Study
- Anukramaṇī
- Source
33 śaṃyurbārhaspatya:| indra:, 31-33 bṛbustakṣā | gāyatrī, 29 atinicṛta, 31 pādanicṛta, 33 anuṣṭup |
ya āna̍yatparā̱vata̱: sunī̍tī tu̱rvaśa̱ṃ yadu̍m | indra̱: sa no̱ yuvā̱ sakhā̍
||1||य आन॑यत्परा॒वत॒: सुनी॑ती तु॒र्वशं॒ यदु॑म् । इन्द्र॒: स नो॒ युवा॒ सखा॑
a̱vi̱pre ci̱dvayo̱ dadha̍danā̱śunā̍ ci̱darva̍tā | indro̱ jetā̍ hi̱taṃ dhana̍m
||2||अ॒वि॒प्रे चि॒द्वयो॒ दध॑दना॒शुना॑ चि॒दर्व॑ता । इन्द्रो॒ जेता॑ हि॒तं धन॑म्
ma̱hīra̍sya̱ praṇī̍tayaḥ pū̱rvīru̱ta praśa̍stayaḥ | nāsya̍ kṣīyanta ū̱taya̍:
||3||म॒हीर॑स्य॒ प्रणी॑तयः पू॒र्वीरु॒त प्रश॑स्तयः । नास्य॑ क्षीयन्त ऊ॒तय॑:
sakhā̍yo̱ brahma̍vāha̱se'rca̍ta̱ pra ca̍ gāyata | sa hi na̱: prama̍tirma̱hī
||4||सखा॑यो॒ ब्रह्म॑वाह॒सेऽर्च॑त॒ प्र च॑ गायत । स हि न॒: प्रम॑तिर्म॒ही
tvameka̍sya vṛtrahannavi̱tā dvayo̍rasi | u̱tedṛśe̱ yathā̍ va̱yam
||5||त्वमेक॑स्य वृत्रहन्नवि॒ता द्वयो॑रसि । उ॒तेदृशे॒ यथा॑ व॒यम्
naya̱sīdvati̱ dviṣa̍: kṛ̱ṇoṣyu̍kthaśa̱ṃsina̍: | nṛbhi̍: su̱vīra̍ ucyase
||6||नय॒सीद्वति॒ द्विष॑: कृ॒णोष्यु॑क्थशं॒सिन॑: । नृभि॑: सु॒वीर॑ उच्यसे
bra̱hmāṇa̱ṃ brahma̍vāhasaṃ gī̱rbhiḥ sakhā̍yamṛ̱gmiya̍m | gāṃ na do̱hase̍ huve
||7||ब्र॒ह्माणं॒ ब्रह्म॑वाहसं गी॒र्भिः सखा॑यमृ॒ग्मिय॑म् । गां न दो॒हसे॑ हुवे
yasya̱ viśvā̍ni̱ hasta̍yorū̱curvasū̍ni̱ ni dvi̱tā | vī̱rasya̍ pṛtanā̱ṣaha̍:
||8||यस्य॒ विश्वा॑नि॒ हस्त॑योरू॒चुर्वसू॑नि॒ नि द्वि॒ता । वी॒रस्य॑ पृतना॒षह॑:
vi dṛ̱l̤hāni̍ cidadrivo̱ janā̍nāṃ śacīpate | vṛ̱ha mā̱yā a̍nānata
||9||वि दृ॒ळ्हानि॑ चिदद्रिवो॒ जना॑नां शचीपते । वृ॒ह मा॒या अ॑नानत
tamu̍ tvā satya somapā̱ indra̍ vājānāṃ pate | ahū̍mahi śrava̱syava̍:
||10||तमु॑ त्वा सत्य सोमपा॒ इन्द्र॑ वाजानां पते । अहू॑महि श्रव॒स्यव॑:
tamu̍ tvā̱ yaḥ pu̱rāsi̍tha̱ yo vā̍ nū̱naṃ hi̱te dhane̍ | havya̱: sa śru̍dhī̱ hava̍m
||11||तमु॑ त्वा॒ यः पु॒रासि॑थ॒ यो वा॑ नू॒नं हि॒ते धने॑ । हव्य॒: स श्रु॑धी॒ हव॑म्
dhī̱bhirarva̍dbhi̱rarva̍to̱ vājā̍m̐ indra śra̱vāyyā̍n | tvayā̍ jeṣma hi̱taṃ dhana̍m
||12||धी॒भिरर्व॑द्भि॒रर्व॑तो॒ वाजाँ॑ इन्द्र श्र॒वाय्या॑न् । त्वया॑ जेष्म हि॒तं धन॑म्
abhū̍ru vīra girvaṇo ma̱hām̐ i̍ndra̱ dhane̍ hi̱te | bhare̍ vitanta̱sāyya̍:
||13||अभू॑रु वीर गिर्वणो म॒हाँ इ॑न्द्र॒ धने॑ हि॒ते । भरे॑ वितन्त॒साय्य॑:
yā ta̍ ū̱tira̍mitrahanma̱kṣūja̍vasta̱māsa̍ti | tayā̍ no hinuhī̱ ratha̍m
||14||या त॑ ऊ॒तिर॑मित्रहन्म॒क्षूज॑वस्त॒मास॑ति । तया॑ नो हिनुही॒ रथ॑म्
sa rathe̍na ra̱thīta̍mo̱'smāke̍nābhi̱yugva̍nā | jeṣi̍ jiṣṇo hi̱taṃ dhana̍m
||15||स रथे॑न र॒थीत॑मो॒ऽस्माके॑नाभि॒युग्व॑ना । जेषि॑ जिष्णो हि॒तं धन॑म्
ya eka̱ ittamu̍ ṣṭuhi kṛṣṭī̱nāṃ vica̍rṣaṇiḥ | pati̍rja̱jñe vṛṣa̍kratuḥ
||16||य एक॒ इत्तमु॑ ष्टुहि कृष्टी॒नां विच॑र्षणिः । पति॑र्ज॒ज्ञे वृष॑क्रतुः
yo gṛ̍ṇa̱tāmidāsi̍thā̱''pirū̱tī śi̱vaḥ sakhā̍ | sa tvaṃ na̍ indra mṛl̤aya
||17||यो गृ॑ण॒तामिदासि॑था॒ऽऽपिरू॒ती शि॒वः सखा॑ । स त्वं न॑ इन्द्र मृळय
dhi̱ṣva vajra̱ṃ gabha̍styo rakṣo̱hatyā̍ya vajrivaḥ | sā̱sa̱hī̱ṣṭhā a̱bhi spṛdha̍:
||18||धि॒ष्व वज्रं॒ गभ॑स्त्यो रक्षो॒हत्या॑य वज्रिवः । सा॒स॒ही॒ष्ठा अ॒भि स्पृध॑:
pra̱tnaṃ ra̍yī̱ṇāṃ yuja̱ṃ sakhā̍yaṃ kīri̱coda̍nam | brahma̍vāhastamaṃ huve
||19||प्र॒त्नं र॑यी॒णां युजं॒ सखा॑यं कीरि॒चोद॑नम् । ब्रह्म॑वाहस्तमं हुवे
sa hi viśvā̍ni̱ pārthi̍vā̱m̐ eko̱ vasū̍ni̱ patya̍te | girva̍ṇastamo̱ adhri̍guḥ
||20||स हि विश्वा॑नि॒ पार्थि॑वाँ॒ एको॒ वसू॑नि॒ पत्य॑ते । गिर्व॑णस्तमो॒ अध्रि॑गुः
sa no̍ ni̱yudbhi̱rā pṛ̍ṇa̱ kāma̱ṃ vāje̍bhira̱śvibhi̍: | goma̍dbhirgopate dhṛ̱ṣat
||21||स नो॑ नि॒युद्भि॒रा पृ॑ण॒ कामं॒ वाजे॑भिर॒श्विभि॑: । गोम॑द्भिर्गोपते धृ॒षत्
tadvo̍ gāya su̱te sacā̍ puruhū̱tāya̱ satva̍ne | śaṃ yadgave̱ na śā̱kine̍
||22||तद्वो॑ गाय सु॒ते सचा॑ पुरुहू॒ताय॒ सत्व॑ने । शं यद्गवे॒ न शा॒किने॑
na ghā̱ vasu̱rni ya̍mate dā̱naṃ vāja̍sya̱ goma̍taḥ | yatsī̱mupa̱ śrava̱dgira̍:
||23||न घा॒ वसु॒र्नि य॑मते दा॒नं वाज॑स्य॒ गोम॑तः । यत्सी॒मुप॒ श्रव॒द्गिर॑:
ku̱vitsa̍sya̱ pra hi vra̱jaṃ goma̍ntaṃ dasyu̱hā gama̍t | śacī̍bhi̱rapa̍ no varat
||24||कु॒वित्स॑स्य॒ प्र हि व्र॒जं गोम॑न्तं दस्यु॒हा गम॑त् । शची॑भि॒रप॑ नो वरत्
i̱mā u̍ tvā śatakrato̱'bhi pra ṇo̍nuvu̱rgira̍: | indra̍ va̱tsaṃ na mā̱tara̍:
||25||इ॒मा उ॑ त्वा शतक्रतो॒ऽभि प्र णो॑नुवु॒र्गिर॑: । इन्द्र॑ व॒त्सं न मा॒तर॑:
dū̱ṇāśa̍ṃ sa̱khyaṃ tava̱ gaura̍si vīra gavya̱te | aśvo̍ aśvāya̱te bha̍va
||26||दू॒णाशं॑ स॒ख्यं तव॒ गौर॑सि वीर गव्य॒ते । अश्वो॑ अश्वाय॒ते भ॑व
sa ma̍ndasvā̱ hyandha̍so̱ rādha̍se ta̱nvā̍ ma̱he | na sto̱tāra̍ṃ ni̱de ka̍raḥ
||27||स म॑न्दस्वा॒ ह्यन्ध॑सो॒ राध॑से त॒न्वा॑ म॒हे । न स्तो॒तारं॑ नि॒दे क॑रः
i̱mā u̍ tvā su̱tesu̍te̱ nakṣa̍nte girvaṇo̱ gira̍: | va̱tsaṃ gāvo̱ na dhe̱nava̍:
||28||इ॒मा उ॑ त्वा सु॒तेसु॑ते॒ नक्ष॑न्ते गिर्वणो॒ गिर॑: । व॒त्सं गावो॒ न धे॒नव॑:
pu̱rū̱tama̍ṃ purū̱ṇāṃ sto̍tṝ̱ṇāṃ vivā̍ci | vāje̍bhirvājaya̱tām
||29||पु॒रू॒तमं॑ पुरू॒णां स्तो॑तॄ॒णां विवा॑चि । वाजे॑भिर्वाजय॒ताम्
a̱smāka̍mindra bhūtu te̱ stomo̱ vāhi̍ṣṭho̱ anta̍maḥ | a̱smānrā̱ye ma̱he hi̍nu
||30||अ॒स्माक॑मिन्द्र भूतु ते॒ स्तोमो॒ वाहि॑ष्ठो॒ अन्त॑मः । अ॒स्मान्रा॒ये म॒हे हि॑नु
adhi̍ bṛ̱buḥ pa̍ṇī̱nāṃ varṣi̍ṣṭhe mū̱rdhanna̍sthāt | u̱ruḥ kakṣo̱ na gā̱ṅgyaḥ
||31||अधि॑ बृ॒बुः प॑णी॒नां वर्षि॑ष्ठे मू॒र्धन्न॑स्थात् । उ॒रुः कक्षो॒ न गा॒ङ्ग्यः
yasya̍ vā̱yori̍va dra̱vadbha̱drā rā̱tiḥ sa̍ha̱sriṇī̍ | sa̱dyo dā̱nāya̱ maṃha̍te
||32||यस्य॑ वा॒योरि॑व द्र॒वद्भ॒द्रा रा॒तिः स॑ह॒स्रिणी॑ । स॒द्यो दा॒नाय॒ मंह॑ते
tatsu no̱ viśve̍ a̱rya ā sadā̍ gṛṇanti kā̱rava̍: | bṛ̱buṃ sa̍hasra̱dāta̍maṃ sū̱riṃ sa̍hasra̱sāta̍mam
||33||तत्सु नो॒ विश्वे॑ अ॒र्य आ सदा॑ गृणन्ति का॒रव॑: । बृ॒बुं स॑हस्र॒दात॑मं सू॒रिं स॑हस्र॒सात॑मम्