namu̱ṣaso̱ yāma̍nna̱ktorvardhā̱nmāsā̍: śa̱rado̱ dyāva̱ indra̍m
||4||वर्धा॒द्यं य॒ज्ञ उ॒त सोम॒ इन्द्रं॒ वर्धा॒द्ब्रह्म॒ गिर॑ उ॒क्था च॒ मन्म॑ ।
वर्धाहै॑नमु॒षसो॒ याम॑न्न॒क्तोर्वर्धा॒न्मासा॑: श॒रदो॒ द्याव॒ इन्द्र॑म्
e̱vā ja̍jñā̱naṃ saha̍se̱ asā̍mi vāvṛdhā̱naṃ rādha̍se ca śru̱tāya̍ |
ma̱hāmu̱gramava̍se vipra nū̱namā vi̍vāsema vṛtra̱tūrye̍ṣu
||5||ए॒वा ज॑ज्ञा॒नं सह॑से॒ असा॑मि वावृधा॒नं राध॑से च श्रु॒ताय॑ ।
म॒हामु॒ग्रमव॑से विप्र नू॒नमा वि॑वासेम वृत्र॒तूर्ये॑षु