Study
- Anukramaṇī
- Source
11 bārhaspatyo bharadvāja: | aśvinau | triṣṭup ,1 virāṭ ,11 ekapadā triṣṭup|
kva1 tyā va̱lgū pu̍ruhū̱tādya dū̱to na stomo̍'vida̱nnama̍svān |
ā yo a̱rvāṅnāsa̍tyā va̱varta̱ preṣṭhā̱ hyasa̍tho asya̱ manma̍n
||1||क्व१ त्या व॒ल्गू पु॑रुहू॒ताद्य दू॒तो न स्तोमो॑ऽविद॒न्नम॑स्वान् ।
आ यो अ॒र्वाङ्नास॑त्या व॒वर्त॒ प्रेष्ठा॒ ह्यस॑थो अस्य॒ मन्म॑न्
ara̍ṃ me ganta̱ṃ hava̍nāyā̱smai gṛ̍ṇā̱nā yathā̱ pibā̍tho̱ andha̍: |
pari̍ ha̱ tyadva̱rtiryā̍tho ri̱ṣo na yatparo̱ nānta̍rastutu̱ryāt
||2||अरं॑ मे गन्तं॒ हव॑नाया॒स्मै गृ॑णा॒ना यथा॒ पिबा॑थो॒ अन्ध॑: ।
परि॑ ह॒ त्यद्व॒र्तिर्या॑थो रि॒षो न यत्परो॒ नान्त॑रस्तुतु॒र्यात्
akā̍ri vā̱mandha̍so̱ varī̍ma̱nnastā̍ri ba̱rhiḥ su̍prāya̱ṇata̍mam |
u̱ttā̱naha̍sto yuva̱yurva̍va̱ndā ''vā̱ṃ nakṣa̍nto̱ adra̍ya āñjan
||3||अका॑रि वा॒मन्ध॑सो॒ वरी॑म॒न्नस्ता॑रि ब॒र्हिः सु॑प्राय॒णत॑मम् ।
उ॒त्ता॒नह॑स्तो युव॒युर्व॑व॒न्दा ऽऽवां॒ नक्ष॑न्तो॒ अद्र॑य आञ्जन्
ū̱rdhvo vā̍ma̱gnira̍dhva̱reṣva̍sthā̱tpra rā̱tire̍ti jū̱rṇinī̍ ghṛ̱tācī̍ |
pra hotā̍ gū̱rtama̍nā urā̱ṇo'yu̍kta̱ yo nāsa̍tyā̱ havī̍man
||4||ऊ॒र्ध्वो वा॑म॒ग्निर॑ध्व॒रेष्व॑स्था॒त्प्र रा॒तिरे॑ति जू॒र्णिनी॑ घृ॒ताची॑ ।
प्र होता॑ गू॒र्तम॑ना उरा॒णोऽयु॑क्त॒ यो नास॑त्या॒ हवी॑मन्
adhi̍ śri̱ye du̍hi̱tā sūrya̍sya̱ ratha̍ṃ tasthau purubhujā śa̱toti̍m |
pra mā̱yābhi̍rmāyinā bhūta̱matra̱ narā̍ nṛtū̱ jani̍manya̱jñiyā̍nām
||5||अधि॑ श्रि॒ये दु॑हि॒ता सूर्य॑स्य॒ रथं॑ तस्थौ पुरुभुजा श॒तोति॑म् ।
प्र मा॒याभि॑र्मायिना भूत॒मत्र॒ नरा॑ नृतू॒ जनि॑मन्य॒ज्ञिया॑नाम्
yu̱vaṃ śrī̱bhirda̍rśa̱tābhi̍rā̱bhiḥ śu̱bhe pu̱ṣṭimū̍hathuḥ sū̱ryāyā̍: |
pra vā̱ṃ vayo̱ vapu̱ṣe'nu̍ papta̱nnakṣa̱dvāṇī̱ suṣṭu̍tā dhiṣṇyā vām
||6||यु॒वं श्री॒भिर्द॑र्श॒ताभि॑रा॒भिः शु॒भे पु॒ष्टिमू॑हथुः सू॒र्याया॑: ।
प्र वां॒ वयो॒ वपु॒षेऽनु॑ पप्त॒न्नक्ष॒द्वाणी॒ सुष्टु॑ता धिष्ण्या वाम्
ā vā̱ṃ vayo'śvā̍so̱ vahi̍ṣṭhā a̱bhi prayo̍ nāsatyā vahantu |
pra vā̱ṃ ratho̱ mano̍javā asarjī̱ṣaḥ pṛ̱kṣa i̱ṣidho̱ anu̍ pū̱rvīḥ
||7||आ वां॒ वयोऽश्वा॑सो॒ वहि॑ष्ठा अ॒भि प्रयो॑ नासत्या वहन्तु ।
प्र वां॒ रथो॒ मनो॑जवा असर्जी॒षः पृ॒क्ष इ॒षिधो॒ अनु॑ पू॒र्वीः
pu̱ru hi vā̍ṃ purubhujā de̱ṣṇaṃ dhe̱nuṃ na̱ iṣa̍ṃ pinvata̱masa̍krām |
stuta̍śca vāṃ mādhvī suṣṭu̱tiśca̱ rasā̍śca̱ ye vā̱manu̍ rā̱timagma̍n
||8||पु॒रु हि वां॑ पुरुभुजा दे॒ष्णं धे॒नुं न॒ इषं॑ पिन्वत॒मस॑क्राम् ।
स्तुत॑श्च वां माध्वी सुष्टु॒तिश्च॒ रसा॑श्च॒ ये वा॒मनु॑ रा॒तिमग्म॑न्
u̱ta ma̍ ṛ̱jre pura̍yasya ra̱ghvī su̍mī̱l̤he śa̱taṃ pe̍ru̱ke ca̍ pa̱kvā |
śā̱ṇḍo dā̍ddhira̱ṇina̱: smaddi̍ṣṭī̱ndaśa̍ va̱śāso̍ abhi̱ṣāca̍ ṛ̱ṣvān
||9||उ॒त म॑ ऋ॒ज्रे पुर॑यस्य र॒घ्वी सु॑मी॒ळ्हे श॒तं पे॑रु॒के च॑ प॒क्वा ।
शा॒ण्डो दा॑द्धिर॒णिन॒: स्मद्दि॑ष्टी॒न्दश॑ व॒शासो॑ अभि॒षाच॑ ऋ॒ष्वान्
saṃ vā̍ṃ śa̱tā nā̍satyā sa̱hasrā'śvā̍nāṃ puru̱panthā̍ gi̱re dā̍t |
bha̱radvā̍jāya vīra̱ nū gi̱re dā̍ddha̱tā rakṣā̍ṃsi purudaṃsasā syuḥ
||10||सं वां॑ श॒ता ना॑सत्या स॒हस्राऽश्वा॑नां पुरु॒पन्था॑ गि॒रे दा॑त् ।
भ॒रद्वा॑जाय वीर॒ नू गि॒रे दा॑द्ध॒ता रक्षां॑सि पुरुदंससा स्युः
ā vā̍ṃ su̱mne vari̍mantsū̱ribhi̍: ṣyām
||11||आ वां॑ सु॒म्ने वरि॑मन्त्सू॒रिभि॑: ष्याम्