Study
- Anukramaṇī
- Source
5 śyāvāśva ātreyaḥ| savitā| jagatī|
yu̱ñjate̱ mana̍ u̱ta yu̍ñjate̱ dhiyo̱ viprā̱ vipra̍sya bṛha̱to vi̍pa̱ścita̍: |
vi hotrā̍ dadhe vayunā̱videka̱ inma̱hī de̱vasya̍ savi̱tuḥ pari̍ṣṭutiḥ
||1||यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चित॑: ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः
viśvā̍ rū̱pāṇi̱ prati̍ muñcate ka̱viḥ prāsā̍vīd bha̱draṃ dvi̱pade̱ catu̍ṣpade |
vi nāka̍makhyat savi̱tā vare̱ṇyo'nu̍ pra̱yāṇa̍mu̱ṣaso̱ vi rā̍jati
||2||विश्वा॑ रू॒पाणि॒ प्रति॑ मुञ्चते क॒विः प्रासा॑वीद् भ॒द्रं द्वि॒पदे॒ चतु॑ष्पदे ।
वि नाक॑मख्यत् सवि॒ता वरे॒ण्योऽनु॑ प्र॒याण॑मु॒षसो॒ वि रा॑जति
yasya̍ pra̱yāṇa̱manva̱nya id ya̱yurde̱vā de̱vasya̍ mahi̱māna̱moja̍sā |
yaḥ pārthi̍vāni vima̱me sa eta̍śo̱ rajā̍ṃsi de̱vaḥ sa̍vi̱tā ma̍hitva̱nā
||3||यस्य॑ प्र॒याण॒मन्व॒न्य इद् य॒युर्दे॒वा दे॒वस्य॑ महि॒मान॒मोज॑सा ।
यः पार्थि॑वानि विम॒मे स एत॑शो॒ रजां॑सि दे॒वः स॑वि॒ता म॑हित्व॒ना
u̱ta yā̍si savita̱strīṇi̍ roca̱nota sūrya̍sya ra̱śmibhi̱: samu̍cyasi |
u̱ta rātrī̍mubha̱yata̱: parī̍yasa u̱ta mi̱tro bha̍vasi deva̱ dharma̍bhiḥ
||4||उ॒त या॑सि सवित॒स्त्रीणि॑ रोच॒नोत सूर्य॑स्य र॒श्मिभि॒: समु॑च्यसि ।
उ॒त रात्री॑मुभ॒यत॒: परी॑यस उ॒त मि॒त्रो भ॑वसि देव॒ धर्म॑भिः
u̱teśi̍ṣe prasa̱vasya̱ tvameka̱ idu̱ta pū̱ṣā bha̍vasi deva̱ yāma̍bhiḥ |
u̱tedaṃ viśva̱ṃ bhuva̍na̱ṃ vi rā̍jasi śyā̱vāśva̍ste savita̱ stoma̍mānaśe
||5||उ॒तेशि॑षे प्रस॒वस्य॒ त्वमेक॒ इदु॒त पू॒षा भ॑वसि देव॒ याम॑भिः ।
उ॒तेदं विश्वं॒ भुव॑नं॒ वि रा॑जसि श्या॒वाश्व॑स्ते सवित॒ स्तोम॑मानशे